«Tempy nastupleńnia US RF źnizilisia ŭ razy». Vajennyja analityki — pra toje, jak za leta źmianiŭsia chod vajny va Ukrainie
Jak drony i deficyt bienzinu zapavolili rasijskaje nastupleńnie. Vajennyja analityki padvodziać vyniki apošnich miesiacaŭ vajny va Ukrainie: tempy nastupleńnia armii RF upali ŭ razy, a ŭkrainskija dalnabojnyja ŭdary pa tyłach stvarajuć surjoznyja łahistyčnyja prablemy dla praciŭnika, raskazvaje «Nastojaŝiejeie vriemia».
Ukrainskija harady Kanstancinaŭka, Liman, Dabrapolle stali simvałam abarony Ukrainy hetym letam — mienavita tam zasiarodžany asnoŭny ŭdar US RF. A na poŭdni krainy — u Zaparožskaj vobłaści, kala Arechava, Hulajpola i Navasiołaŭki, — analityki fiksujuć prasoŭvańnie ŭkrainskich vojskaŭ.
«Pad kiraŭnictvam užo Drapataha prasunulisia aryjentavana na 25 kiłamietraŭ. Heta vielmi vialikaja adlehłaść u ciapierašniaj vajnie. Za lipień my vyzvalili stolki terytoryi, kolki vorahu ŭdałosia zachapić. U nas parytet. I heta vymiarajecca 25—30 kiłamietrami», — kamientuje «Nastojaŝiemu Vriemieni» vajenny analityk Alaksiej Hiećman.
U cełym, z pačatku hoda USU vyzvalili kala 700 kvadratnych kiłamietraŭ terytoryi. US RF zachapili pryblizna stolki ž. Heta hałoŭny vynik letniaj vajennaj kampanii, kažuć analityki: Ukraina dahetul abaraniajecca, kazać pra pierachod u hłabalnaje nastupleńnie nie vypadaje. Ale zachapić Słavianska-Kramatorskuju ahłamieracyju da kanca leta rasijskaj armii nie ŭdasca: jaje tempy nastupleńnia skaracilisia.
«Kali paraŭnać z tym, što było hod tamu ci bolš, — razoŭ u 10. Ci bolš navat. Pa vialikim rachunku, na Kanstancinaŭskim i Limanskim napramkach ścirajucca tyja resursy, jakija vydzialalisia stratehična. Leta zakančvajecca. Faktyčna pieršaja zadača nie vykanana», — kaža vajenny analityk Pavieł Łakijčuk.
Pavolnaje prasoŭvańnie abiedźviuch armij, u pryvatnaści, abumoŭlena śpiecyfikaj vajny. Drony zrabili niemahčymymi rezkija prasoŭvańni. Mienavita z pavietranymi atakami mnohija analityki źviazvajuć padzieńnie tempaŭ rasijskaha nastupleńnia.
Hetym letam Ukraina pavialičyła kolkaść midł-strajkaŭ (ad anhł. middle strike — «udar na siaredniuju dystancyju», zaŭv. NV) pa tyłach rasijskaj armii, što ŭskładniaje ŭsiu łahistyku, i dzip-strajkaŭ (ad anhł. deep strike — «udar u hłybiniu», zaŭv. NV) pa terytoryi Rasii.
«Dzip-strajki zaminajuć dastaŭlać paliva i ŭsio nieabchodnaje ŭ apieratyŭnyja tyły, — tłumačyć vajenny analityk Dzianis Papovič. — I zaraz my možam kazać, što jość niastača paliva na froncie, pierš za ŭsio bienzinu. Z dyzielem pa śpiecyficy rasijskaj pierapracoŭki spravy lahčejšyja. A voś ź bienzinam vialikija prablemy. Usie kažuć, što armija spažyvaje dyziel, heta praŭda.
Ale bienzin patrebny dla hienierataraŭ. A hienieratary patrebnyja na pieradavym krai, kab zaradžać batarei, kab zaradžać drony, racyi».
Druhi momant, u jakim sychodziacca vajennyja analityki: vajna stała tańniejšaj. Kab parazić umoŭny skład za 200 kiłamietraŭ ad linii frontu, bolš nie patrebnaja rakieta za niekalki socień tysiač dołaraŭ. Heta paćviardžajuć i ŭ kampanii-vytvorcy ŭkrainskich rakiet i dronaŭ Firepoint.
«Metaj było zrabić pradukt, jaki budzie prostym, zrazumiełym, paŭtaralnym i nie budzie vymahać miesiacaŭ treninhaŭ. U našym vypadku śviežy pohlad na industryju, na toje, jak musiać rabicca niekatoryja rečy, dapamoh nam mocna źnizić canu na rynku i pakazać, što možna dasiahać takich ža vynikaŭ, ale z bolšaj chutkaściu i pry mienšaj canie», — kaža CEO kampanii Iryna Cierach.
Dronavym atakam, dadaje jana, dapamahaje maštab rasijskaj terytoryi: zakryć jaje srodkami SPA niemahčyma. Nad krainaj i anieksavanym Krymam u 2026 hodzie źbili bolš dronaŭ, čym za try papiarednija hady, padličyła vydańnie «Prajekt».
I naftapierapracoŭčaja halina — nie adzinaja meta BPŁA, kaža kiraŭnik Firepoint Dzianis Štylerman.
«Nam treba dabić «Vajłdbieryz» i «Ozon»: kali my ich pakładziom, heta nieminuča pryviadzie da abvalvańnia vielizarnaj kolkaści bankaŭ. Heta parušeńnie ŭstajałaha bytu, abvalvańnie dziasiatkaŭ tysiač biźniesaŭ, jakija padatkami ŭtrymlivajuć hetuju armiju, hetaha varjackaha čałavieka [prezidenta RF Uładzimira Pucina] i patakajuć impierskim ambicyjam Rasii», — upeŭnieny jon.
Pavodle słoŭ Štylermana, da kanca hoda Ukraina płanuje vyrablać pa čatyry balistyčnyja rakiety za dzień. Ukrainskaja balistyka zaraz na finalnych etapach teściravańnia.
Vajennyja ekśpierty ŭpeŭnienyja: heta budzie istotnym arhumientam užo padčas zimovaj vajennaj kampanii.
Kamientary