Parašenka patrabuje ad siłavikoŭ nie spyniacca na Korbanu, Kałamojski nazyvaje pieraśled palityčnym

Ukrainski aliharch Ihar Kałamojski vykazaŭ mierkavańnie, što zatrymańnie jaho najbližejšaha paplečnika, eks-namieśnika ŭ časie hubiernatarstva ŭ Dnieprapiatroŭskaj vobłaści i lidera partyi «Ukrop» Hienadzia Korbana źviazana z «balučaj reakcyjaj na vysoki vynik partyi na miascovych vybarach».

Pra heta Kałomojski zajaviŭ ukrainskim ŚMI ŭ niadzielu ŭviečary.

Partyja «Ukrop» akazałasia ŭ liku lidaraŭ u Dnieprapiatroŭskaj vobłaści, nabirajučy stolki ž, kolki Apazicyjny błok, utvorany na ruinach Partyi rehijonaŭ. Akramia taho, jana atrymała 5—10% hałasoŭ u Adesie, na Vałyni i jašče niekatorych rehijonach. 

Taksama Kałamojski dadaŭ, što «Korban dziakujučy hetym dziejańniam staŭ palitykam nacyjanalnaha maštabu».

Kałamojski ŭkłaŭ va «Ukrop» značnyja finansavyja resursy, adnak vialikaha pośpiechu hetaja aliharchičnaja partyja biez ułasnaj ideałohii nie dabiłasia. Sam Korban atrymaŭ usiaho 2,6% hałasoŭ na vybarach mera Kijeva.

U svaju čarhu, prezident Ukrainy Piatro Parašenka zapatrabavaŭ ad siłavikoŭ nie spyniacca na Korbanu.

Pra heta Parašenka zajaviŭ u intervju ukrainskim telekanałach, jakoje vyjšła ŭ efir viečaram u niadzielu, 1 listapada.

«Ja padkreślivaju i nastojvaju, što rasśledavańnie pavinna adbyvacca maksimalna prazrysta i stvarać padstavy dla davieru z boku hramadstva», — zajaviŭ Parašenka.

Jon nahadaŭ, što niekalki tydniaŭ tamu, kali Viarchoŭnaja Rada zdymała niedatykalnaść z narodnych deputataŭ dla pryciahnieńnia ich da adkaznaści, jon paabiacaŭ, što «heta tolki pačatak».

«Na Korbanu nichto spyniacca nie budzie», — zajaviŭ Parašenka.

Prezident dadaŭ, što pracesy baraćby z karupcyjaj i rašučyja pracesy adnaŭleńnia zakonnaści «praciahvacca».

«U nas niama imunitetu ad rasśledavańnia, ad pryciahnieńnia da adkaznaści za karupcyjnyja złačynstvy ni ŭ koha — ni ad kamandy novaj ułady, dzie taksama pavinny być raspačatyja spravy, ni ad staroj ułady, dzie ŭsie vinavatyja pavinny być pryciahnutyja da adkaznaści», — dadaŭ Parašenka.

Jon padkreśliŭ, što kraina ŭ bližejšy čas pačuć novyja proźviščy tych, chto budzie pryciahnuty da adkaznaści.

«Dumaju, našy siłaviki lepš za mianie viedajuć, a ja nie dumaju, što prezident pavinien u heta ŭmiešvacca», — padsumavaŭ Parašenka.

Parašenku rašuča padtrymaŭ hubiernatar Adeskaj vobłaści Micheił Saakašvili. Jon nie raz i raniej abvinavačvaŭ Kałamojskaha ŭ abkradańni dziaržavy, manapalizacyi cełych śfieraŭ haspadarki i podkupie dziaržaŭnych čynoŭnikaŭ.

Ukrainski ŭrad biespaśpiachova sprabavaŭ prymusić padkantrolnuju Kałamojskamu «Ukrnaftu» vypłacić u biudžet pazyki.

U toj ža čas ukrainskaje hramadstva stavicca da ataki Parašenki na impieryju Kałamojskaha ź niedavieram. Jano baicca, što heta prosta razborki aliharchičnych hrupovak, vynikam jakich u svoj čas było źniavoleńnie Julii Cimašenki na zahad Viktara Janukoviča.

«Pamiž Parašenkam i Kałamojskim pačalisia razborki z pazicyi siły. Heta vyhladaje jak mižasabovyja razborki — adzin aliharch vyciaśniaje inšaha, zaručyŭšysia sakretnaj padtrymkaj Zachadu», — napisała ŭ svaim błohu ŭkrainskaja śpiavačka Rusłana.

Ukrainskaja dziaržava trapiła pad kantrol aliharchaŭ, źviazanych z palitykami, jašče ŭ 1990-ja i 2000-ja, pry Leanidu Kučmu. Aranžavaja revalucyja nie zdoleła istotna źmianić hetuju sistemu. Ukrainskija miljardery Achmietaŭ, Kałamojski, Pinčuk naležać da liku najbahaciejšych u Jeŭropie. Pry hetym pa VUP na dušu nasielnictva i pa siarednim zarobku Ukraina apuściłasia na samy niz u Jeŭropie.

Aliharchičny kantrol nad ekanomikaj vysmoktvaje resursy krainy.

Infrastruktura ŭ krainie pryjšła ŭ zaniapad, dziaržaŭnyja słužby dysfunkcyjanalnyja, ukrainskija siłavyja struktury akazalisia niebajazdatnyja, u vyniku čaho Rasija ŭ 2014—2015 akupavała terytoryi, dzie pražyvali 15% nasielnictva krainy i dzie znachodziacca vialikija pryrodnyja bahaćci.

Źmianić sistemu ŭ krainie niaprosta, bo praźmierny cisk na aliharžaŭ stvaraŭ niebiaśpieku, što jany pierakinucca na bok Rasii.

Da taho ž, sam Piatro Parašenka — vychadziec z hetaha asiaroddździa, a premjer Arsień Jacaniuk ciesna źviazany ź finansava-pramysłovymi kołami. U krainie vvielmi mała sapraŭdy niezaležnych ad vialikaha kapitału palitykaŭ. Usiomahutnaść hrašovych miaškoŭ tłumačyłasia tym, što jany kantralujuć najbolšyja telekanały i finansujuć niekatoryja siłavyja struktury.

Dealiharchizacyi patrabuje Zachad, ad finansavaj i palityčnaj dapamohi jakoha Kijeŭ ciapier zaležyć.

• 0
• 0
• 0
• 0
• 0
• 0
• 0
• 0