Što novaha možna skazać pra źniknieńnie Anžaliki Mielnikavaj? U efiry «Ranicy z «Biełsatam» hetyja pytańni zadali kiraŭniku Nacyjanalnaha antykryzisnaha ŭpraŭleńnia Paŭłu Łatušku. Jon apraŭdvaje dziejańni Mielnikavaj i ličyć jaje paciarpiełaj — mahčyma, vykradzienaj.
Pavieł Łatuška raskazaŭ, što atrymaŭ ad Departamientu baraćby z arhanizavanaj złačynnaściu Nacyjanalnaj prakuratury Polščy adkaz nakont taho, jak prasoŭvajecca sprava z rasśledavańniem źniknieńnia Anžaliki Mielnikavaj.
List źmiaščaje zapeŭnivańnie, što i prakuratura, i Ahienctva ŭnutranaj biaśpieki Polščy ažyćciaŭlajuć usie dziejańni, nieabchodnyja dla taho, kab vyznačyć, dzie ciapier Anžalika Mielnikava, i vyśvietlić pryčyny jejnaha raptoŭnaha spynieńnia kantaktaŭ ź blizkimi na terytoryi Polščy.
«Anžalika Mielnikava jość paciarpiełaj asobaj u hetaj situacyi, tamu našyja dziejańni skiravanyja na toje, kab apytać jaje nakont taho, što stała pryčynaj jejnaha vyjezdu z terytoryi Polščy i jakija dziejańni ŭ dačynieńni jaje ažyćciaŭlalisia pierad jejnym vyjezdam na terytoryju Polščy», — pracytavaŭ Łatuška list ad polskaj prakuratury.
Pavodle słoŭ palityka, prakuratura razhladaje Anžaliku Mielnikavu jak achviaru, jak pakryŭdžanuju asobu [paciarpiełuju — NN] u hetym kantekście i kaža, što jaje prymusili pakinuć terytoryju Polščy. Heta aficyjnaja viersija. Łatuška adznačyŭ, što heta adpaviadaje 130‑u artykułu Kryminalnaha kodeksu Polščy, jaki apisvaje situacyju naŭmysnaha hvałtoŭnaha pazbaŭleńnia svabody čałavieka.
Fakty ŭ abaronu Mielnikavaj
Pavodle Paŭła Łatuški, na siońnia, kab paźbiehnuć śpiekulacyj, treba razumieć niekalki faktaŭ pra dziejnaść Anžaliki Mielnikavaj. Jon adznačyŭ, što Mielnikava była ŭdzielnicaj dźviuch inicyjatyŭ — Narodnaha antykryzisnaha ŭpraŭleńnia i Kibierpartyzanaŭ, a taksama zajmała pasadu kiraŭnicy Kaardynacyjnaj rady biełaruskaj apazicyi.
Łatuška padkreśliŭ, što padčas jaje kiraŭnictva Kaardynacyjnaj radaj treba ŭličvać jejnyja publičnyja dziejańni. U jakaści prykładu jon pryvioŭ pasiadžeńnie, pryśviečanaje temie adkaznaści Alaksandra Łukašenki za złačynstvy suprać biełaruskaha naroda i Ukrainy, jakoje prachodziła ŭ studzieni 2025 hoda i było źviazanaje z temaj Mižnarodnaha kryminalnaha sudu.
Pavodle słoŭ Łatuški, hetaje pasiadžeńnie Kaardynacyjnaj rady prachodziła ŭ składanych umovach. Za dzień da jaho amierykanski bok spyniŭ finansavańnie, što pastaviła pad pahrozu praviadzieńnie adkrytych słuchańniaŭ i mahło pryvieści da ich zryvu.
«Ja pamiataju, kali jana mnie telefanavała faktyčna nočču, dzieści kala 12-j, i prosta płakała, bo jana nie viedała, što rabić, bo treba było paćviardžać kvitki, hateli, arendu i hetak dalej. Ale jana skazała: «Ja zapłaču svaimi hrašyma». I ja viedaju dakładna, što častku srodkaŭ na hetaje pasiedžańnie jana vydatkoŭvała sa svaich hrošaj. A hetaje pasiedžańnie pryniało rezalucyju ab adkaznaści Łukašenki ŭ tym liku za złačynstvy suprać čałaviečnaści, čym zajmajecca zaraz Mižnarodny kryminalny sud. I hetaja rezalucyja pajšła va ŭsie jeŭrapiejskija parłamienty krain — členaŭ Mižnarodnaha kryminalnaha sudu», — kaža Pavieł Łatuška.
Vystupleńnie na PARIE
Druhi fakt, jaki zhadaŭ palityk pra Anžaliku Mielnikavu, adbyvaŭsia padčas vystupleńnia na Parłamienckaj asamblei Rady Jeŭropy.
«Pieršy raz našaja delehacyja siadzić na palityčnym kamitecie, i jana ŭ mianie pytajecca: «Pavieł Paŭłavič, ci voś tut mnie ŭnieści papraŭku?» Tam tyčyłasia pryznańnia Kaardynacyjnaj rady. Ja kažu: «Anžalika, ščyra, nie viedaju, my pieršy raz udzielničajem: ci možna zaraz padniać ruku i skazać słova?». Jana nie padniała ruku, heta była maja vina. Jana pabiehła da deputataŭ, jakija źjaŭlajucca ŭžo daŭno tam členami PARIE, i paźniej jana ŭniesła hetuju papraŭku, sabraŭšy podpisy. I hetaja papraŭka prajšła», — zhadvaje palityk.
