Prezident Paŭdniovaj Karei Li Čže Mion zaklikaŭ Paŭnočnuju Kareju pačać pieramovy dziela zaklučeńnia pastajannaha mirnaha pahadnieńnia zamiest časovaj damoŭlenaści ab spynieńni ahniu. Z takoj inicyjatyvaj jon vystupiŭ 15 žniŭnia padčas pramovy, pryśviečanaj hadavinie vyzvaleńnia Karei ad japonskaha panavańnia, paviedamlaje Reuters.
Kiraŭnik Paŭdniovaj Karei zajaviŭ, što dźvie karejskija dziaržavy pavinny šukać šlachi da mirnaha suisnavańnia praz pramy dyjałoh. Na jaho dumku, pryjšoŭ čas pierajści ad pieramirja, jakoje dziejničaje paśla Karejskaj vajny 1950—1953 hadoŭ, da paŭnavartasnaj mirnaj damovy. Pakolki taja vajna zaviaršyłasia tolki pahadnieńniem ab spynieńni ahniu, farmalna jana praciahvajecca ŭžo bolš za 70 hadoŭ.
Li Čže Mion taksama prapanavaŭ padčas mahčymych pieramoŭ abmierkavać miery pa abmiežavańni jadziernaha patencyjału KNDR. Pavodle jaho słoŭ, Sieuł hatovy pastupova i paśladoŭna źnižać napružanaść, stvarać šmatuzroŭnievuju sistemu biaśpieki i praduchilać eskałacyju kanfliktu na paŭvostravie.
Hety zaklik praciahvaje pazicyju, jakuju palityk ahučyŭ jašče letaś: jon vystupaje za pavahu da palityčnaj sistemy Paŭnočnaj Karei i ličyć, što krainy mohuć isnavać pobač biez varožaści.
Adnak adnosiny pamiž Sieułam i Pchieńjanam zastajucca vielmi napružanymi. Lidar KNDR Kim Čen Yn admoviŭsia ad raniejšaj palityki ŭźjadnańnia, abviaściŭ Paŭdniovuju Kareju hałoŭnym praciŭnikam i rasparadziŭsia ŭzmacnić abaronu na miažy. Akramia taho, Pchieńjan užo adchilaŭ prapanovy Li Čže Miona ab dyjałohu, krytykavaŭ płany Sieuła pa stvareńni atamnych padvodnych łodak i nazyvaŭ sumiesnyja vučeńni ZŠA i Paŭdniovaj Karei pravakacyjaj.
U svajoj pramovie prezident Paŭdniovaj Karei taksama zakranuŭ adnosiny ź Japonijaj. Jon adznačyŭ, što histaryčnyja padziei nielha zabyvać, ale nieabchodna hladzieć u budučyniu. Li Čže Mion vykazaŭ nadzieju, što dźvie krainy zmohuć adkryć novy etap supracoŭnictva i pabudavać nastupnyja 60 hadoŭ miru i roskvitu jak blizkija susiedzi.
Kamientary