Kaśmičny karabiel «Aryjon» pieradaŭ pieršy zdymak Ziamli ź vialikaj adlehłaści. Na im płanieta vyhladaje jak tonki paŭmiesiac. Upieršyniu z 1972 hoda ludzi zmahli niepasredna ŭbačyć Ziamlu z takoj dalokaj dystancyi.
Rakieta z karablom startavała 1 krasavika z kasmadroma ŭ Fłarydzie ŭ miežach misii «Artemida-2». Ekipaž, u jaki ŭvachodziać amierykanskija i kanadski astranaŭty, paśpiachova nakiravaŭsia ŭ bok Miesiaca.
Fota było zroblena z adlehłaści kala 70 tysiač kiłamietraŭ ad Ziamli, što paćviardžaje: karabiel pakinuŭ kalaziamnuju arbitu.
Paźniej NASA apublikavała jašče adno fota, u jakim Ziamla sfatahrafavanaja ŭžo całkam.
«My bačym našu rodnuju płanietu jak cełaje, aśvietlenuju zachaplalnymi sinimi i karyčnievymi kolerami. Zialonaje palarnaje źziańnie navat aśviatlaje atmaśfieru. Heta my, razam, nazirajem za tym, jak našy astranaŭty ździajśniajuć svajo padarožža da Miesiaca», — padpisała kampanija heta fota ŭ sacsietcy Ch.
Misija praciahniecca kala 10 dzion. Za hety čas astranaŭty ablaciać Miesiac na adlehłaści prykładna 8 tysiač kiłamietraŭ ad jaho pavierchni i buduć vyvučać jaho budovu — kratary, łavu, raskoliny i inšyja asablivaści. Heta dapamoža lepš zrazumieć, jak utvarylisia Miesiac i ŭsia Soniečnaja sistema.
Kali ŭsio projdzie paśpiachova, udzielniki misii apynucca na samaj vialikaj adlehłaści ad Ziamli, na jakoj kali-niebudź byli ludzi. Paśla hetaha jany viernucca dadomu. Uvieś prajekt nakiravany na padrychtoŭku nastupnaha etapu — misii «Artemida-3», padčas jakoj płanujecca vysadka čałavieka na Miesiac.
Kaśmičny karabiel «Aryjon» sychodzić z arbity Ziamli i adpraŭlajecca da Miesiaca
Čamu ludzi paŭstahodździa nie lotali da Miesiaca?
ZŠA adpravili kaśmičny karabiel z astranaŭtami na Miesiac
Čałaviek znoŭ lacić da Miesiaca. NASA siońnia adpraŭlaje pieršy za paŭstahodździa piłatavany karabiel da spadarožnika Ziamli — misiju «Artemida-2»
Ciapier čytajuć
Daradca prezidenta Polščy prakamientavaŭ zvarot Kaleśnikavaj i Zołatavaj: Łukašenka vypuskaje niekalki dziasiatkaŭ viaźniaŭ, a na nastupny dzień zatrymlivaje novych2323
Kamientary