Japonija šukaje stalicu-dublor. Što nie tak z Tokia?

Terytoryja Japonii znachodzicca ŭ adnoj z samych siejśmična aktyŭnych zon śvietu. Pavodle acenak urada, vierahodnaść taho, što na praciahu nastupnych 30 hadoŭ u rajonie Tokia adbudziecca mocny ziemlatrus mahnitudaj kala 7 bałaŭ, składaje prykładna 70%.

Takoje stychijnaje biedstva zdolnaje nanieści surjoznyja razbureńni na vialikich terytoryjach i ŭ vyniku paralizavać pracu ŭrada, parłamienta, ministerstvaŭ, finansavych ustanoŭ i inšych klučavych dziaržaŭnych orhanaŭ, jakija siońnia skancentravanyja ŭ stalicy. Kab u takim vypadku dziaržava mahła praciahvać pracu, ułady vyrašyli stvaryć reziervovy centr kiravańnia.

U lipieni parłamient Japonii ŭchvaliŭ zakon, jaki stvaraje pravavuju asnovu dla pryznačeńnia adnaho abo niekalkich rehijonaŭ reziervovymi centrami dziaržaŭnaha kiravańnia. Kali Tokia budzie paralizavany ŭ vyniku ziemlatrusu ci inšaj nadzvyčajnaj situacyi, hetyja rehijony zmohuć časova ŭziać na siabie klučavyja palityčnyja, administracyjnyja i ekanamičnyja funkcyi.

Pry hetym zakon nie praduhledžvaje pieranosu stalicy. Tokia zastaniecca hałoŭnym palityčnym centram Japonii, a reziervovyja rehijony buduć zadziejničanyja tolki ŭ vypadku nieabchodnaści.

Pytańnie nie tolki biaśpieki

Jak adznačaje Bloomberg, zakon maje jašče adnu metu — spryjać bolš raŭnamiernamu raźvićciu krainy. U dakumiencie adznačajecca, što ekanomika i nasielnictva zanadta mocna skancentravanyja ŭ Tokia.

Siońnia na staličny rehijon prypadaje kala piataj častki ekanomiki Japonii, tut znachodzicca bolš za pałovu japonskich kampanij, akcyi jakich kacirujucca na biržy, a taksama žyvie kala 30% nasielnictva krainy.

Zakon praduhledžvaje inviestycyi ŭ dziaržaŭnyja abjekty, transpartnuju i haradskuju infrastrukturu ŭ rehijonach budučych «druhich stalic». Taksama płanujucca padatkovyja stymuły, rehulatarnyja źmieny i inšyja miery dla pryciahnieńnia pryvatnych inviestycyj i pavyšeńnia kankurentazdolnaści.

Čamu zakonaprajekt vyklikaŭ sprečki?

Adna z hałoŭnych pryčyn sprečak — mierkavańnie, što najbolšuju vyhadu moža atrymać Osaka. Mienavita partyja Japan Innovation Party (Ishin), jakaja bazujecca ŭ hetym rehijonie, užo šmat hadoŭ vystupaje za stvareńnie druhoj stalicy. Jaje zasnavalnik, były hubiernatar Osaki Toru Chasimota, prapanavaŭ hetuju ideju jašče kala 2010 hoda.

Paśla taho jak Japan Innovation Party uvajšła ŭ kirujučuju kaalicyju, premjer-ministr Sanae Takaici paabiacała pryniać zakon ab druhoj stalicy. Mienavita hetaje abiacańnie stała adnoj z umoŭ dałučeńnia partyi da ŭrada.

Krytyki zakona aścierahajucca, što ŭ vyniku značnaja častka dziaržaŭnych inviestycyj, padatkovych lhot i infrastrukturnych prajektaŭ moža być nakiravanaja ŭ Osaku abo niekalki inšych rehijonaŭ na škodu astatniaj častcy krainy.

Urad pakul nie pradstaviŭ acenki koštu stvareńnia druhoj stalicy i nie vyznačyŭ čakany ekanamičny efiekt, što vyklikaje pytańni nakont finansavaj dyscypliny. 

Jakija harady mohuć stać stalicaj-dubloram?

Zakon nie nazyvaje kankretnych haradoŭ. Jon tolki vyznačaje patrabavańni da rehijonaŭ, jakija mohuć pretendavać na novy status.

Jany pavinny znachodzicca ŭ zonie ź mienšaj ryzykaj surjoznych nastupstvaŭ ad toj ža katastrofy, jakaja moža zakranuć Tokia, a taksama mieć dastatkovuju infrastrukturu, ekanamičny patencyjał, kolkaść nasielnictva i administracyjnyja mahčymaści, kab pry nieabchodnaści vykonvać funkcyi reziervovaj stalicy.

Pra cikavaść da ŭdziełu ŭ prajekcie ŭžo zajavili Osaka, Fukuoka, Chakajda, Mijahi i prefiektura Ajci. Kančatkovaje rašeńnie budzie prymać premjer-ministr, pry hetym zakon dazvalaje vybrać nie adzin, a niekalki reziervovych centraŭ.

Što budzie dalej?

Prykładna ciaham hoda paśla ŭstupleńnia zakona ŭ siłu ŭrad pavinien vyznačyć rehijon abo rehijony, jakija atrymajuć status stalicy-dublora. Dla hetaha budzie stvorany śpiecyjalny štab, jaki ŭznačalić premjer-ministr. Taksama budzie pryznačany asobny ministr dla kuryravańnia inicyjatyvy druhoj stalicy. 

Pakul zakon nie patrabuje pieranosu ministerstvaŭ abo inšych dziaržaŭnych orhanaŭ. Jakija mienavita struktury buduć pracavać u reziervovaj stalicy i jak budzie arhanizavany pierachod u vypadku nadzvyčajnaj situacyi, urad jašče pavinien vyznačyć.

• 7
• 0
• 1
• 1
• 0
• 0
• 0
• 0