У Гродне пачаў працу новы сартавальны цэнтр маркетплэйса Ozon плошчай 2,55 тысячы квадратных метраў. Яго адкрыццё, як заяўляецца, павінна паскорыць дастаўку заказаў купцам і адгрузку тавараў прадаўцоў у заходніх рэгіёнах Беларусі, піша Office Life.
У цэнтры будуць сартаваць і апрацоўваць заказы, а таксама займацца вяртаннем тавараў. На першым этапе ён зможа апрацоўваць да 20 тысяч заказаў за суткі, або больш за 600 тысяч штомесяц. Да снежня кампанія плануе павялічыць магутнасць да 55 тысяч заказаў у суткі.
У Ozon адзначылі, што неабходнасць адкрыцця новага аб'екта звязаная з хуткім ростам попыту. У другім квартале 2026 года жыхары Беларусі аформілі на маркетплэйсе больш чым утрая больш заказаў, чым за такі ж перыяд мінулага года. Дзякуючы новаму цэнтру купцы і прадаўцы заходняй часткі краіны атрымаюць такія ж магчымасці па хуткасці дастаўкі і адгрузкі, як і ў Мінску.
Новы комплекс адпавядае сучасным патрабаванням складской лагістыкі. Ён абсталяваны гідраўлічнымі пагрузачнымі платформамі і сучаснымі канструкцыямі, што дазваляе больш эфектыўна і бесперабойна апрацоўваць тавары.
Раней лагістычная сетка Ozon у Беларусі ўключала лагістычны хаб у Мінску і сартавальныя цэнтры ў Оршы і Баранавічах.
Расійская кампанія працуе на беларускім рынку з 2021 года. У 2025 годзе яна першай сярод маркетплэйсаў у Беларусі ўвяла ў эксплуатацыю аўтаматызаваны 3D-сартавальнік, які павысіў хуткасць і дакладнасць апрацоўкі заказаў. Таксама актыўна пашыраецца сетка пунктаў выдачы: у другім квартале 2026 года іх колькасць павялічылася больш чым у паўтара раза ў параўнанні з аналагічным перыядам мінулага года. Абарот пляцоўкі за гэты час вырас больш чым удвая, а колькасць актыўных купцоў — на 51 працэнт.
Фінансавыя паказчыкі кампаніі таксама працягваюць расці. У другім квартале 2026 года чысты прыбытак Ozon павялічыўся ў тры разы ў параўнанні з мінулым годам, а абарот маркетплэйса ў Беларусі расце амаль удвая хутчэй, чым год таму.
Адзін з найбуйнейшых вытворцаў зброі ва Украіне назваў мэту ўдараў па Wildberries
Уладальніка кампаніі-прадаўца на Wildberries і Ozon асудзілі па палітычнай крыміналцы
«Яндэкс Маркет» і Ozon пасля ўдараў па складах Wildberries таксама знялі з сябе адказнасць за страты тавараў пры атаках
Чаму Украіна ўдарыла па складах Wildberries і як усюдыісны маркетплэйс звязаны з расійскай арміяй
Каментары