Sotni tysiač demanstrantaŭ druhuju niadzielu zapar zaniali ŭvieś centr Minska FOTY
Dakładnuju kolkaść demanstrantaŭ padličyć niemahčyma, ale, zdajecca, ich było navat bolš, čym tydzień tamu.
Voś karotkaje videa:
Pakul adna biaskoncaja kałona išła da Steły, druhaja pajšła na płošču Jakuba Kołasa i h.d.
Častka demanstrantaŭ ad Steły, niekalki dziasiatkaŭ tysiač, paśla rušyła da płoščy Dziaržaŭnaha Ściaha, što za Pałacam Niezaležnaści. Ale praśpiekt Pieramožcaŭ tam zaharadziŭ AMAP, i ludzi raźviarnulisia razychodzicca.
U hety momant Alaksandr Łukašenka z aŭtamatam pad prycełami telekamier sieŭ u viertalot, ablacieŭ užo puściejučy praśpiekt i viarnuŭsia
AMAP sustreŭ jaho na svajoj barykadzie apładysmientami. Ale hetaja ich scena dysaniravała z atmaśfieraj na vulicach — absalutna mirnaj i nieahresiŭnaj.
Na vulicy Minska vyjšła vielmi roznaja publika: tam byŭ i siaredni kłas, i rabočyja, i hości z rehijonaŭ.
Panavała atmaśfiera karnavału i ŭzdymu.
Minčuki vitali šeście ściahami z bałkonaŭ i dachaŭ.
Žanhlor cyrka demanstravaŭ svajo majsterstva pad apładysmienty.
Byli barabany, ludzi ŭ kreatyŭnych kaściumach i tysiačy płakataŭ, a taksama šyldy z nazvami svaich pradpryjemstvaŭ i nasielenych punktaŭ.
A kali ŭłady z metaj psichałahičnaha ŭździejańnia ŭklučyli hučnamoŭniki z savieckimi pieśniami, narod žyva padpiavaŭ «Piervym diełom samolety»: «Piervym diełom, piervym diełom Łukašienko, a Jermošina, Jermošina potom».
Ułady vystavili ščylny kardon pierad Stełaj z aŭtamatami ŭ jakaści demanstracyi siły.
Bajcy źbiantežana nazirali za sotniami tysiač ludziej, što išli, i išli, i išli pobač, sa ściahami i kvietkami.
Žychary žyłoha doma nasuprać Steły vyviesili dva hihanckija nacyjanalnyja ściahi.
Da momantu napisańnia hetaha materyjału nie było viadoma ni pra adzin incydent, demanstranty pavodzili siabie vyklučna mirna.
Kamientary