Na samicie G20 u Kitai Abamu sustreli pstryčkaj u aeraporcie, ale dvuchbakovyja pieramovy mohuć dać značnyja vyniki
Prezidentu ZŠA Baraku Abamu nie padali trap da hałoŭnaha vychadu z samalota Air Force One, i jamu daviałosia vychodzić praz zadni prachod, u chvaście, biez uračystaha čyrvonaha dyvana.
Kitajskija ŭłady tłumačać heta vypadkovaściu — amierykancy prasili kiroŭcu trapa, jaki b razumieŭ pa-anhlijsku. Kitajcy zajavili, što takoha nie majuć, i prapanavali prystavić pierakładčyka.
Adnak dypłamaty, jakija pracavali ŭ Kitai, kažuć, što heta nie mahło być vypadkovaściu ŭ krainie, dzie pytańni rytuału pradumvajucca da drabnicy.
Kiraŭniki inšych krain «Vialikaj dvaccatki» — Indyi, Aŭstralii, Vialikabrytanii, Turcyi, Rasii dy inšych — spuskalisia sa svaich samalotaŭ pa čyrvonym dyvanie.
Na dumku ekśpiertaŭ, hetaje drobnaje paskudstva amierykancam było zadumana na radaść unutranaj kitajskaj aŭdytoryi: my ŭkazvajem Amierycy, jak i što rabić, my tut haspadary.
Adnačasova ŭ aeraporcie adbyłosia niekalki sutyčak miž kitajskimi i amierykanskimi čynoŭnikami i žurnalistami. Kitajski dypłamat nakryčaŭ na Sjuzan Rajs, pamočnicu Abamy pa nacyjanalnaj biaśpiecy, kali jana zajšła za rysu prachodu ad samalota da aŭtamabilaŭ kartežu.
Adkazvajučy na pytańni žurnalistaŭ, Abama pastaraŭsia abyści dalikatnyja momanty, zasiarodziŭšy ŭvahu na vynikach, jakija moža dać samit. Jon nazvaŭ pieramovy ź Si Czińpiniem «nadzvyčaj praduktyŭnymi».
Sustreča Vialikaj dvaccatki daje mahčymaść suśvietnym lidaram sustrecca i abmierkavać samyja roznyja pytańni.
Novaja premjer-ministarka Vialikabrytanii Tereza Mej upieršyniu sustrełasia z Barakam Abamam i Uładzimiram Pucinym.
Abama i Mej u svajoj zajavie pa vynikach sustrečy padkreślili namier i nadalej supraćstajać ahresii Rasii va Ukrainie.
Kanclerka Niamieččyny Anhieła Mierkiel praviała pieramovy z prezidentam Turcyi Redžepam Taipam Erdahanam. Naziralniki adznačajuć strymany ton pieramovaŭ, niahledziačy na časam naciahnutyja adnosiny miž Turcyjaj i Jeŭropaj apošnimi časami.
Notki napružanaści, zatoje, hučali na sustrečach miž kiraŭnictvam Kitaja i krainami Azijacka-Cichaakijanskaha rehijona, u tym liku Aŭstralii.
ZŠA i Kitaj ratyfikavali damovu ab baraćbie z paciapleńniem klimatu — Barak Abama ličyć hetuju suśvietnuju damovu vialikim zdabytkam svajho prezidenctva.
Narešcie, nie vyklučana, što ZŠA i Rasija padpišuć damovu ab zamireńni ŭ Siryi. Praŭda, usie raniejšyja takija damoŭlenaści ŭrešcie nie pracavali.
Samit prachodzić u Chańčžou — 7-miljonnym kitajskim horadzie na ŭźbiarežžy.
Kamientary