Siońnia ŭ kniharni «łohvinaŬ» adbudziecca prezentacyja knihi dyrektara Biełaruskaj słužby Radyjo Svaboda Alaksandra Łukašuka «Zkimby-zymby». Vydańnie vyjšła ŭ seryi «Biblijatečka časopisu «Dziejasłoŭ».
U viečarynie voźmuć udzieł Valancin Akudovič, Uładzimier Arłoŭ, Alaksandar Łukašuk, Hienadź Macur, Uładzimier Niaklajeŭ, Piatro Sadoŭski, Barys Piatrovič. Pačatak u 17.00. Uvachod volny.
Voś što raskazaŭ Alaksandar Łukašuk pra svaju novuju knihu:
«Zkimby-zymby» — u pierakładzie z adnoj pavažanaj movy heta faktyčna aznačaje — čamu b nie napisać pra siabroŭ. Bo što nasamreč čakać radasnuju ci sumnuju nahodu, da taho ž nieviadoma, kamu pisać pieršym. Pryncyp taki — zkimby chacieŭ by apynucca na vyśpie ci ŭ turmie, ci ŭ Paryžy. I voś akazałasia, što ź niekatorymi pa ŭsich hetych adrasach zymby (u pierakładzie jak doma).
Inšymi słovami zaŭčasnyja ŭspaminy pra ludziej, ź jakimi ja sustrakaŭsia, spračaŭsia, jakija mieli ŭpłyŭ. Ad Janki Bryła da Miłtana Frydmana, ad Uładzi Arłova da Vacłava Haŭła.
Pieršaja častka knihi — asabistaje, litaraturny siamiejna-histaryčny kantekst. Druhaja — postaci. Heta lustracyi naadvarot, postaci siabroŭ, ludziej, jakich ja liču važnymi dla siabie. I treciaja častka pryśviečana Vasilu Bykavu, vialikamu siabru biełaruskaj słužby Radyjo Svaboda, našamu słuchaču i našamu aŭtaru. Tam pierapiska. interviju, uspaminy, a taksama adzin malunak Bykava, na jakim namalavany ja sam».
Siarod hierojaŭ novaj knihi Alaksandra Łukašuka — Janka Bryl, čałaviek daždžu, Arsieni Tarkoŭski, čałaviek adlustravańnia, Uładzimier Konan, čałaviek palotu, Aleś Adamovič, čałaviek dziejańnia, Arkadź Ruderman, čałaviek teatra, Vital Skałaban, čałaviek-amfibija, Uładzimier Karmiłkin, čałaviek chroniki, Viera Ryč, čałaviek tanca, Iosif Brodzki, čałaviek imperyi, Valancin Taras, čałaviek vydychu, Paŭluk Urban, čałaviek rukapisu, Vital Taras, čałaviek udychu, Uładzimier Katkoŭski, čałaviek. org, Siarhiej Cimochaŭ, čałaviek džazu, Robiert Konkviest, čałaviek travy, Edvard Teler, čałaviek bomby, Miłtan Frydman, čałaviek hihijeny, Vacłaŭ Haveł, čałaviek svabody...
Kamientary