«Dziŭnaje žadańnie ŭ hetyja dni». Zialenski nie rekamienduje zamiežnym palitykam jechać 9 maja ŭ Maskvu
U svaim zvarocie 7 maja prezident Ukrainy Uładzimir Zialenski zajaviŭ, što niekatoryja krainy, blizkija da Rasii, płanujuć adpravić svaich pradstaŭnikoŭ u Maskvu, i nazvaŭ takoje rašeńnie «dziŭnym žadańniem».
«U nas jość zvaroty ad niekatorych dziaržaŭ, blizkich da Rasii, pra toje, što ich pradstaŭniki źbirajucca być u Maskvie. Dziŭnaje žadańnie ŭ hetyja dni. My nie rekamiendujem», — zajaviŭ Zialenski ŭ zvarocie 7 maja.
Jon taksama nahadaŭ, što Ukraina prapanoŭvała Rasii spynić ahoń jašče z 6 maja, adnak, pavodle jaho słoŭ, u adkaz praciahnulisia rasijskija ŭdary i pahrozy.
Zialenski raskrytykavaŭ pazicyju rasijskaha kiraŭnictva, zajaviŭšy, što Maskva choča biaśpiečna pravieści parad, a paśla znoŭ praciahvać vajnu.
«Jany chočuć ad Ukrainy dazvołu pravieści svoj parad, kab biaśpiečna vyjści na płošču na hadzinu raz na hod, a potym znoŭ zabivać našych ludziej i vajavać. Užo rasijanie havorać pra ŭdary paśla 9 maja. Dziŭnaja i dakładna nieadekvatnaja łohika rasijskaha kiraŭnictva».
Jak raniej paviedamlałasia, u paradzie 9 maja ŭ Maskvie z zamiežnych palitykaŭ płanujuć udzielničać Alaksandr Łukašenka, lidary Małajzii i Łaosa, a taksama niepryznanych Abchazii i Paŭdniovaj Asiecii. Budzie ŭ toj dzień u Maskvie i premjer-ministr Słavakii Robiert Fica, ale ci pojdzie jon na parad — stanie viadoma tolki ŭ toj dzień.
Raniej Rasija abviaściła pra adnabakovaje spynieńnie ahniu na pieryjad z 8 pa 10 maja. U adkaz Ukraina prapanavała ŭvieści «režym cišyni» ŭžo z 6 maja, ale Maskva nie pahadziłasia i bajavyja dziejańni praciahnulisia.
Minabarony Rasii taksama zajaŭlała, što ŭ vypadku sprobaŭ sarvać śviatkavańnie ŭ Maskvie mohuć być naniesienyja masiravanyja rakietnyja ŭdary pa Kijevie.
Na fonie pahroz i pytańniaŭ biaśpieki bolš za 20 haradoŭ Rasii i anieksavanaha Kryma admianili parady da Dnia Pieramohi. U Maskvie i šerahu inšych haradoŭ vyrašyli pravodzić mierapryjemstvy biez vajskovaj techniki.
Kamientary