«Lubiŭ žyćcio i mieŭ vialikija płany». Žonka Mikity Kryŭcova nie vieryć, što jon skončyŭ žyćcio samahubstvam

23 žniŭnia Alena Kryŭcova padała ŭ Śledčy kamitet zajavu na zaviadzieńnie kryminalnaj spravy pa fakcie śmierci muža, bo nie vyklučaje jahonaha vykradańnia i zabojstva, piša Radyjo Svaboda.

Alena Kryŭcova, žonka znojdzienaha paśla źniknieńnia 26-hadovaha Mikity Kryŭcova, nia vieryć, što jon moh skončyć žyćcio samahubstvam.

Alena Kryŭcova padała ŭ Śledčy kamitet zajavu

23 žniŭnia Alena Kryŭcova padała ŭ Śledčy kamitet zajavu na zaviadzieńnie kryminalnaj spravy pa fakcie śmierci muža, bo nie vyklučaje jahonaha vykradańnia i zabojstva.

«Jon byŭ vielmi žyvy, lubiŭ žyćcio i pa-čałaviečy nia byŭ takim dužym, kab siabie zabić. Jašče jon mieŭ vialikija plany na dalejšaje žyćcio, nie źbiraŭsia jaho zakančvać. Heta zusim na jaho nie padobna, što jon zadušyŭsia. Heta nia jon tak zrabiŭ», — miarkuje Alena Kryŭcova.

Alena Kryŭcova nia vieryć ŭ versiju, što pryčynaj samahubstva muža mahło być ich rašeńnie skasavać šlub.

«Hady dva ŭ nas užo prablemy ŭ šlubie, my sapraŭdy abmiarkoŭvali budučy razvod, ale heta nie było dla jaho stresam, my spakojna pra heta havaryli. My dumali, što niedzie paśla vieraśnia padamo zajavu, ale peŭnaj daty nie pryznačali. Mikita pracavaŭ, praciahvaŭ zachaplacca futbołam — žyŭ paŭnavartasnym žyćciom. Pra taki kaniec jon dakładna nia dumaŭ i mnie nie kazaŭ», — raskazała Alena Kryŭcova.

Žonka Mikity Kryŭcova pryznała, što da niadaŭniaha času nia viedała, ci ŭdzielničaŭ jaje muž u akcyjach pratestu, źviazanych z vybarami. Kali siońnia žančyna pabačyła videa, dzie jon staić pierad šeraham AMAPu ź bieł-čyrvona-biełym ściaham, jana nia vyklučyła, što takoje byvała i raniej.

«Jon aktyŭny, bajavy, nie baicca pakazać svaje pohlady. Heta tak», — skazała Alena Kryŭcova.

Apaznańnia jašče nie było

23 žniŭnia Alena praviała niekalki hadzin u Partyzanskim RUUS i ŭ hutarcy sa śledčym rajonnaha adździełu Śledčaha kamitetu. Pakul žančynie nieviadoma, kali adbudziecca apaznańnie muža i ci budzie jana ŭdzielničać ŭ hetaj pracedury.

«Nia viedaju, ci znajdu siły. Budzie baćka jahony, heta dakładna. Nam skazali, što jašče idzie anatamavańnie, tamu nielha pabačyć cieła. U vyniku pakul jaho nichto nia bačyŭ. Ani ja, ani baćki — nie pakazali. Mianie apytali. Mahčyma, paviedamiać zaŭtra, dzie i kali budzie apaznańnie», — skazała Alena Kryŭcova.

Pavodle adnaho ź siabroŭ Kryŭcova z Maładečna, jaki prasiŭ jaho nie nazyvać, kali ranicaj 12 žniŭnia Mikita źbiraŭsia na pracu, to ŭziaŭ z saboj rečy, jakija mohuć prydacca ciaham niekalkich dzion. «Jak jon źnik, my adrazu nie turbavalisia, bo nie vyklučali, što jon schavaŭsia. Inakš navošta braŭ tyja rečy? To-bok jon peŭna padazravaŭ, što jaho mohuć zatrymać», — miarkuje siabra.

Chto taki Mikita Kryŭcoŭ

Fanat futbolnaj kamandy «Maładečna» Mikita Kryŭcoŭ źnik 12 žniŭnia. Pavodle svajakoŭ, ranicaj hetaha dnia jon pajechaŭ na pracu ŭ pasiołak Karaloŭ Stan pad Mienskam. Cieła Mikity Kryŭcova było znojdziena 22 žniŭnia ŭ lesapałasie ŭ miežach Miensku. Pavodle paviedamleńnia Śledčaha kamitetu, Mikita Kryŭcoŭ zadušyŭsia, śladoŭ kryminalnaha charaktaru na ciele nie było.

23 žniŭnia znajšłosia videa, na jakim Mikita Kryŭcoŭ staić pierad šeraham AMAPu ź bieł-čyrvona-biełym ściaham na płoščy ŭ Maładečnie. Videa źniali ŭviečary 9 žniŭnia.

• 0
• 0
• 0
• 0
• 0
• 0
• 0
• 0