Jon dadaŭ, što, vystupajučy na plenarnym pasiadžeńni Parłamienckaj asamblei Rady Jeŭropy, Mielnikava zaklikała nie pryznavać vybary 2025 hoda, pryznać Kaardynacyjnuju radu, Abjadnany pierachodny kabiniet i Ofis Cichanoŭskaj jak instytuty demakratyčnych sił i pryciahnuć Łukašenku da adkaznaści. I heta trapiła ŭ finalnuju rezalucyju.
Akramia taho, Łatuška nahadaŭ, što Mielnikava źjaŭlałasia kiraŭnicaj fundacyi Kibierpartyzanaŭ, a heta arhanizacyja, jakaja naniesła škodu ŭzbrojenym siłam Rasijskaj Fiederacyi i Respubliki Biełaruś. Jana taksama ŭvachodziła ŭ skład NAU, jakoje zajmałasia sankcyjami i mižnarodnaj adkaznaściu režymu Łukašenki. Usio heta mahło vyklikać cikavaść da jaje z boku śpiecsłužbaŭ.
Łatuška taksama nahadaŭ, što Mielnikava prachodziła pravierku takich arhanizacyj, jak BELPOL i Kibierpartyzany, a pakolki źjaŭlałasia hramadziankaj Polščy, to praviarałasia jašče i polskaj ABW, Ministerstvam unutranych spraŭ, Pamiežnaj słužbaj.
«Heta dakładnyja fakty. Usio inšaje — śpiekulacyi. Skazać, što takoje moh rabić čałaviek jaki pracuje na śpiecsłužby? Možna. Ale naŭrad ci: zašmat škody było naniesiena tamu ž režymu Łukašenki. Mahła jana trapić u hetuju miadovuju pastku? Mahła. Tearetyčna jany [śpiecsłužby] mahli [jaje zładzić]. U nas była infarmacyja taksama, što jaje zmušali ažyćciavić kryminalnyja dziejańni, skažu tak, u adnosinach da členaŭ kamandy Narodnaha antykryzisnaha ŭpraŭleńnia. I jaje pačali prymušać. I heta mahło stać pryčynaj jaje źniknieńnia», — raskazaŭ Łatuška, adznačyŭšy padčas razmovy, što Mielnikava admoviłasia ad realizacyi takoj «prapanovy» śpiecsłužbaŭ.
Pavieł Łatuška taksama padkreśliŭ, što siońnia miescaznachodžańnie Anžaliki Mielnikavaj nie ŭstanoŭlenaje.
«Ja mahu skazać niepracesualna toje, što ja atrymaŭ infarmacyju, što dzieci znachodziacca na terytoryi Biełarusi. Dzie jana znachodzicca — miescaznachodžańnie nie ŭstalavanaje, i viedaju taksama niepracesualna, što jana nie znachodzicca ź dziećmi», — raskazaŭ padrabiaznaści palityk.
***
Śpikierka Kaardynacyjnaj rady Anžalika Mielnikava pakinuła terytoryju Polščy i Jeŭrasajuza 26 lutaha 2025 hoda i palacieła ŭ Łondan. Pavodle rasśledavalnikaŭ, za dzień da vyletu jana zareziervavała numar u piacizorkavym hateli na Šry-Łancy, dzie ŭžo byvała raniej. Z 28 lutaha da 7 sakavika Mielnikava žyła ŭ tym hateli ź dziećmi. 7 sakavika Mielnikava ź dziećmi palacieła ŭ Dubaj, tam jaje śled hublajecca. 25 sakavika jana pierastała vychodzić na suviaź.
Kaardynacyjnaja rada zajaŭlała, što 13 sakavika ź jaje akaŭnta byli spampavanyja dakumienty, jakija tyčacca pracy arhanizacyi.
U tym ža miesiacy, pavodle źviestak «Kibierpartyzanaŭ», Mielnikava pieraviała na asabisty rachunak bolš za 150 tysiač dalaraŭ sa srodkaŭ fondu Białoruś Liberty. Viadoma taksama, što pierad źniknieńniem jana lotała na Kubu i ŭ Šry-Łanku razam z Alaksiejem Łabiejevym, supracoŭnikam łukašenkaŭskich śpiecsłužbaŭ.
Što aznačaje źjaŭleńnie vychadcaŭ ź Biełarusi ŭ rasijskim śpiecpadraździaleńni dla asabliva važnych apieracyj i tajnych zabojstvaŭ?20
Što aznačaje źjaŭleńnie vychadcaŭ ź Biełarusi ŭ rasijskim śpiecpadraździaleńni dla asabliva važnych apieracyj i tajnych zabojstvaŭ?
Za dva dni na vyratavalny ŭkoł Ksiušy z Mahilova sabrali rekordnyja $300 tysiač. Mama zdała jaje ŭ dzietdom, a čužyja ludzi bjucca za žyćcio dziciaci44
Za dva dni na vyratavalny ŭkoł Ksiušy z Mahilova sabrali rekordnyja $300 tysiač. Mama zdała jaje ŭ dzietdom, a čužyja ludzi bjucca za žyćcio dziciaci4
Vychadcy z «Alfa» KDB Biełarusi zajmajuć kiraŭničyja pasady ŭ novym rasijskim supiersakretnym śpiecpadraździaleńni, pryznačanym dla zabojstvaŭ za miažoju3333
Kamientary