Siońnia «Noč muziejaŭ»: tysiačy ludziej na vulicach Minska

Biełaruś užo ŭ dziaviaty raz dałučajecca da mižnarodnaj akcyi «Noč muziejaŭ». Akcyja prymierkavanaja da Mižnarodnaha dnia muziejaŭ, jaki adznačajecca 18 maja.

Siońnia bolš jak 100 dziaržaŭnych muziejnych ustanoŭ krainy, a taksama mastackija halerei ŭ Minsku i rehijonach prapanoŭvajuć naviedvalnikam kulturnyja prahramy, nakiravanyja na papularyzacyju muziejnaj spravy i mastactva ŭ cełym.

Nacyjanalny mastacki muziej (NMM) Biełarusi na hety raz vyrašyŭ źviarnucca da biełaruskaj tematyki.

Kancertnyja i vystavačnyja prahramy padčas akcyi projduć jak u załach muzieja, hetak i ŭ dvoryku NMM, adkryćcio jakoha prymierkavana da hetaj padziei. Naviedvalnikam pakažuć vystavy «Pravicieli i mahnaty Vialikaha kniastva Litoŭskaha» z ekspanataŭ ukrainskich muziejaŭ Lvova i Łucka, «Načny vizit " Valeryja Słauka, fotavystavy «Biełaruś u abdymkach zorak» Viktara Małyščyca i «Biełaruś siniavokaja» Dzianisa Ramaniuka.

Roznyja prahramy NMM projduć pry ŭdziele biełaruskich muzyčnych, teatralnych i tancavalnych kalektyvaŭ, dyzajnieraŭ.

Košt uvachodnaha bileta składzie 50 tysiač rubloŭ, ale naviedvalniki ŭ «fantastyčnym» abutku ci «čaroŭnych» akularach zmohuć trapić na muziejnaje śviata biaspłatna.

Nacyjanalny histaryčny muziej (NHM) sioleta robić akcent na čyśle 13 i sprabuje abvierhnuć mif pra toje, što heta čysło nieščaślivaje.

Na vystavie «Kamunalnaja kvatera № 13» možna panazirać za žyćciom jaje nasielnikaŭ, navat syhrać z žycharami kvatery ŭ damino. U ramkach ekspazicyi «Historyja Biełarusi XVI–XVIII stst. u partretach i hieraldycy» možna budzie adlustravać siabie ŭ estetycy sarmackaha partreta.

U załach muzieja na praciahu ŭsioj akcyi buduć pracavać džazavyja kalektyvy. Haściej čakaje interaktyŭnaja hulnia «12 kresłaŭ + 1», a taksama spartyŭnaja hulniovaja prahrama dla dziaŭčat, pryśviečanaja 13 lipienia 1908 hoda, kali ŭpieršyniu da ŭdziełu ŭ Alimpijskich hulniach byli dapuščanyja žančyny.

Dziaržaŭny litaraturny muziej imia Janki Kupały praviadzie dla svaich haściej «PaŬlinka PARTY», prymierkavanuju da 100-hodździa pieršaj pastanoŭki śpiektakla «Paŭlinka».

U ramkach muziejnaj nočy na alejach parku imia Kupały raźmieścicca vystava-kirmaš rukatvornych vyrabaŭ. Na hanku muzieja projduć kancerty z udziełam biełaruskich hurtoŭ Alta Mente, Folkmashina i «Bosaje sonca». Tut ža buduć arhanizavanyja pradstaŭleńni teatra tanca «OtražieniJa», studenckaha ekśpierymientalnaha teatra-studyi «ARTvoyage» (BDUIR) i «Adekvatnaha teatra «vKUBJe».

Asnoŭnaj prahramaj akcyi Kupałaŭskaha muzieja stanie modny pakaz u supravadžeńni duchavoha arkiestra pahraničnych vojskaŭ, u jakim udzieł voźmuć jak prafiesijnyja madeli, hetak i supracoŭniki muzieja. U muziejnych załach buduć pracavać cyrulniki i vizažysty.

Prahrama, aryjentavanaja na nieakademičnaje mastactva, adbudziecca ŭ Muziei sučasnaha vyjaŭlenčaha mastactva.

Da śviatkavańnia mižnarodnaj muziejnaj akcyi padklučylisia taksama mastackija halerei. Admysłovyja prahramy padrychtavali Haradskaja mastackaja halereja Leanida Ščamialova i halereja «Ŭ».

Z padrabiaznaj infarmacyjaj ab hrafiku mierapryjemstvaŭ, jakija padrychtavali biełaruskija muziei, možna aznajomicca na sajcie Ministerstva kultury Biełarusi www.kultura.by.

• 0
• 0
• 0
• 0
• 0
• 0
• 0
• 0