Sud pastanaviŭ viarnuć maci dziaciej, jakija byli vyviezienyja baćkam u Łuhansk
Bolš za paŭhoda biełaruska Volha zmahałasia za toje, kab viarnuć synoŭ na radzimu. Minułym letam były muž vyviez chłopčykaŭ u Łuhansk i źmianiŭ im hramadzianstva na rasijskaje.
Volha Šabajeva ŭžo niekalki miesiacaŭ zmahajecca za svaich dziaciej. Jaje były muž — ukrainiec paśla razvodu zabraŭ synoŭ u Łuhansk, źmianiŭ im hramadzianstva i nie źbirajecca addavać maci.
Svaju viersiju padziej padzialiŭsia i Alaksiej. Jon upeŭnieny, što syny pavinny žyć ź im. Volha praciahvała zmahacca za svaich chłopčykaŭ. Jana damahłasia, kab sud pieranieśli ŭ Rastoŭ-na-Donie. Mienavita tam razhladałasia sprava ŭ ramkach Haahskaj kanviencyi ab hramadzianska-pravavych aśpiektach mižnarodnaha vykradańnia dziaciej. Pavodle jaje, dzicia, niezakonna vyviezienaje abo ŭtrymlivanaje adnym z baćkoŭ u inšaj dziaržavie-ŭdzielnicy, pavinna być jak maha chutčej viernuta na radzimu.
Niemałuju rolu ŭ hetym pytańni adyhrała MZS, jakoj udałosia naładzić suviazi z rasijskim bokam.
U piatnicu, 13 sakavika, adbyłosia čarhovaje pasiadžeńnie suda. Jak usio prajšło, Volha raskazała Tochka.by.
Rašeńnie pryniata
Kali čarhovaje pasiadžeńnie suda było pryznačana na 13 sakavika, Volha adrazu vyrašyła, što heta dobry znak. Bo ŭ piatnicu ŭ jaje dzień naradžeńnia.
«Heta najlepšy padarunak! Sud pryniaŭ rašeńnie na maju karyść! Dzietak pavinny viarnuć mnie. Ja ŭžo napłakałasia, nie mahu pavieryć», — nie moža strymać emocyj Volha.
Jana zajaviła, što pasiadžeńnie doŭžyłasia dźvie hadziny. Sudździa była davoli strohaj, patrabavała havaryć pra byłoha muža tolki pa sutnaści i prasiła pradastavić dokaz na kožnaje jaho abvinavačańnie.
«Na hetym u jaho ŭsio razvaliłasia. Usio było vielmi stroha. Jon skazaŭ, što abaviazkova budzie padavać apielacyju. Ź jaho boku heta prosta sproba zaciahnuć terminy. Ale ja rada, što sprava ŭžo zrušyłasia», — kaža biełaruska.
Što dalej?
Zaraz Volha pieražyvaje, što jaje były muž moža pasprabavać schavacca, kab jašče bolš zaciahnuć terminy. U mužčyny zaraz jość 10 dzion, kab abskardzić hetaje rašeńnie.
«Ja dumaju, jon prosta šukaje niejkija varyjanty dla manieŭru. Pavodle maich padlikaŭ, pa ŭsich terminach sprava pavinna zaviaršycca prykładna ŭ mai. Spadziajusia, što nieŭzabavie my z chłopčykami budziem razam», — kaža Volha.
Paśla abskardžańnia va ŭsich vyšejšych instancyjach baćka abaviazany pieradać dziaciej maci na praciahu 15 dzion.
Ciapier čytajuć
Zahnuŭsia biznes člena chakiejnaj kamandy Łukašenki, jaki abiacaŭ pabudavać łyžny maniež za Viarchoŭnym sudom uzamien na łasyja ŭčastki1
Kamientary