Прэзідэнт Турцыі звольніў губернатара адной з усходніх правінцый краіны без пазначэння афіцыйнай прычыны. Незадоўга да гэтага чыноўнік апынуўся ў цэнтры публічнай спрэчкі: палітыкі абурыліся яго фотаздымкамі і відэа ў велаформе, якія ён рэгулярна выкладваў у сацсетках. Яны сцвярджалі, што такія паводзіны не адпавядаюць статусу губернатара.
З падрабязнасцямі знаёміць The Telegraph.
На мінулым тыдні прэзідэнт Турцыі сваім указам адправіў у адстаўку губернатара правінцыі Ардаган Мехмета Фаціха Чычэклі (Mehmet Fatih Çiçekli). Перад гэтым чыноўніка некалькі месяцаў крытыкавалі за актыўнасць у сацсетках і захапленне веласпортам.
Чычэклі рэгулярна публікаваў фота і відэа з велапрабегаў і трэніровак, на якіх быў адзеты ў шчыгульныя веласіпедныя легінсы з лайкры. Менавіта яны і сталі галоўнай прычынай нападак на яго з боку іншых палітыкаў.
Найбольш рэзка выказаўся дэпутат ад Рэспубліканскай народнай партыі Інан Акгюн Алп (İnan Akgün Alp). «Губернатар у легінсах? Гэта проста недапушчальна. Такіх губернатараў трэба здымаць з пасадаў ці хаця б выдаваць ім фігавы лісток», — заявіў ён. Паводле дэпутата, Чычэклі «забыўся на сур'ёзнасць і годнасць дзяржаўнай службы».
З крытыкай выступіў і дэпутат ад кіроўнай Партыі справядлівасці і развіцця Шаміль Таяр (Şamil Tayyar). Ён заявіў, што пастаяннае з'яўленне губернатара ў велаэкіпіроўцы падрывае аўтарытэт яго пасады.
«Ні грамадзяне, ні яго падначаленыя не будуць успрымаць губернатара ў легінсах сур'ёзна. У яго няма аўтарытэту», — сказаў Таяр.
Як паведамляецца, 49‑гадовы Чычэклі працуе ў сістэме дзяржаўнага кіравання з 2004 года, а губернатарам Ардагана быў прызначаны толькі ў студзені. З пасады яго знялі 17 ліпеня.
Аднак ужо на наступны дзень у інтэрнэце з'явілася петыцыя з патрабаваннем вярнуць чыноўніка на працу. Яна хутка сабрала амаль 10 тысяч подпісаў.
Яе аўтары сцвярджаюць, што Чычэклі шмат зрабіў для развіцця моладзевага спорту і велатурызму ў горнай правінцыі. Паводле іх, дзякуючы яго ініцыятывам усё больш маладых людзей пачалі займацца спортам.
Сам Чычэклі — заўзяты веласіпедыст. Ён прапаноўваў арганізаваць у Ардагане велафестываль, а ў сваіх сацсетках таксама дзяліўся відэа з трэніровак па веславанні.
Навіну пра звальненне губернатара негатыўна ўспрынялі і ў Еўропе. Дакладчык Еўрапарламента па Турцыі Нача Санчэс Амор абвінаваціў Інана Акгюна Алпа ў падтрымцы ісламска-кансерватыўнага парадку дня.
Сам Чычэклі таксама не бачыць нічога дзіўнага ў сваім выбары адзення.
«Гэта проста спартыўнае адзенне. Часам варта забыцца пра пасады і тытулы і памятаць, што ты найперш чалавек. Спорт, язда на ровары ці веславанне — гэта не нешта дрэннае. Наадварот, гэтым варта займацца людзям у любым узросце», — сказаў ён пасля звальнення і паабяцаў «працягваць круціць педалі».
Цяпер чытаюць
Ціханоўская: Перамены ў Беларусі — гэта пытанне часу. Вось асноўныя тэзісы яе выступу на канферэнцыі «Новая Беларусь»23
Ціханоўская: Перамены ў Беларусі — гэта пытанне часу. Вось асноўныя тэзісы яе выступу на канферэнцыі «Новая Беларусь»
DDoS-атака ідзе на сайты адразу некалькіх беларускіх СМІ. Магчыма, яна звязаная з шостай гадавінай народнага ўздыму 2020‑га і канферэнцыяй «Новая Беларусь», што адкрылася сёння66
Каментары