Mapa składajecca z aŭtentyčnaj vyšyŭki, tkactva i karunkaŭ kožnaha rajona Hrodzienščyny.
Aŭtar hetaj unikalnaj mapy — ramieśnica z Kareličaŭ Volha Kryšeń. Jana raskazała «Našaj Nivie», što dla stvareńnia mapy joj spatrebiłasia dva z pałovaj miesiacy.
«Bolš za miesiac ja vyvučała arnamienty. Šukała infarmacyju ŭ knihach, u internecie, vielmi dapamahła mnie ŭ hetym sensie kniha Michaiła Kacara «Biełaruski arnamient. Tkactva», — raskazvaje mastačka.
Volha imknułasia stroha prytrymlivacca koleravaj hamy. I ni adzin koler nitak na karcinie nie paŭtarajecca. Kali pobač znachodziacca rajony, u jakich kolery padobnyja, Volha vybirała roznyja adcieńni.
«Ciažej za ŭsio było paŭtarać arnamienty tych rajonaŭ, jakija zachavalisia tolki na čorna-biełych zdymkach. Ale tut dapamoh ułasny dośvied. Kali arnamient simvalizuje vadu, to, viadoma, što jon budzie ŭ zialona-čornych kolerach, kali nieba — u błakitna-fijaletavych. Naohuł, tradycyjnyja kolery biełaruskaha arnamientu — heta čyrvona-čorny, dzie čorny — koler ziamli, čyrvony — sonca», — udakładniaje mastačka.
Pamier pracy 90ch85 santymietraŭ, u jakaści pałatna Volha Kryšeń vykarystoŭvała karelicki lon, a vyšyvała, tkała i viazała francuzskimi muline.
Pa pierymietry raboty ŭzory taksama simvaličnyja: źvierchu — aŭtentyčny ŭzor Viciebskaj vobłaści, ź jakoj miažuje Hrodzienščyna, źnizu — Bresckaj, z pravaha boku — Minskaj, a ź levaha — Biełastockaha vajavodstva. Kab dapoŭnić karcinu, było vyrašana zrabić jašče i hadzińnik, jaki svaim koleram simvalizuje čatyry pary hoda.
Praca Volhi Kryšeń była pradstaŭlenaja na vystavie, pryśviečanaj 75-hodździu ŭtvareńnia Hrodzienskaj vobłaści, ciapier jana — u pryvatnaj kalekcyi žančyny z Hrodna.
«Praca spadabałasia, ja vyrašyła jaje pradać. Karcinu ja acaniła na 500 biełaruskich rubloŭ. Dumaju na budučy hod paŭtaryć jaje, ale va ŭdvaja mienšym pamiery», — pryznajecca Volha.
Što datyčycca hłabalnych płanaŭ, to Volha pryznajecca, što chacieła b takim čynam vyšyć mapu ŭsioj Biełarusi.
«Ale kali na adnu Hrodzienskuju vobłaść u mianie pajšło amal try miesiacy, to kab zrabić Biełaruś — heta za pracu treba zasieści na hod», — dadaje Volha Kryšeń.
Fota polymia.by.
Ciapier čytajuć
«Abmiarkoŭvajem pytańnie ab vyzvaleńni jašče 1300 źniavolenych». Tramp raskazaŭ, pra što havaryŭ z Łukašenkam24
Kamientary