Cypras abvinavaciŭ ES, što ź im nie abmierkavali novyja sankcyi suprać Rasii. Ź im razmaŭlała Mahieryni

Novy premjer-ministr Hrecyi, lidar radykalna-levaj kaalicyi Siryza Aleksis Cypras pastaviŭ pad sumnieŭ patrebu ŭvodzić novyja sankcyi Jeŭrasajuza suprać Rasii ŭ adkaz na prasoŭvańnie rasijskich siłaŭ u Danbasie i abstreły Maryupala.

Jak paviedamlajuć hrečaskija ŚMI, Cypras «abvinavaciŭ lideraŭ ES u tym, što jany nie kansultavalisia z Hrecyjaj» u hetym pytańni. Jon taksama śćviardžaje, što ES «abychodzić ustanoŭlenyja pracedury» i što ES «nie atrymlivaŭ zhody Hrecyi» na sankcyi da Rasii.

Pra heta, jak paviedamlajuć ŚMI, Cypras paviedamiŭ u telefonnaj razmovie z kaardynatarkaj jeŭrapiejskaj dypłamatyi Fiederykaj Mahieryni.

Ministry zamiežnych spraŭ Jeŭrasajuza sustrakajucca ŭ čaćvier. Vybary ŭ Hrecyi prajšli ŭ niadzielu, a novy ŭrad byŭ pryznačany ŭ aŭtorak. 

U Jeŭrasajuzie rašeńni prymajucca kansensusam. Tamu radykalna levy ŭrad Hrecyi zmoža błakavać lubyja rašeńni ES, skiravanyja na strymlivańnie rasijskaha nastupu va Ukrainie ci na abaronu pravoŭ čałavieka ŭ Biełarusi.

U Jeŭraparłamiencie Siryza ŭvachodzić u jeŭrapiejski błok «Jeŭrapiejskija levyja». Lidar Siryza Aleksis Cypras navat byŭ kandydatam ad hetaha zhurtavańnia na pasadu kiraŭnika Jeŭrakamisii. A Jeŭrapiejskija levyja tradycyjna vystupajuć suprać sankcyj da Rasii za jaje ahresiju va Ukrainie. Jany ŭskładajuć vinu za padziei ŭ Krymie i Danbasie na centralny ŭrad Ukrainy.

Taksama levyja hałasavali suprać abmiežavalnych mieraŭ u dačynieńni da łukašenkaŭcaŭ za parušeńni pravoŭ čałavieka ŭ Biełarusi. Hałoŭny vorah dla jeŭrapiejskaj radykalnaj lavicy — heta ZŠA i pravyja siły ŭ Jeŭropie. U zmahańni ź imi jany hatovyja jadnacca navat z dyktatarami. Čaves — kumir jeŭrapiejskich levych, a Pucin — nadzieja na źmienu status-kvo na suśvietnaj palityčnaj arenie. Niekatoryja z palityčnych siłaŭ, što ŭtvaryli Siryzu, atrymlivali finansavańnie z Maskvy jašče ŭ savieckija časy.

Palitołahi nie dajuć rady pradkazać, jak buduć razhortvacca padziei paśla pieramohi Siryzy. U palityčnych kołach Hiermanii nie vyklučali varyjantu vychadu Hrecyi ź jeŭrazony i Jeŭrasajuza ŭvohule — pieršy taki vypadak u historyi ES.

Bolšaść analitykaŭ u samoj Hrecyi dapuskajuć, što paśla prychodu da ŭłady Siryza nie budzie vykonvać bolšaści pieradvybarnych abiacańniaŭ i praciahnie vykanańnie patrabavańniaŭ mižnarodnych kredytoraŭ, kab utrymacca ŭ jeŭrazonie. Dźvie traciny hrekaŭ chočuć zachavańnia jeŭra. Hałasavańnie za Siryzu — pratestnaje pa svaim charaktary.

Kamunisty i radykały ŭvachodzili va ŭradavyja kaalicyi ŭ jeŭrapiejskich krainach i raniej. Heta zdarałasia ŭ Francyi pry Fransua Miteranu, u Italii ŭ 1990—2000-ja. Heta nie pryviało da dezintehracyi ES, ale nakładvała adbitak na palityku sajuza. Roźnica ŭ tym, što Siryza — samaja radykalnaja palityčnaja siła, jakaja kali-kolviek prychodziła da ŭłady ŭ krainie ES. Akramia taho, Hrecyja — pravasłaŭnaja kraina, a asłableńnia Jeŭrasajuza dabivajecca Kreml. 

Varta adznačyć, što skład urada Cyprasa daje nadzieju, što Hrecyja zachavaje prajeŭrapiejski vybar. Klučavyja pasady ŭ MZS, Minfinie i Minabarony zaniali prajeŭrapiejskija dziejačy.

• 0
• 0
• 0
• 0
• 0
• 0
• 0
• 0