Šunievič: «Nastupaje žastačajšaja libieralizacyja». Ciapier na Banhałorach možna budzie mitynhavać biez dazvołu

25 kastryčnika ministr unutranych spraŭ Ihar Šunievič u pałacie pradstaŭnikoŭ prezientavaŭ źmieny ŭ zakon ab masavych mierapryjemstvach.

Raspaviadajučy žurnalistam pra papraŭki ŭ zakon, kiraŭnik MUS zaznačyŭ: «Kali čałaviek zachoča pravieści masavuju akcyju, to ŭ dazvolenym miescy jon zmoža pravieści heta biez dazvołu ŭładaŭ. Kali ŭ niedazvolenym miescy — treba budzie dazvoł miascovych uładaŭ».

Heta aznačaje, što dla praviadzieńnia mierapryjemstvaŭ u miescach kštałtu parka Družby Narodaŭ u Minsku dazvołu bolš nie budzie treba. Varta adznačyć, što heta nieprestyžnyja miescy navodšybie.

«Nadychodzić žastačajšaja libieralizacyja», — pažartavaŭ Šunievič.

Vystupajučy pierad deputatami, ministr Šunievič dadaŭ, što arhanizatarami masavych akcyj nie zmohuć być ludzi ź niepahašanymi sudzimaściami. Taksama pastrožycca adkaznaść hramadskich arhanizacyj i palityčnych partyj za parušeńnie praviłaŭ praviadzieńnia masavych akcyj. Budzie zabaroniena rekłamavać akcyju da taho, jak jaje dazvolili — hety punkt zakranie ŭ tym liku ŚMI i błohieraŭ. Dazvolenyja miescy praviadzienńnia masavych mierapryjemstvaŭ vyznačać miascovyja ŭłady.

Ministr Šunievič taksama vykazaŭsia pra niekatoryja hučnyja spravy apošniaha času.

U pryvatnaści, kamientujučy DTZ na vulicy Kalvaryjskaj u Minsku 7 kastryčnika, kali pjany dyrektar fitnes-centra «Nardzin», hramadzianin Rasii Viačasłaŭ Karniejaviec za rulom BMW prataraniŭ taksi. Kiroŭca taksi apynuŭsia ź ciažkimi traŭmami ŭ balnicy, stan jaho ciažki.

«Viadziecca pravierka dziejańniaŭ inśpiektara, jaki adpuściŭ pjanaha hramadzianina. Kali pravierka pakaža, što jon parušyŭ instrukcyju, to budzie pakarany», — zapeŭniŭ Šunievič.

Zadali ministru pytańnie i pra Ułada Kazakieviča, asudžanaha za napad ź bienzapiłoj u HC «Jeŭropa», jaki roŭna praz hod napaŭ z nažom na kantralora ŭ kałonii.

«Jon ciapier znachodzicca ŭ SIZA. Viadziecca pravierka. Jon aryštavany, čakajem suda», — zaznačyŭ ministr.

Zakranajučy abstaviny zatrymańnia ŭkrainca Paŭła Hryba, ministr zaznačyŭ, što vyśviatlajucca ŭsie abstaviny znachodžańnia na terytoryi Biełarusi i adjezdu ź jaje. «Kazać pra toje, što Hryb byŭ niezakonna vyviezieny, jašče rana. Vyvučajucca ŭsie abstaviny», — dadaŭ Šunievič.

Ihar Šunievič admoviŭsia kamientavać čutki ab mahčymym pryznačeńni jaho ministram abarony zamiest Raŭkova. Zatoje jon vykazaŭsia pra vypadki dziedaŭščyny ŭ vojsku.

«Ja try hady prachodziŭ słužbu ŭ vajenna-marskim fłocie i viedaju, što paradak u vajskovych častkach zabiaśpiečvajuć nie tolki staršyja, ale i małodšyja kamandziry. U pytańniach dziedaŭščyny usio zaležyć ad ich. Časam patrabujecca žorstkaje padparadkavańnie, ale raźmierkavańnie abaviazkaŭ pavinna być spraviadlivym. Prynižeńnie, psichałahičny i fizičny cisk na maładoha bajca — hańba dla ŭsich», — skazaŭ Šunievič.

***

Na telehram-kanał «Našaj Nivy» možna padpisacca tut.

• 0
• 0
• 0
• 0
• 0
• 0
• 0
• 0