Saŭładalnik najbujniejšaj biełaruskaj sietki kramaŭ duty-free kuplaje ŭkrainski časopis «Fokus»
Biznesmen Artur Hranc, jaki źjaŭlajecca saŭładalnikam najbujniejšaj na terytoryi Biełarusi sietki mahazinaŭ biaspošlinnaha handlu BDF, kuplaje adno z samych papularnych biznes-vydańniaŭ na ŭkrainskim rynku - časopis «Fokus», paviedamlaje ej.by sa spasyłkaj na mind.ua, udakładniajučy, što ździełka jašče nie zavieršanaja.
«Fokus» vydajecca z 2006 hoda. Taksama ŭ jaho struktury funkcyjanuje štodzionny resurs navinaŭ focus.ua. Vydańnie viadomaje svajoj analitykaj i ekskluziŭnymi prajektami «Top-200 samych bahatych ludziej Ukrainy», «Top-100 upłyvovych žančyn Ukrainy» i inš.
Da 2013 hoda «Fokusam» vałodaŭ viadomy miedyja-mahnat, fihurant top-100 samych bahatych biznesoŭcaŭ Ukrainy -2019 i zasnavalnik chołdynhu UMH Group Barys Łožkin. Pierš čym pradać ŭ 2013 hodzie svaje miedyja-aktyvy adnamu z hałoŭnych biźniesmienaŭ janukovičaŭskaha pieryjadu Siarhieju Kurčanka, Barys Łožkin sastupiŭ «Fokus» kampanii Vertex United Barysa Kaŭfmana. Toj u svaju čarhu ŭ 2016 hodzie pierapradaŭ vydańnie jaho ciapierašniamu ŭładalniku i pradaŭcu Anatolu Jeŭtuchovu - haspadaru niekalkich ukrainskich radyjostancyj ( «Šanson», DJFM, «Biźnies FM», «Lubimaje»).
Jak paviedamlaje Mind, pierazapuskam «Fokusu» zojmiecca eks-redaktar «Forbes-Ukraina» Uładzimir Fiadoryn. U 2013 hodzie jon pakinuŭ «Forbes-Ukraina» z-za niazhody ź pierachodam časopisa pad kantrol Siarhieja Kurčanka.
Novy mahčymy ŭładalnik «Fokusu» Artur Hranc maje biełaruski pašpart, ale z 2006 hoda žyvie va Ukrainie. Jaho dobrym siabram miascovyja ŚMI nazyvajuć upłyvovaha narodnaha deputata Viarchoŭnaj Rady Andreja Ivančuka.
Artur Hranc atrymaŭ adukacyju ŭ Biełarusi (u BDU) i tut ža ŭ pačatku 1990-ch zrabiŭ pieršyja kroki ŭ biźniesie i svoj pieršy kapitał.
Spačatku hałoŭnym napramkam jaho dziejnaści była pastaŭka roznych tavaraŭ na rasijski rynak. Asabliva biznesmen mieŭ pośpiech u prodažy cukru, dzie ŭ siaredzinie 1990-ch hadoŭ zajmaŭ adno ź lidzirujučych miescaŭ. Kali Rasija ŭzmacniła žorstkaść umovaŭ pastavak cukru na svoj rynak, Artur Hranc pieraklučyŭsia na łahistyku i inviestavaŭ spačatku ŭ Litvie, a potym va Ukrainie.
Jaho hałoŭnaja kampanija BF Capital zarehistravanaja na Kipry. Jana źjaŭlajecca saŭładalnikam nieruchomaści i sietki kram duty-free va Ukrainie (u aeraportach «Baryspal» i «Žulany» i ŭ Užharadskaj vobłaści), a taksama ŭ Hruzii i Armienii. Biznes u hetaj śfiery Artur Hranc viadzie sumiesna z adnym ź jeŭrapiejskich lidaraŭ u biaspošlinnym handli, niamieckaj kampanijaj Gebr. Heinemann. U 2016 hodzie biznesmen viarnuŭsia na biełaruski rynak i staŭ uładalnikam najbujniejšaj u Biełarusi sietki mahazinaŭ duty-free - «Biełamarkiet djuci fry». Razam z Gebr. Heinemann biznesmen vykupiŭ 27 mahazinaŭ biaspošlinnaha handlu ŭ Alaksandra Paciomkina.
U biznesmena jość intaresy ŭ inšych halinach. Jon inviestavaŭ u zavod pa vytvorčaści sokavaha kancentratu ŭ hruzinskim Kabuleci. U siaredzinie 2010-ch hadoŭ Artur Hranc sprabavaŭ zaniacca pierapracoŭkaj alejnych kultur i abviaściŭ ab namiery nabyć dolu va ŭkrainskim chołdynhu «Kreatyŭ». Ale aktyvy chołdynhu byli pradadzienyja za daŭhi, a sam jon likvidavany.
U Biełarusi ź siaredziny 2010-ch hadoŭ Artura Hranca źviazvajuć z najbujniejšaj u Biełarusi sietkaj kram juvielirnych vyrabaŭ Ziko. U pačatku minułaha hoda jaho kampanija BF Capital stała sponsaram Nacyjanalnaha alimpijskaha kamiteta Biełarusi. Supracoŭnictva było raźličana na hod. U 2019 hodzie partniorstva było padoŭžanaje jašče na adzin termin.
Kamientary