Z asudžanaha za špijanaž znajomaha Volhi Karač u turmie vymahali hrošy. A jon chvaliŭsia, što moža dastać ich u pasolstvie Biełarusi

U Litvie nieŭzabavie pačniecca razhlad spravy ab vymahalnictvie, achviaraj jakoha, mahčyma, staŭ Mantas Danielus — hramadzianin Litvy, asudžany za špijanaž na karyść Biełarusi i jaki ciapier adbyvaje pakarańnie ŭ turmie Pravieniš­kies. Abvinavačany ŭ vymahalnictvie — viadomy litoŭski spartsmien, šmatrazovy čempijon krainy pa kikboksinhu Rałandas Ahrba, jaki i sam užo siadzić — za papiaredniaje vymahalnictva i inšyja złačynstvy.

Danielus — infarmatar, jaki ŭ 2022‑2023 absłuhoŭvaŭ intaresy biełaruskaj prapahandystki Ksienii Lebiedzievaj, ciesna źviazanaj sa śpiecsłužbami. Jon uciraŭsia ŭ šerahi biełaruskich apazicyjnych arhanizacyj u Vilni, jak juryst kansultavaŭ arhanizacyju «Naš dom» Volhi Karač. Danielusu prysudzili 9 hadoŭ źniavoleńnia za špijanaž. Jon choča, kab jaho abmianiali ŭ Biełaruś.

46‑hadovy Ahrba — šmatrazovy čempijon Litvy pa kikboksinhu. Jon siadzić za vymahalnictva 5 tysiač jeŭra ŭ drobnaha pradprymalnika, a taksama za inšyja złačynstvy.

U žniŭni 2025 hoda adzin sa źniavolenych pieradaŭ Danielusu, što ź im choča paznajomicca Rałandas Ahrba. Sustreča prajšła pryjazna — Ahrba navat pačastavaŭ jaho ježaj, choć pa niefarmalnych turemnych praviłach heta było parušeńniem: Danielus naležyć da nižejšaj turemnaj «kasty», a Ahrba — da vyšejšaj.

Kanflikt uźnik paźniej. Paśla płanavaha pieratrusu ŭ pakoi znajšli schavanyja telefony, i adzin ź ludziej Ahrby abvinavaciŭ Danielusa ŭ tym, što toj nibyta zdaŭ nahladčykam schovanku.

Praź niekalki dzion Ahrba zapatrabavaŭ ad Danielusa 1500 jeŭra — sumu, roŭnuju canie troch telefonaŭ u turemnych umovach.

Atrymaŭšy sankcyju suda, supracoŭniki turmy pačali prasłuchoŭć razmovy źniavolenych. U zapisach Ahrba i jaho blizkija abvinavačvali Danielusa ŭ supracoŭnictvie z administracyjaj i pahražali, što jaho pieraviaduć da «pieŭniaŭ» — heta turemny eŭfiemizm dla najnižejšaj kasty.

Danielus, u jakoha niama rodnych, zajaviŭ, što hrošy moža dastać praz pasolstva Biełarusi, — i, adčuŭšy pahrozu žyćciu, źviarnuŭsia da achoŭnikaŭ.

Ahrba vinavatym siabie nie pryznaje. Achoŭnikam jon zajaviŭ: «Pra hetaha čałavieka ja viedaju tolki z presy — što jon asudžany za špijanaž na karyść Biełarusi, tamu mnie jak litoŭskamu patryjotu soramna i nieprymalna mieć spravy z takim čałaviekam. Pry hetym, pavodle prakuratury, mienavita Ahrba sistematyčna psichałahična cisnuŭ na Danielusa, vyznačaŭ terminy pieradačy hrošaj praz trecich asob i patrabavaŭ jašče i kupić jamu mabilny telefon.

Paśla vykryćcia incydentu Danielusa pieraviali ŭ inšuju turmu, kab harantavać jamu biaśpieku.

• 0
• 0
• 5
• 3
• 2
• 0
• 0
• 0