Minibieśpiłotniki raspracoŭki rasijskaj karparacyi «Irkut» prapanujucca ciapier na ekspart Biełaruśsiu pad miascovym brendam «Bierkut», śćviardžaje rasijskaje RIA «Naviny» sa spasyłkaj na krynicu ŭ abaronna-pramysłovym kompleksie Rasii.
Kiraŭnictva «Biełaruskaha 558 avijaramontnaha zavoda» zajaviła jašče ŭ 2015 hodzie, što na pradpryjemstvie asvojena sieryjnaja vytvorčaść kompleksaŭ ź bieśpiłotnymi latalnymi aparatami «Bierkut-1» i «Bierkut-2» i razhladajecca mahčymaść pastavak ich dla Minabarony i inšych siłavych struktur Biełarusi.
«Ciapier, akramia ŭnutranaha rynku, biełaruski bok pačaŭ aktyŭna prapanoŭvać dadzienyja kompleksy zamiežnym zakazčykam», — paviedamlaje rasijskaje ahienctva.
Jano śćviardžaje, što nasamreč dadzienyja kompleksy byli raspracavany rasijskaj navukova-vytvorčaj karparacyjaj «Irkut», u liniejcy jakoj nasili nazvy «Irkut-3» i «Irkut-10».
Pahadnieńnie ź biełaruskim bokam pa prodažy dźviuch bieśpiłotnych sistem małoha kłasa zaklučała kampanija «Irkut-Inžynirynh». Rasiejcy čakali, što bieśpiłotniki buduć vypuskacca na ŭmovach licenzii i vykarystoŭvacca tolki dla ŭnutranaha biełaruskaha rynku.
Biełarusy zajaŭlajuć, što minibieśpiłotniki «Bierkut» byli raspracavany AAT «AHAT — Sistemy kiravańnia» (Minsk) i AAT «558-y avijacyjny ramontny zavod» (Baranavičy).
«Bierkut-1» — taktyčny BAK blizkaha dziejańnia, pryznačany dla viadzieńnia optyka-elektronnaj vyviedki miascovaści i vydačy źviestak celeŭkazańnia ahniavym srodkach motastrałkovych padraździaleńniaŭ i padraździaleńniaŭ sił śpiecyjalnych apieracyj. U realnym maštabie času jon zabiaśpiečvaje manitorynh miascovaści, vyjaŭleńnie i apaznavańnie naziemnych (nadvodnych) abjektaŭ i vydaču ich kaardynat.
«Bierkut-2» vyrašaje anałahičnyja zadačy ŭ intaresach motastrałkovych padraździaleńniaŭ i padraździaleńniaŭ rakietnych vojskaŭ i artyleryi.
Uźlotnaja masa «Bierkuta-1» — 15 kh, dalokaść palotu z karysnaj nahruzkaj u aŭtamatyčnym režymie — da 15 km. Bieśpiłotnik moža nabirać vyšyniu da 1000 m. Jaho krejsierskaja chutkaść — 50—80 km/h, praciahłaść palotu — da 90 chvilin. Uźlot — «z ruki», pasadka — na parašucie.
U «Bierkuta-2» uźlotnaja masa — da 50 kh, dalokaść palotu z karysnaj nahruzkaj u aŭtamatyčnym režymie — da 35 km, vyšynia — da 3000 m, krejsierskaja chutkaść — 80—100 km/h, praciahłaść palotu — da 120 chvił. Dla ŭźlotu hetaha BŁA vykarystoŭvajecca katapulta, dla pasadki — parašut, paviedamlali Naviny.by.
Karysnaj nahruzkaj dla abodvuch aparataŭ mohuć być moduli troch typaŭ: fatahrafičnaj, infračyrvonaj abo televizijnaj vyviedki. Dakładnaść vyznačeńnia kaardynataŭ mišeni składaje nie mienš za 50 m, adroźnivalnaja zdolnaść — 0,5 m.
Ciapier čytajuć
Advakat Kanavałava, rasstralanaha za terakt u mietro, upieršyniu raskazaŭ, što adbyvałasia padčas śledstva75
Kamientary