Amierykancy lubiać havaryć pra zaniapad Jeŭropy. Ale bolšaść jeŭrapiejcaŭ žyvie lepš za ich. Praŭda, jašče nie biełarusy

U 2025 hodzie śviet staŭ značna bahaciejšym. Pavodle novaj spravazdačy Global Wealth Report, padrychtavanaj šviejcarskim bankam UBS, asabistaje bahaćcie vyrasła na 10,8% — heta samy chutki hadavy rost z 2017 hoda. Daśledavańnie achoplivaje 56 krain i terytoryj (Biełaruś u analiz nie ŭvajšła), na jakija prypadaje bolš za 92% suśvietnaha bahaćcia.

Hałoŭnymi pryčynami hetaha rostu stali pośpiechi finansavych rynkaŭ i padaražeńnie niefinansavych aktyvaŭ, najpierš nieruchomaści. Najchutčej bahaćcie pavialičvałasia ŭ Jeŭropie i na Blizkim Uschodzie: u cełym hety rehijon dadaŭ amal 18%, Zachodniaja Jeŭropa — kala 17%, a Uschodniaja — 28%. Častkova taki skačok tłumačycca asłableńniem dołara: pakolki UBS viadzie raźliki ŭ dołarach ZŠA, umacavańnie jeŭra aŭtamatyčna pavialičyła acenku jeŭrapiejskaha bahaćcia.

Pra maštab hetaha rostu śviedčyć i kolkaść novych dołaravych miljanieraŭ, jakich za minuły hod u śviecie stała amal na miljon bolš. Amal pałova hetaha pryrostu prypała na Złučanyja Štaty, dzie ich stała bolš na 440 tysiač — u siarednim bolš za 1200 čałaviek štodnia.

Ale za ahulnym rostam chavajecca mienš adnaznačnaja karcina. Bahaćcie pavialičvałasia vielmi nieraŭnamierna: u mnohich krainach siaredni pakazčyk ros, a miedyjannaje bahaćcie, naadvarot, źnižałasia.

Miedyjana pakazvaje ŭzrovień, adnosna jakoha pałova darosłaha nasielnictva maje bolš čystaha bahaćcia, a pałova — mienš. Mienavita tamu jana lepš charaktaryzuje dastatak zvyčajnaha čałavieka. Kali kapitały nievialikaj hrupy vielmi zamožnych siemjaŭ imkliva rastuć, siaredniaja ličba moža rezka pavialičycca, choć dla bolšaści ludziej situacyja amal nie źmienicca.

Mienavita heta dobra vidać na prykładzie Złučanych Štataŭ. Kali hladzieć na siaredniaje bahaćcie, ZŠA vyhladajuć adnoj z najbahaciejšych krain śvietu: na adnaho darosłaha amierykanca prypadaje amal 696 tysiač dołaraŭ čystaha bahaćcia. Vyšejšy pakazčyk tolki ŭ Šviejcaryi.

Pavialičyć

Adnak pa miedyjannym bahaćci karcina zusim inšaja. Pa hetym pakazčyku ZŠA zajmajuć tolki 28‑ie miesca. Zvyčajny amierykaniec maje kala 69 tysiač dołaraŭ čystaha bahaćcia — mienš, čym žychary Słavienii, Partuhalii i jašče šerahu jeŭrapiejskich krain. U Italii, jakaja pa jeŭrapiejskich mierkach daloka nie bahataja, hety pakazčyk amal udvaja vyšejšy i składaje 131 tysiaču dołaraŭ.

Uznačalvajuć suśvietny rejtynh Luksiemburh i Bielhija. Miedyjannaje bahaćcie darosłaha žychara Luksiemburha dasiahaje 394 tysiač dołaraŭ — amal u šeść razoŭ bolš, čym u ZŠA, a ŭ Bielhii — 277 tysiač dołaraŭ, što prykładna ŭ čatyry razy bolš.

U vyniku ZŠA adnačasova zastajucca suśvietnym lidaram pa kolkaści miljanieraŭ i adnoj z krain, dzie siarednija ličby najbolš razychodziacca z realnaściu, u jakoj žyvie bolšaść ludziej.

Pry hetym spravazdača UBS adznačaje i pazityŭnuju tendencyju. Za apošnija 25 hadoŭ dola darosłych z čystym bahaćciem mienšym za 10 tysiač dołaraŭ skaraciłasia z 75% da 41%. Adnačasova ŭsio bolš ludziej pierachodzić u nastupnyja majomasnyja katehoryi — ad 10 tysiač da 100 tysiač dołaraŭ i ad 100 tysiač da 1 miljona. Adpaviedna spravazdačy, siońnia kala 1,5% darosłych u śviecie vałodajuć aktyvami na sumu bolšuju za 1 miljon dołaraŭ. 

Pavialičyć

Cikava, što najbolšy pracentny pryrost kolkaści dołaravych miljanieraŭ zafiksavali ŭ Litvie — 8%. Za hod ich tam stała bolš na 921 čałavieka. U piaciorku lidaraŭ taksama ŭvajšli Turcyja, Łatvija, Vienhryja i Irłandyja. Rasija zaniała šostaje miesca.

Što tyčycca Biełarusi, to apošnija dastupnyja acenki adnosiacca da 2022 hoda. Tady miedyjannaje bahaćcie darosłaha biełarusa aceńvałasia ŭ 18,5 tysiačy dołaraŭ, a siaredniaje — u 34,8 tysiačy.

U suśvietnym rejtynhu Biełaruś tady apynułasia ŭ adnoj hrupie z takimi krainami, jak Mieksika, Čyli, Kosta-Ryka, Iran i Ałbanija, dzie miedyjannaje bahaćcie składała ad 17 da 20 tysiač dołaraŭ.

• 3
• 0
• 0
• 1
• 1
• 0
• 0
• 0