Try praściusieńkija pieramieny ŭ zvyčkach mohuć padoŭžyć žyćcio

Z padrabiaznaściami znajomić The Washington Post.

Novaje maštabnaje daśledavańnie, praviedzienaje śpiecyjalistami ź Sidniejskaha ŭniviersiteta, pakazvaje, što navat minimalnyja namahańni ŭ śfiery snu, ruchu i charčavańnia mohuć mieć kałasalny ŭpłyŭ na toje, kolki hadoŭ my pražyviom i, što nie mienš važna, jak doŭha my budziem zastavacca zdarovymi.

U asnovu navukovaj pracy lahli danyja amal 60 tysiač dobraachvotnikaŭ z Brytanskaha bijabanka (bolšaści ź jakich było kala šaścidziesiaci hadoŭ), jakija na praciahu tydnia nasili trekier aktyŭnaści dla fiksacyi ŭsich dzionnych ruchaŭ i načnoha snu, a taksama zapaŭniali razhornutyja ankiety pra svaje charčovyja zvyčki.

Daśledčyki pad kiraŭnictvam prafiesara Emanuela Stamatakisa sistematyzavali ich typovyja režymy snu, fizičnuju aktyŭnaść i jakaść charčavańnia (vykarystoŭvajučy pryniatuju ŭ navucy sistemu acenki dyjety ad nula da sta bałaŭ, zasnavanuju na spažyvańni harodniny, celnaziernievych praduktaŭ, sałodkich napojaŭ i inšaj ježy).

Na asnovie hetych źviestak, supastaŭlenych z historyjaj chvarob za nastupnyja vosiem hadoŭ, była stvorana matematyčnaja madel, jakaja pradkazvała, jak doŭha tearetyčna buduć žyć ludzi i nakolki jany buduć zdarovymi ŭ zaležnaści ad ich zvyčak.

Hałoŭnym abjektam vyvučeńnia stała tryjada faktaraŭ: son, fizičnaja aktyŭnaść i charčavańnie. Stamatakis i jaho kalehi hadami vyvučajuć uzajemasuviaź hetych troch kampanientaŭ, źviartajučy asablivuju ŭvahu na fizičnuju aktyŭnaść i na toje, jakoj małoj jaje kolkaści moža być dastatkova. 

U papiarednich daśledavańniach jany vyśvietlili, što navat niekalki chvilin intensiŭnaha ruchu ŭ dzień, ad jakoha pačaščajecca puls i hłyboka dychaješ, pryvodzić da źnižeńnia ryzyki raku i inšych chraničnych chvarob i zaŭčasnaj śmierci.

Ale daśledčyki taksama razumieli, što samich pa sabie praktykavańniaŭ niedastatkova dla doŭhaha i zdarovaha žyćcia. Ludziam taksama treba spać i jeści. Jany zadalisia pytańniem: jakija idealnyja praporcyi hetych troch elemientaŭ? I, što bolš realistyčna, jakija minimalnyja źmieny pavinny zrabić ludzi, kab dasiahnuć stanoŭčych vynikaŭ?

Idealnaje spałučeńnie zvyčak

Raspracavanaja madel pakazała, što pamiž hetymi tryma elemientami isnuje ŭnikalnaja pryrodnaja sinierhija.

Navukoŭcy vyznačyli idealnuju kambinacyju, jakaja davała amal dziesiać dadatkovych hadoŭ dobraha zdaroŭja i žyćcia ŭ paraŭnańni ź ludźmi, čyje pakazčyki byli samymi nizkimi. Heta nie mienš za 7,2 hadziny snu plus 42 chviliny aktyŭnaści ŭ dzień i ježa bieź pieraboru tłušču i vuhlavodaŭ.

Aptymizm vyklikaje toje, što, pavodle madeli, navat nievialikija palapšeńni va ŭsich troch kirunkach adnačasova prynosiać kudy bolš karyści, čym zasiarodžanaść na čymści adnym.

Usiaho 5 chvilin dadatkovaha snu na dzień, dźvie chviliny dadadzienaj aktyŭnaści i palapšeńnie taho, što vy jaście (čaho možna dasiahnuć adnoj dadatkovaj porcyjaj harodniny abo celnaziernievych praduktaŭ) vyvodzili ludziej z samaj nizkaj, niezdarovaj katehoryi. Statystyčna heta dadavała hod da ich imaviernaj praciahłaści žyćcia.

Takija drobnyja źmieny taksama pavialičvali čakanuju praciahłaść zdarovaha žyćcia — heta značyć kolkaść hadoŭ, jakija čałaviek moža pražyć biez surjoznych chraničnych zachvorvańniaŭ.

Zhodna z madellu, padobnyja pośpiechi ŭ daŭhalećci i zdaroŭi, atrymanyja ad luboha z hetych elemientaŭ paasobku, patrabavali b značna bolšych namahańniaŭ. Naprykład, kali čałaviek vyrašyć pavialičyć tolki fizičnuju nahruzku, jamu spatrebiacca dadatkovyja dvaccać dźvie chviliny intensiŭnych praktykavańniaŭ štodzień, kab dasiahnuć taho ž efiektu, jaki dajuć usiaho dźvie chviliny ruchu ŭ spałučeńni z krychu daŭžejšym snom i bolš jakasnaj ježaj.

«My vyjavili, što źmieny mohuć być minimalnymi, kali jany kambinujucca, — tłumačyć vučony. — Mahčyma, budzie dastatkova adkłaści telefon krychu raniej viečaram, kab paspać na piać chvilin daŭžej. Plus padniacca pa schodach zamiest lifta na pracy i vykarystoŭvać dla buterbroda celnaziernievy chleb, a nie bieły baton. Hetyja drobiazi sumirujucca».

Viadoma, daśledčyki pryznajuć peŭnyja abmiežavańni svajoj pracy. Heta statystyčnaje madelavańnie, jakoje hruntujecca na prahnozach, a nie na realnym nazirańni za ŭsim žyćciovym šlacham kožnaha ŭdzielnika. Takija faktary, jak spadčynnaść, uzrovień dachodaŭ i papiaredniaja historyja chvarob, taksama majuć vialikaje značeńnie.

Tym nie mienš, heta nie admianiaje hałoŭnaj dumki daśledavańnia: navat vielmi nievialikija źmieny mohuć dapamahčy pavialičyć praciahłaść i zdaroŭje vašaha žyćcia.

• 26
• 1
• 2
• 0
• 0
• 0
• 0
• 0