Maryna Zołatava: U palitźniavolenaj Taćciany Kołas vyjavili rak. Heta nie prosta drennaja navina, heta žudasnaja navina

«U palitźniavolenaj Taćciany Kołas vyjavili rak. Heta nie prosta drennaja navina. Heta žudasnaja navina, bo jana znachodzicca ŭ kałonii.

Ščyra skažu: asabista mnie amal nie davodziłasia sutykacca z turemnaj miedycynaj. Ale za toj čas, pakul ja była ŭ kałonii (a praviała ja tam dva hady i čatyry miesiacy), prynamsi dźvie žančyny pamierli ad raku. Adna — starejšaja, z majho atrada, asudžanaja pa ekanamičnym artykule. Druhaja — maładziejšaja, pa artykule 328. Zrešty, artykuł nie maje nijakaha značeńnia. Važna toje, što heta byli ludzi, žančyny.

U palitźniavolenaj Hanny Kandracienki rak taksama dyjahnastavali ŭžo ŭ kałonii. Jaje navat vazili na lačeńnie ŭ ankałahičny dyspansier u Homieli. Jana pamierła praź siem miesiacaŭ paśla vyzvaleńnia.

I ja dumaju: a na voli ŭ ich było b bolš šancaŭ? Biezumoŭna. Prynamsi, ich žyćcio i zdaroŭje ŭ značna bolšaj stupieni zaležali b ad ich samich, a nie ad mašyny, kanvoju, najaŭnaści miescaŭ u «toj adzinaj balnicy», hrafika «taho adzinaha śpiecyjalista», jaki letam całkam moža być u adpačynku, dostupu da lekaŭ i šmat čaho inšaha.

Dla abśledavańnia i lačeńnia Taćcianu Kołas pavinny pieravieści ŭ balnicu, ale zrabić heta čamuści płanujuć tolki praź niekalki miesiacaŭ.

Usie vy, viadoma, pamiatajecie, jak u 2020 hodzie Vieranika Capkała raskazvała pra svaju maci. U dačynieńni da jaje raspačali kryminalnuju spravu, a paźniej u jaje vyjavili rak. Vieranika, naviedaŭšy maci ŭ balnicy, była šakavanaja: taja była prykavanaja kajdankami da batarei.

Tady ja dumała: nie moža być. Ale ciapier mahu skazać — navat nie sumniavajciesia.

Asudžanych, jakich z kałonii pryvoziać u haradskija balnicy, zaŭsiody prykoŭvajuć kajdankami da łožka. Pobač ź imi ŭvieś čas znachodzicca kanvoj.

I jašče adna reč zastajecca dla mianie pa-za miežami razumieńnia. Čamu ŭ tych troch vypadkach, pra jakija ja zhadała, žančynam nie źmianili vid pakarańnia? Čamu ich nielha było adpuścić dadomu?

Ja žadaju Taćcianie zdaroŭja i sił. I jak maha chutčej sustrecca z rodnymi. Vieru, što mienavita tady jana abaviazkova pojdzie na papraŭku», — napisała Maryna Zołatava.

***

Taćciana Kołas pracavała ŭ Minharvykankamie i mieła dostup da asabistych danych siłavikoŭ, jakija potym pieradała telehram-kanału «Čornaja kniha Biełarusi».

U červieni 2022 hoda siłaviki paviedamili, što žančyna nibyta samastojna pryjšła «zdavacca» ŭ HUBAZiK. Da suda Taćcianu pakinuli na voli, pad chatnim aryštam.

U vieraśni 2022 hoda jaje asudzili da šaści z pałovaj hadoŭ pavodle čatyroch artykułaŭ Kryminalnaha kodeksa:

• č. 3 art. 203‑1 — niezakonnyja dziejańni ŭ dačynieńni da infarmacyi ab pryvatnym žyćci i piersanalnych dadzienych;
• č. 3 art. 130 — raspalvańnie rasavaj, nacyjanalnaj, relihijnaj albo inšaj sacyjalnaj varožaści abo varožaści;
• č. 3 art. 352 — niepravamiernaje zavałodvańnie kamputarnaj infarmacyjaj;
• č. 3 art. 426 — pieravyšeńnie ŭłady abo słužbovych paŭnamoctvaŭ.

• 0
• 0
• 0
• 0
• 0
• 0
• 0
• 0