Ispanskija vybary: nazirajem, jak dziejničali katałonskija niezaležniki
Katałonskija niezaležniki pavialičyli kolkaść mandataŭ u ispanskim parłamiencie paśla vybaraŭ 29 krasavika. U minułym sklikańni jany pasłali 17 deputataŭ, u novym miećmuć 22. Usiaho Katałonija maje ŭ kartesach 48 mandataŭ.
Heta nie aznačaje, što padtrymka niezaležnickich partyj u pracentavych adnosinach vyrasła. Hramada ŭ Katałonii zastajecca padzielenaja prykładna ŭ raniejšych adnosinach.
Try absalutna «pra-ispanskija» partyi — pravalibieralnyja «Hramadzianie», kansiervatyŭnyja Narodniki i ultrapravy, nacyjanalistyčny Vox — sabrali 20% hałasoŭ. Pamiarkoŭna «zaadzinstvavyja» katałonskija sacyjalisty sabrali 23%. U toj ža čas try siły, dla jakich niezaležnaść — hałoŭnaja meta, nabrali kala 40% hałasoŭ. Jašče 15% atrymaŭ błok, ad pazicyi jakoha, ułasna, i zaležyć, na čyj bok schilacca šali bolšaści. Heta katałonski sajuźnik ispanskaha Podemos, kaalicyja En Comú Podem - Guanyem el Canvi, jakaja składajecca z radykalnych levych, ekałahistaŭ i levalibierałaŭ. Hetaja apošniaja kaalicyja nie maje akreślenaj pazicyi pa niezaležnaści, ale vystupaje za toje, kab katałoncy vyznačylisia pa hetym pytańni na refierendumie. Suprać apošniaha kateharyčna vystupaje Madryd i «pra-ispanskija» partyi Katałonii. Jany kažuć: kanstytucyja nie dazvalaje, i ŭsio.
Što da niezaležnickaha łahiera, to jon pa-raniejšamu składajecca z takich troch častak.
Raniej samaj mocnaj u im była pravacentrysckaja, libieralna-kansiervatyŭnaja płyń, jakuju ŭznačalvaŭ Karles Pučdemon, siońnia jana nazyvajecca Junts per Catalunya («Razam za Katałoniju»). Ciapier samaj papularnaj stała levacentrysckaja Respublikanskaja lavica Katałonii — Esquerra Republicana de Catalunya (ERC).
Pučdemon emihravaŭ z krainy, kab paźbiehnuć aryštu. Tady jak lidar Respublikanskaj lavicy Uryjol Žunkieras zastaŭsia ŭ krainie, byŭ aryštavany i zastajecca ŭ turmie. Ułasna, z turmy jon uznalvaŭ śpis ERC na vybarach u Kartesy.
Akramia taho, istotnuju častku hałasoŭ źbiraje krajnie levaja kaalicyja Candidatura d'Unitat Popular («Kandydaty narodnaha adzinstva», jakuju składajuć praniezaležnickija levyja radykały, ekałahisty, trackisty, anarchisty (nie błytać hetuju kaalicyju z En Comú Podem).
U katałonskim parłamiencie try hetyja partyi majuć minimalnuju bolšaść.
Voś taki składany palityčny śpiektr maje Katałonija, i niezaležniki mohuć dasiahać pośpiechaŭ, tolki kali ŭmiejuć pajadnoŭvać levych i pravych, chadekaŭ ź fieministkami. Treba adznačyć, što ŭ Ispanii, jak i ŭ inšych jeŭrapiejskich krainach sumlenna ličać hałasy, a pieradvybarčaja ahitacyja viadziecca svabodna.
Biełarusy ź cikavaściu nazirajuć za Katałonijaj, bo katałoncy — prykład narodu, jaki adradziŭ svaju movu. Katałoncy dakazvajuć, što nacyjanalnyja kaštoŭnaści mohuć zastavacca važnymi ŭ hłabalizavanym śviecie.
Siarod znakavych postaciaŭ u kalejdaskopie katałonskich niezaležnikaŭ — futbolny trenier Hvardyjoła, śpiavak-tenar Kareras, znakamity bijołah, epihienietyk Manel Kasteler, śpiavak Luis Ljak, manaška-bieniedyktynka Teresa Farkades, futbalisty Alehier i Pikie.
U novy ispanski parłamient katałonskija niezaležniki simvalična abrali palitviaźniaŭ — arhanizataraŭ zabaronienaha Madrydam refierendumu ab niezaležnaści, aryštavanych ispanskim śpiecnazam.
Kamientary