Źmicier Daškievič abviarhaje infarmacyju BT pra kanał viarboŭki najomnikaŭ: «Achinieja»
13 žniŭnia telekanał Biełaruś 1 paviedamiŭ, što biełaruskija specsłužby vykryli kanał viarboŭki najomnikaŭ dla ŭdziełu ŭ bajavych dziejańniach na terytoryi Ŭkrainy.
Arhanizataram kanału nazyvajecca ŭkrainiec z pazyŭnym «Taras». Viarboŭka nibyta adbyvałasia praz sacyjalnyja sietki i viałasia siarod «maładych radykałaŭ, a taksama dušeŭna chvorych, biespracoŭnych, byłych kryminalnikaŭ i futbolnych fanataŭ».
Telekanał taksama paviedamiŭ, što infarmacyjnaje supravadžeńnie akazvali niekatoryja internet-resursy, a taksama arhanizacyja «Małady front», zarehistravanaja ŭ Čechii.
Sustaršynia «Maładoha Frontu» Źmicier Daškievič zajaŭlaje, što infarmacyja, ahučanaja na BT, nie adpaviadaje rečaisnaści:
«Ja nie hladžu nijakaj televizii, tym bolš biełaruskaj. Infarmacyja hetaja źjaŭlajecca poŭnaj achiniejaj. Kali b byli vyjaŭlenyja hrupoŭki i farmavańni, tym bolš (u siužecie — RS) zhadvajecca KDB i pamiežny kamitet, to byli b adpaviednyja kryminalnyja spravy ci chacia b dopyty. Ale ni mianie, ni, nakolki ja viedaju, inšych aktyvistaŭ ruchu nie vyklikali ni na dopyty, ni na razmovy.
Achinieja — sama sutnaść infarmacyi, što my, «Małady front», «kahości źbirajem». Jak i mnohija hramadzianie Biełarusi, my majem vyraznuju pazycyju pa ŭkrainskim kanflikcie. Rasieja — heta ahresar, jaki rana ci pozna atrymaje asudžeńnie na novym «niurnberskim trybunale». My nie źbirajem anijakuju armiju.
Jość ludzi, jakija vyrašyli vajavać, jak, naprykład, Eduard Łobaŭ. Ale heta asabistaje rašeńnie kožnaha čałavieka. Jak možna skazać «ty jedź, addaj žyćcio choć i za rodnuju dziaržavu, ale nie za svaju». Heta biazhłuzda i niepatrebna. Chto žadaje, toj samastojna prymaje takija rašeńni».
Pry kancy lipienia stała viadoma, što były palitviazień sustaršynia «Maładoha frontu» Eduard Łobaŭ vajuje va Ŭkrainie na baku ATA. «Kali my nie dapamožam Ukrainie zmahacca ŭ hetaj vajnie, to nastupnym nastupalnym etapam Rasiei moža akazacca Biełaruś», — kaža Eduard Łobaŭ u videazvarocie, jaki raźmieščany na kanale youtube u supołcy «Zhurtavańnie patryjotaŭ».
-
U mieduniviersitety sioleta budzie niedabor? Minzdaroŭja prakamientavała
-
Pradstaŭnik Uzbrojenych sił: Na vajskovuju adukacyju pastupajuć i chłopcy, jakija nabirajuć 400 bałaŭ z 400 mahčymych
-
Siarhiej byŭ u Połacku bieź miesca žycharstva. Majomaści nie mieŭ nijakaj, to syn praz sud vybivaŭ chacia b baćkaŭ vajskovy zarobak
Kamientary