Chakiejnaha zaŭziatara i kiroŭcu asudzili za palityku. Padobna, što pa spravie Hajuna
Valancin Hlinski pracavaŭ kiroŭcam u Pinsku. Jon addany fanat chakiejnaha kłuba «Pinskija jastraby», adnaho z najlepšych junijorskich kłubaŭ krainy. Niadaŭna jaho asudzili za «sadziejničańnie ekstremizmu».
Valancinu Hlinskamu 39 hadoŭ. Jon rodam ź Pinska, dzie vučyŭsia ŭ himnazii №3, a paśla pastupiŭ u BNTU.
Valancin pracavaŭ u pinskim filijale «Handalpinsk», na Biełpošcie, a taksama piekaram u kampanijach «PaleśsiePradukt» i «Raduha-Śviatło». Apošnim časam mužčyna pracavaŭ u taksi «Jandeks Go» i kiroŭcam u adnoj ź miascovych firmaŭ.
U Valancina jość niepaŭnaletniaja dačka.
Pa-za pracaj mužčyna byŭ fanatam chakiejnaha kłuba «Jastraby», jaki ŭ 2022‑m staŭ farm-kłubam salihorskaha «Šachciora». Jon naviedvaŭ ich chatnija i vyjaznyja matčy.
Jahony ŭlublony kłub maje niakiepskija dasiahnieńni. «Jastraby» stali čempijonami Vyšejšaj chakiejnaj lihi (lihi farm-kłubaŭ) u siezonie 2022/2023, brali bronzu ŭ 2023/2024 hadach, srebra ŭ siezonie 2024/2025 i vyjhrali Kubak Cypłakova ŭ 2022‑m i 2025‑m hadach.
Akramia chakieja, mužčyna cikaviŭsia aŭtasportam, u pryvatnaści Formułaj-1.
Valancina Hlinskaha zatrymali naprykancy minułaha hoda. Niadaŭna jaho asudzili pavodle častak 1 i 2 artykuła 361‑4 KK (sadziejničańnie ekstremisckaj dziejnaści). Pieraśled moh być źviazany sa spravaj Hajuna.
Mužčynu prysudzili chatniuju chimiju.
***
«Biełaruski Hajun» — manitorynhavy OSINT-prajekt, jaki byŭ stvorany ŭ 2022 hodzie, kali Rasija praź Biełaruś napała na Ukrainu. Prajekt adsočvaŭ vajennuju aktyŭnaść rasijskich i biełaruskich vojskaŭ, abapirajučysia na infarmacyju ad biełarusaŭ. Kaardynavała jaho dziejnaść hrupa aktyvistaŭ na čale z Antonam Matolkam.
Sprava Hajuna pačałasia paśla taho, jak siłaviki zatrymali aktyvistku, jakaja niekalki hadoŭ žyła ŭ Biełarusi ŭ padpolli. U jaje mabilniku znajšli spasyłku na dałučeńnie ŭ bot Hajuna, jakuju joj dasyłali ŭ samym pačatku isnavańnia prajekta. Fatalnaja pamyłka była ŭ tym, što spasyłka była biesterminovaja. A tamu siłaviki zmahli padklučycca da bota i vypampavać adtul usiu infarmacyju. Jany atrymali paviedamleńni akaŭntaŭ, jakija pisali ŭ bot, a taksama ichnija ID i imiony karystalnikaŭ.
Samu ž dziaŭčynu zatrymali praz toje, što jana była vymušanaja źviarnucca ŭ dziaržaŭnyja struktury, da miedykaŭ. U jaje chłopca, jaki chavaŭsia razam ź joj, pačalisia mocnyja prablemy sa zdaroŭjem na fonie aryštu jaho baćki.
Zasnavalnik Hajuna Anton Matolka adrazu paśla ŭzłomu patłumačyŭ, jak adbyłasia ŭciečka infarmacyi, i abviaściŭ zakryćcio prajekta.
«Naša Niva» — bastyjon biełaruščyny
PADTRYMAĆCiapier čytajuć
Vychadcy z «Alfa» KDB Biełarusi zajmajuć kiraŭničyja pasady ŭ novym rasijskim supiersakretnym śpiecpadraździaleńni, pryznačanym dla zabojstvaŭ za miažoju27
Kamientary