Mininfarm vynies papiaredžańnie partału TUT.BY

Ministerstva infarmacyi vyniesła papiaredžańnie biełaruskamu partału TUT.BY za materyjał, źmiest jakoha «zdolny nanieści škodu nacyjanalnym intaresam krainy». List, datavany 14 sakavika, redakcyja atrymała ŭ piatnicu, 17 sakavika.

Havorka idzie pra materyjał ad 15 lutaha «Baćki napisali spačatku, što ja fašyst. Jak biełarusy vajujuć va Ukrainie». U im išła havorka pra biełaruskich dobraachvotnikaŭ, jakija vajujuć va Ukrainie na baku kijeŭskich uładaŭ, pra toje, čamu jany adpravilisia vajavać u inšuju krainu, jak prachodziać ich dni i nočy na linii frontu.

U artykule ŭtrymlivałasia zaŭvaha, što tekst nie adlustroŭvaje staŭleńnie redakcyi TUT.BY da kanfliktu na Danbasie i ŭdziełu našych hramadzian u im. Taksama adznačałasia, što Kryminalny kodeks zabaraniaje biełarusam udzielničać u lubych vajennych kanfliktach za miažoj — za hrošy ci biazvypłatna.

U adpaviednaści z zakanadaŭstvam u suviazi z atrymańniem papiaredžańnia Ministerstva infarmacyi, materyjał vydaleny z partała.

TUT.BY nakiravaŭ aficyjny list u Mininfarm z prośbaj rastłumačyć, jakija mienavita frazy ŭ pakazanym materyjale supiarečać dziejnamu zakanadaŭstvu i jakija mienavita narmatyŭnyja akty parušanyja, bo tekst atrymanaha papiaredžańnia pakul utrymlivaje tolki ŭkazańnie na toje, što takaja infarmacyja moža nanieści škodu nacyjanalnym intaresam Respubliki Biełaruś.

«Najaŭnaść siarod asob, jakija vajujuć va Ukrainie, tych, chto pryjechaŭ tudy pa ŭłasnaj inicyjatyvie biełaruskich hramadzian (jak i hramadzian inšych dziaržaŭ), nie źjaŭlajecca tajamnicaj. Pra heta nieadnarazova publična zajaŭlali ŭ tym liku pradstaŭniki biełaruskich pravaachoŭnych orhanaŭ. Šerah hramadzian užo pryciahnuty za padobnyja dziejańni na terytoryi Respubliki Biełaruś da adkaznaści. Udzieł takich asob u bajavych dziejańniach nie źjaŭlajecca častkaj źniešniaj palityki našaj dziaržavy, padobnyja dziejańni źjaŭlajucca kryminalnym złačynstvam, ab čym my taksama nieadnarazova pisali», — adznačyła hienieralny dyrektar TAA «TUT BAJ MIEDYJA» Ludmiła Čekina.

Nahadajem, u adpaviednaści z Zakonam ab ŚMI, dostup da pradukcyi ŚMI, jakaja raspaŭsiudžvajecca z dapamohaj infarmacyjnaha resursu ŭ sietcy Internet, moža być abmiežavany pa rašeńni Ministerstva infarmacyi ŭ vypadku vyniasieńnia ŭładalniku resursu na praciahu hoda dvuch i bolš piśmovych papiaredžańniaŭ.

• 0
• 0
• 0
• 0
• 0
• 0
• 0
• 0