«Užyŭ u sacsietkach słova «kałchazan». Za što mahli asudzić byłoha maładafrontaŭca Jaŭhiena Skočku
U mužčyny ŭ SIZA ŭźnikli prablemy sa zdaroŭjem.
Byłoha namieśnika staršyni «Maładoha Frontu» Jaŭhiena Skočku, jaki daŭno adyšoŭ ad palityki, asudzili na try hady źniavoleńnia. Pavodle źviestak «Viasny», Jaŭhiena Skočku abvinavacili ŭ «sadziejničańni ekstremisckaj dziejnaści» (art. 361‑4 Kryminalnaha kodeksa), u «paklopie» i «abrazie Łukašenki» (art. 367 i 368 KK), a taksama ŭ «dyskredytacyi Respubliki Biełaruś» (art. 369‑1 KK).
Z padrabiaznaściej spravy Jaŭhiena Skočki viadoma chiba toje, što ŭ kamientary ŭ sacyjalnych sietkach jon užyŭ słova «kałchazan» i asprečyŭ toje, što «Biełaruś — pravavaja kraina».
Paśla suda, jaki adbyŭsia ŭ pačatku lutaha, biełaruskija pravaabaroncy pryznali Skočku palitviaźniem.
Daśviedčanaja ŭ spravach Jaŭhiena Skočki krynica raskazała «Radyjo Svaboda» pra ŭmovy jaho ŭtrymańnia i nastroj palitviaźnia.
«Za paŭhoda SIZA jamu trojčy mianiali kamieru, ciapier siadzić u nievialikaj, na 10 čałaviek. Kazaŭ, što jahonaje miesca na vierchnim jarusie i što tam usie, chto naviersie, z žoŭtymi birkami, to bok palityčnyja. Zbolšaha na ŭmovy nie skardziŭsia, nastroj u jaho narmalny. Narakaje tolki na turemnaje charčavańnie, bo na niekatoryja stravy ŭ jaho alerhija», — raskazała krynica.
Viarchoŭny sud Biełarusi ŭ krasaviku paćvierdziŭ prysud Jaŭhienu. Heta aznačaje, što nieŭzabavie z homielskaha SIZA palitviaźnia pieraviaduć u kałoniju, ale ŭ jakuju — pakul nie paviedamili.
Pavodle krynicy, hałoŭnaja prablema dla Jaŭhiena — toje, što jaho stan moža pahoršycca praz bolš składanyja ŭmovy ŭ kałonii.
«U jaho pavyšany cisk, pavodle receptu pieradajuć admysłovyja leki, i jon ich atrymlivaje, heta dakładna. Jašče ŭ jaho niestabilnaść šyjnych chrybietnikaŭ, praz što taksama patrebnyja peŭnyja miedyčnyja zachady — jamu treba nasić admysłovy «kaŭnier». U SIZA heta ŭsio robicca, ale jak budzie ŭ kałonii — nieviadoma.
I zrok pahoršyŭsia. Šmat čytaje, miž tym aśviatleńnia tam niedastatkova. Usio heta razumieje, ale pry hetym prasiŭ za jaho asabliva nie pieražyvać, kazaŭ, što ŭsio vytryvaje, da ŭsiaho padrychtavany», — apaviała krynica ab prablemach Jaŭhiena Skočki sa zdaroŭjem.
Čym viadomy Jaŭhien Skočka
U kancy 90‑ch ciaham niekalkich hadoŭ Jaŭhiena Skočku vybirali namieśnikam staršyni «Maładoha Frontu» — moładzievaj hramadskaj arhanizacyi, jakaja była ŭ epicentry baraćby z dyktaturaj Łukašenki i zmahałasia za zachavańnie niezaležnaści Biełarusi.
Tahačasny staršynia «Maładoha Frontu» Pavał Sieviaryniec nazvaŭ Jaŭhiena Skočku «vielmi charyzmatyčnym i kreatyŭnym palitykam, ź jakim zaŭsiody było cikava pracavać pobač».
Heta razam ź im na dzień Śviatoha Valancina my ładzili šeści da jeŭrapiejskich ambasadaŭ, jon asabista prydumlaŭ i pravodziŭ pierformansy, pra jakija navat rasijskaja televizija zhadvała ŭ viačernich navinach. Vielmi kreatyŭny, charyzmatyčny. Za adzin vypadak, kali niezapłanavana ŭzarvaŭsia pačak fiejervierkaŭ, na jaho zaviali kryminalnuju spravu i asudzili na hod umoŭna. Jon źjechaŭ u Homiel, adkul płanavaŭ viarnucca ŭ Minsk, ale sustreŭ tam svaju pałavinku, zavioŭ siamju, pajšli dzieci — i jon tam zastaŭsia», — raskazaŭ pra Jaŭhiena Skočku Pavał Sieviaryniec.
Palityk nie ŭziaŭsia vyznačyć, čamu praz bolš jak 20 hadoŭ ułady Biełarusi zhadali pra byłoha maładafrontaŭca i vyrašyli pakarać jaho pazbaŭleńniem voli.
«Kali ŭ 2000 hodzie pieršy raz Skočku sudzili za tyja fiejervierki, jašče byvała, što spravy razvalvalisia praź niedachop dokazaŭ. Ciapier takoje niemahčyma. Znojduć niepažadany dopis u telefonie — i hetaha chopić, kab kožnaha adpravić za kraty, a nie toje što viadomaha apazicyjaniera», — miarkuje Pavał Sieviaryniec.
U kastryčniku 2026 Jaŭhienu Skočku spoŭnicca 50 hadoŭ. Da aryštu jon žyŭ ź siamjoj u Homieli, zajmaŭsia pradprymalnictvam. U jaho troje dziaciej.
Kamientary