U noč na piatnicu ź Minska adpraviŭsia pieršy rehularny rejs u Vjetnam. Latać avijakampanija «Biełavija» budzie ŭ Niačanh.
Raniej avijakampanija anansavała palotnuju prahramu ŭ Niačanh tolki z 31 sakavika. Ale na fonie kryzisu na Blizkim Uschodzie, kali daviałosia vyvozić turystaŭ z AAE, Katara i Amana, vyrašyli raniej zapuścić dadatkovyja rejsy ŭ Vjetnam, piša Office Life.
Darečy, i siarod pasažyraŭ pieršaha rejsa ŭ Niačanh byli i tyja, kamu daviałosia źmianić płany na adpačynak na karyść Vjetnama z-za zakrytaha nieba na blizkaŭschodnich kurortach.
U «Biełavija» zapeŭnili, što na hetym momant vyvieźli ŭsich biełaruskich turystaŭ, jakija zatrymalisia na Blizkim Uschodzie.
U Vjetnam samalot lacić 11 hadzin, a nazad — 11 hadzin 40 chvilin. Ciapier heta samy praciahły rejs dla Belavia: adlehłaść amal 9300 km.
Jon budzie rehularnym, heta značyć, što kvitki na jaho zmoža nabyć luby achvočy. Košt kvitka tudy i nazad pačynajecca ad 3222 rubloŭ.
Latać u Vjetnam płanujuć try razy na tydzień — u aŭtorak, čaćvier i subotu.
Jak raskazaŭ namieśnik dyrektara pa markietynhu Uładzimir Barkun, na pieršy rejs kvitki vykupili 270 pasažyraŭ usiaho za tydzień, a na zvarotny ŭžo pradadziena 92 kvitki.
Niačanh — kurortny horad na bierazie Paŭdniova-Kitajskaha mora. Tut vialikija čystyja plažy, pryhožyja astravy, šmat łakacyj dla dajvieraŭ.
Z 12 kastryčnika «Biełavija» ŭžo vykonvaje čartarnuju prahramu ŭ Vjetnam na vostraŭ Fukuok. A z 10 maja avijakampanija płanuje adkryć čartarnyja rejsy ŭ vjetnamski Dananh.
Pavodle słoŭ pradstaŭnika MZS Rusłana Varankova, jaki pracavaŭ u Vjetnamie, hetaja kraina cikavaja nie tolki z punktu hledžańnia turyzmu, ale i dla supracoŭnictva ŭ inšych napramkach, naprykład u łahistycy, sielskaj haspadarcy.
Na rejsie taksama płanujecca pieravozka hruzaŭ u našu krainu — u pieršuju čarhu heta sadavina, tekstyl, a ź Biełarusi hatovyja pracavać z eksparciorami pa roznych napramkach.
A my vam kazali: «nie dumajcie, što heta kapiejki»! Stali viadomyja źviestki, kolki padachodnaha biełarusy Litvy pieraličyli roznym hramadskim strukturam24
Kamientary