Ćviordaja rusifikacyja. Dola biełaruskamoŭnych pieršakłaśnikaŭ upieršyniu skłała mienš za 10%
U 2018/2019 navučalnym hodzie ŭ Biełarusi vučylisia pa-biełarusku tolki 9,7 % vučniaŭ pieršych kłasaŭ. I hetaja ličba z kožnym hodam skaračajecca. Čatyry hady tamu, u 2014 / 2015 navučalnym hodzie, dola pieršakłaśnikaŭ, jakija vučylisia pa-biełarusku, składała 12,1 %. U 2009 hodzie ich było 16,7%. Kali dziaržaŭnaja palityka nie źmienicca, to praz 10 hadoŭ dola biełaruskamoŭnych školnikaŭ stanie blizkaj da nula.
Biełaruś była samaj rusifikavanaj z respublik SSSR, ale navat tady pry kancy savieckaha pieryjadu dola biełaruskamoŭnych školnikaŭ składała 22%. Paśla zdabyćcia niezaležnaści dola biełaruskamoŭnych škoł rezka vyrasła, ale pačała znoŭ padać paśla taho jak z prychodam da ŭłady Alaksandra Łukašenki znoŭ pačałasia rusifikacyja.
Z 1995 da 2006 hoda dola biełaruskamoŭnych školnikaŭ skaraciłasia z bolš čym 40 da tych samych savieckich 22%. U 2011-m jana ŭpała da 17,8%, u 2016-m — da 13,3%. Byli začynienyja biełaruskamoŭnyja patoki ŭ VNU.
Najbolšaja dola biełaruskamoŭnych pieršakłaśnikaŭ ciapier — u centralnaj, Minskaj vobłaści, heta 17,9%. Na Bieraściejščynie pa-biełarusku pajšli vučycca 14,5% dziaciej, na Haradzienščynie — 10,9%. Najmienšaja dola — na Viciebščynie, usiaho 6,3%. U horadzie Minsku ŭ biełaruskamoŭnyja pieršyja kłasy pryniali tolki 2,7% dziaciej.
Sami biełaruskamoŭnyja škoły zastajucca takimi tolki na papiery. U vyniku nizkich zarobkaŭ piedahohaŭ i ideałahičnych filtraŭ biełaruskamoŭnych piedahohaŭ-pradmietnikaŭ nie chapaje.
Biełaruś — adzinaja słavianskaja dziaržava, dzie dola dziaciej, jakija navučajucca na nacyjalnaj movie, padaje. Niahledziačy na supraciŭ Rasii, Ukrainie ŭdałosia ŭmacavać pazicyi ŭkrainskaj movy. U inšych słavianskich dziaržavach, navat małych, jak Słavienija ci Paŭnočnaja Makiedonija, nacyjanalnyja movy taksama funkcyjanujuć jak adzinyja dziaržaŭnyja.
Što viadoma pra viciebčuka, jakoha vinavaciać u sprobie padryvu samalota ŭ Hiermanii12
Kamientary