U ispanskaj Sievilji raście 48 tysiač apielsinavych drevaŭ, i heta adna z admietnych prykmiet horada. Adnak miascovyja ŭłady nie zaŭsiody viedajuć, što rabić z takoj kolkaściu sadaviny, i časam heta pieratvarajecca ŭ sapraŭdnuju prablemu. Ale joj znajšli aryhinalnaje vyrašeńnie.
Apielsiny pryhoža vyhladajuć na drevie, ale stanoviacca prablemaj, kali jany padajuć na darohu pad koły aŭtamabilaŭ. Tady vulicy robiacca klejkimi praz apielsinavy sok i čornymi ad much, što prylatajuć na reštki sadaviny. Sievilskija ŭłady štohod najmajuć kala 200 čałaviek dla dapamohi ŭ zbory apielsinaŭ.
Ciapier u hetym paŭdniovaispanskim horadzie pasprabujuć vyrablać z apielsinaŭ elektryčnaść. Dla hetaha budzie vykarystoŭvacca mietan, jaki vyłučajecca padčas hnijeńnia apielsina.
Miascovaja vodapravodnaja kampanija Emasesa płanuje pačać pracu z vykarystańnia 35 ton apielsinaŭ dla vyrabu ekałahična čystaj enierhii, jakaja dalej pojdzie na pracu adnaho ź sievilskich zavodaŭ ačyščeńnia vady. Sadavinu buduć pieraapracoŭvać na ŭžo isnujučym pradpryjemstvie, jakoje zajmajecca atrymańniem enierhii z arhaničnaha materyjału, paviedamlaje the Guardian.
Bienińja Łopiez, kiraŭnik adździeła pa ekałohii ŭ Emasesa, tłumačyć, što chutka kampanija spadziajecca atrymać mahčymaść pieraapracoŭvać usie sievilskija apielsiny. Jak ličyć Łopiez, dla hetaha patrebnyja inviestycyi ŭ pamiery kala 250 tysiač jeŭra.
Jość i bolš śmiełyja płany, bo, pa acenkach Emasesa, tona apielsinaŭ moža dać dastatkova enierhii na sutki dla piaci damoŭ.
Kamientary