Ukraina ŭzmacniła achovu miažy ź Biełaruśsiu ŭ čakańni dyviersantaŭ
Siońnia spaŭniajecca hod z času sutyčak u Adesie 2 maja 2014 hoda.
Na praciahu majskich śviataŭ u punktach propusku budzie ažyćciaŭlacca ŭzmocnieny pamiežny kantrol, paviedamlajuć ukrainskija ŚMI. Takija zachady skiravanyja na spynieńnie sprob pierasiačeńnia miažy terarystami i niezakonnaha pieramiaščeńnia praź jaje zbroi.
U ramkach dadatkovych časovych režymnych abmiežavańniaŭ, uviedzienych letaś, va ŭsich kantralavanych pamiežnych rajonach zabaraniajecca: pražyvańnie ŭ pamiežnaj pałasie hramadzian Rasijskaj Fiederacyi, jakija nie majuć dazvołu na pastajannaje pražyvańnie na terytoryi Ukrainy, vykarystańnie ŭ transpartnych srodkach radyjostancyj, akramia śpiecyjalnaha transpartu, ruch transpartnych srodkaŭ na tych darohach, što viaduć ad nasielenych punktaŭ da dziaržaŭnaj miažy, na jakich niama pamiežnych pierachodaŭ (akramia sielskahaspadarčaj techniki, jakaja pravodzić raboty), spynieńnie transpartnych srodkaŭ na ŭzbočynach daroh na učastkach miascovaści pamiž dziaržaŭnaj miažoj i punktami propusku.
Ukraina baicca, što rasijskija dyviersanty mohuć spravakavać kryvavyja sutyčki, jak letaś u Charkavie i Adesie.
U Adesie 2 maja 2014 hoda adbyłasia strašnaja trahiedyja. Tady rasijskija siły sprabavali arhanizavać tam Adeskuju Narodnuju Respubliku pa ŭzory DNR i ŁNR. Pavodle ich płana, biesparadki pavinny byli pačacca 1 maja i pryvieści da zachopu horada dyviersijnymi hrupami 9 Maja. Rasija raźličvała takim čynam zachapić uvieś poŭdzień Ukrainy. Siły pravaparadku byli paralizavanyja abo padkuplenyja. Tady adpor dyviersantam dali nacyjanalnyja arhanizacyi i futbolnyja fanaty horada. U vyniku sutyčak zahinuła 48 čałaviek, zhareŭ zachopleny prarasijskimi bajevikami Pałac prafsajuzaŭ i byŭ razhromleny ich namiotavy łahier.
Tahačasny načalnik milicyi Adesy, jaki, imavierna, udzielničaŭ u antyŭkrainskaj zmovie, chavajecca ŭ Rasii.
Kamientary