U Łatvii narakajuć, što Minsk zachapiŭ ich radyjočastatu — ciapier tam kruciać prapahandu
Žychary łatvijskaha pamiežža raptam pačali čuć pa radyjo vystupy Łukašenki i biełaruskuju prapahandu. Akazałasia, što na kolišniaj častacie ruskamoŭnaha łatvijskaha radyjo ciapier viaščaje radyjo «Biełaruś».
Mižnarodnaje radyjo «Biełaruś» pracuje z 1962 hoda, a na Brasłaŭščynie — z 2007-ha. Šmat hadoŭ hetaje radyjo viaščała ŭ Brasłavie na častacie 106,6: možna znajści danyja pra toje, što jašče niekalki hadoŭ tamu taja častata była aktualnaja.
Ciapier, adnak, na sajcie radyjo paznačanaja inšaja častata dla Brasłava — 107,7. Za niekalki dziasiatkaŭ kiłamietraŭ ad Brasłava, u rajonie łatvijskaha Daŭhaŭpiłsa (Dźvinska), raniej tuju častatu zajmała inšaje radyjo — Łatvijskaje radyjo 4 «Domskaja płošča». Heta ruskamoŭnaje radyjo, jakoje ciapier viaščaje tolki ŭ ličbavym farmacie: ciapier chołdynh LSM, da jakoha naležyć radyjo, pakidaje kantent na zamiežnych movach tolki ŭ siecivie.
Takim čynam, z 1 studzienia 2026 hoda toje radyjo bolš nie pracuje, i ŭ Ryzie na toj častacie ničoha nie pačuješ. A voś u rajonie Daŭhaŭpiłsa, la biełaruskaj miažy, ciapier možna čuć radyjo «Biełaruś». Tam i raniej atrymlivałasia łavić radyjo z Brasłaŭščyny, voś tolki raniej na toj častacie viaščaŭ kanał «Kultura» Biełaruskaha radyjo. A 4 lutaha na tuju častatu pieraviali radyjo «Biełaruś» z zusim inšym kantentam.
Samo radyjo pracuje na niekalkich movach: akramia biełaruskaj i ruskaj, jość viaščańnie jašče na siami zamiežnych movach, u tym liku polskaj i anhlijskaj. Ale, pavodle sajta radyjo «Biełaruś», u Brasłavie jano maje mienavita ruskamoŭnaje viaščańnie.
Što ž davodzicca słuchać žycharam Daŭhaŭpiłsa? Naprykład, u svaim anłajn-viaščańni dla Litvy i Łatvii radyjo raskazvała pra Forum dobrasusiedstva — skandalnuju litoŭskuju arhanizacyju, likvidavanuju ŭ 2023‑m za «padrychtoŭku špijanaža na karyść Rasii». A łatvijski žurnalist, jaki złaviŭ toje radyjo ŭ Daŭhaŭpiłsie, pačuŭ vystupy Łukašenki, abmierkavańni piedafilii i kamientaryi pra litoŭcaŭ.
U adnym z telehram-kanałaŭ biełaruskaj prapahandy namiaknuli, što źmiena častaty była nievypadkovaj: «I što samaje cikavaje, radyjo «Biełaruś» hučyć vielmi dobra la dumy Daŭhaŭpiłsa».
Nie ŭsie, adnak, zhodnyja z tym, što havorka idzie mienavita pra zachop častaty. U łatvijskim saviecie pa elektronnych ŚMI kažuć, što raniej u Daŭhaŭpiłsie «Domskaja płošča» viaščała na častacie 88,7. Ciapier ža, kali jaho niama ni na jakich častotach, sihnał biełaruskaha radyjo prosta moža prachodzić dalej pa terytoryi Łatvii i prymacca bližej da Ryhi.
Vyhladaje, što šmat chto z žycharoŭ łatvijskaha pamiežža nie admoviŭsia b ad ruskamoŭnaha miedyja. Pa danych pierapisu nasielnictva 2021 hoda, tolki 20,7% žycharoŭ Daŭhaŭpiłsa adnosiać siabie da łatyšoŭ.
«Naša Niva» — bastyjon biełaruščyny
PADTRYMAĆ
Kamientary