U Viciebsku sprabujuć pradać raskošnuju kamianicu z erkierami, jakuju za dziesiać hadoŭ daviali da poŭnaha razbureńnia
Kaliści trochpaviarchovy dom vulicy Kamsamolskaj byŭ upryhažeńniem Zadźvińnia, ale za apošnija hady pieratvaryŭsia ŭ ruiny prosta na vačach haradžan. Ciapier niebiaśpiečnuju skryniu sprabujuć pradać novamu ŭłaśniku, ale achvotnych brać na siabie adkaznaść da daviedzieny da ručki pomnik architektury niama.
Čarhovaja sproba pradać budynak pa vulicy Kamsamolskaj, 28 adbudziecca ŭ kancy sakavika 2026 hoda, adnak historyja papiarednich aŭkcyjonaŭ nie daje šmat padstaŭ dla aptymizmu.
Ad raskošnaj kamianicy da ruiny
Budynak byŭ uźviedzieny ŭ 1910‑ia hady, jak miarkujecca, pa prajekcie haradskoha architektara Cichana Kibardzina. Heta byŭ žyły dom, charakterny chutčej dla bujnych haradoŭ kštałtu Sankt-Pieciarburha ci Vilni: z paradnaj leśvicaj pa centry i «čornymi» ŭvachodami z kuchań. Jaho architektura spałučaje elemienty roznych stylaŭ: raślinny arnamient XIX stahodździa tut susiedničaje z formami madernu, a pad voknami vyłučajucca lapnyja hirlandy z kałasami.
Dom pieražyŭ dźvie suśvietnyja vajny, i paśla adnaŭleńnia ŭ 1950‑ia hady ŭ im žyli rabotniki stankabudaŭničaha zavoda. U 2010—2011 hadach jon byŭ pryznany avaryjnym, i žycharoŭ pačali adsialać.
Jašče ŭ 2016 hodzie, jak śviedčać panaramnyja zdymki vulicy, budynak vyhladaŭ całkam prystojna: z dacham, cełymi voknami i tynkoŭkaj na ścienach. Adnak sapraŭdnaje razbureńnie pačałosia nie ad uzrostu, a paśla taho, jak dom trapiŭ u pryvatnyja ruki.
U 2015 hodzie jaho nabyło TAA «SK-JeŭraInviest» amal za čverć miljona dalaraŭ. Novy ŭłaśnik anansavaŭ stvareńnie haściničnaha kompleksu «Brystol». Da 2019 hoda budaŭniki navat razabrali dach i pierakryćci, paśla čaho raboty spynilisia.
Biez kansiervacyi i časovaha dachu pomnik architektury zastaŭsia adkrytym dla ŭździejańnia atmaśfiery i pačaŭ imkliva razburacca. Siońnia budynak chavajecca za budaŭničaj sietkaj: erkiery i tynkoŭka sa ścien pahražajuć abvalicca na hałovy haradžan.
Aŭkcyjonny tupik
Ciapierašniaja sproba pradać abjekt — daloka nie pieršaja. U lutym 2026 hoda dom užo vystaŭlaŭsia na tarhi z pačatkovaj canoj 1 340 000 rubloŭ, ale aŭkcyjon nie adbyŭsia praz adsutnaść achvotnych.
Dla novych tarhoŭ, zapłanavanych na kaniec sakavika, canu źnizili da 1 072 000 rubloŭ. Siońnia prodaž ažyćciaŭlaje nie sam ułaśnik, a orhany prymusovaha vykanańnia — «BiełJurZabieśpiačeńnie». Na majomaść nakładzieny aryšt i zabarona na ździajśnieńnie rehistracyjnych dziejańniaŭ.
Akramia ŭłasna budynka płoščaj 853,8 kv.m, pakupnik atrymlivaje prava arendy ziamielnaha ŭčastka (da 2040 hoda), a taksama šerah abmiežavańniaŭ, źviazanych sa statusam historyka-kulturnaj kaštoŭnaści. Značna ŭskładniaje situacyju toje, što novy ŭłaśnik budzie vymušany nie tolki adnaŭlać mocna paškodžanyja cahlanyja kanstrukcyi i lapninu, častka jakoj niezvarotna stračana za hady stajańnie biez dachu, ale i nanova raspracoŭvać prajektnuju dakumientacyju abo damaŭlacca z papiarednim ułaśnikam ab jaje pieradačy.
Ułady horada razhladajuć pytańnie ab prymusovym adabrańni abjekta ŭ niadbajnaha ŭłaśnika i pieradačy jaho inšamu zabudoŭščyku, adnak pakul histaryčny budynak praciahvaje razburacca na vačach, staŭšy sumnym pomnikam biezhaspadarčaści.
«Naša Niva» — bastyjon biełaruščyny
PADTRYMAĆCiapier čytajuć
«Ja nie sustrakaŭ nivodnaha vajskoŭca, chto b nie pavažaŭ Drapataha»: na čale USU staŭ kamandzir novaha pakaleńnia. Što ŭjaŭlaje saboj Michaił Drapaty?1414
Kamientary