Bijołah raskazaŭ, što moža zapavolić stareńnie čałavieka

Roźnica ŭ chutkaści stareńnia žyvych istot i praciahłaści ich žyćcia źviazany z daŭžynioj cykłu ich razmnažeńnia i inšymi jaho asablivaściami, a taksama ź inšymi rysami ich evalucyjnaj prystasavanaści. Pra heta paviedamiŭ Brajan Kienedzi, prafiesar Nacyjanalnaha univiersiteta Sinhapura, razmaŭlajučy z karespandentam tass.ru.

«Naturalny adbor nie zakranaje praces stareńnia naŭprost, ale jon mocna ŭpłyvaje na jaho ŭskosnym šlacham. Da prykładu, kali žyvioła razmnažajecca pavolna, to evalucyja šturchaje jaje ŭ bok nabyćcia tych rysaŭ, jakija dapamahajuć pražyć dastatkova doŭha, kab pakinuć naščadkaŭ, i pry hetym nie sastupać kankurentam. Pa hetaj ža pryčynie, daŭhalećcie nie treba žyviołam, jakija razmnažajucca chutka», — rastłumačyŭ Kienedzi.

Hetyja adroźnieńni, abumoŭlenyja evalucyjaj, malekularnyja bijołahi płanujuć vykarystoŭvać dla raskryćcia sakretaŭ daŭhažycharstva kitoŭ, hołych ziemlakopaŭ i inšych doŭhažyvučych žyvioł, što pieraŭzychodziać u hetych adnosinach ludziej, i ich vykarystańnia na karyść čałaviectva. Pieršyja vopyty takoha kštałtu robiać na myšach užo ciapier.

Jak adznačaje Kienedzi, jon doŭhi čas staviŭsia da padobnych paraŭnalnych daśledavańniaŭ skieptyčna bo jany nie dazvalali padzialić pryčynu i śledstva. Da prykładu, navukoŭcy nie mahli zrazumieć, ci źviazanaja «nieŭmiručaść» hołych ziemlakopaŭ sa zvyšvysokaj efiektyŭnaściu adnaŭleńnia DNK, abo dakazać, što evalucyi pryjšłosia «vynajści» hetyja miechanizmy z-za anamalna doŭhaha žyćcia hetych žyvioł.

«Niadaŭna našy kalehi zmahli vyłučyć i pravieryć adrazu niekalki miechanizmaŭ, źviazanych z zapavolenym stareńniem hołych ziemlakopaŭ, kitoŭ i niekatorych inšych žyvioł. U ich źjaviłasia mahčymaść «ubudavać» hetyja nabory hienaŭ u hienomy tych vidaŭ, jakija žyvuć niadoŭha, i raskryć pryčynna-vynikovuju suviaź, paćvierdziŭšy, što jany sapraŭdy ŭpłyvajuć na daŭhalećcie.

Padobnyja adkryćci, da prykładu, vopyty z varyjacyjami hienaŭ HAS2 i SIRT6, vyniatymi z DNK hołych ziemlakopaŭ, stali adnymi z samych vialikich praryvaŭ u našaj navucy ŭ apošnija hady», — praciahvaje Kienedzi.

Na jaho dumku, padobnyja ekśpierymienty pa «transpłantacyi» hienaŭ nie tolki dapamohuć vyśvietlić, jakuju rolu adyhryvała i praciahvaje adyhryvać stareńnie ŭ historyi evalucyi žyćcia na Ziamli, ale i daduć navukoŭcam novyja instrumienty dla vyvučeńnia taho, jak možna realna zapavolić stareńnie čałavieka, abapirajučysia na padobnyja prykłady doŭhažycharstva siarod inšych vidaŭ sysunoŭ.

• 0
• 0
• 0
• 0
• 1
• 0
• 0
• 0