U parodyi na hramadska-palityčnaje tok-šou jon vyrašaŭ sprečku, ci treba brać z saboj pakiet u kramu. Raman Pratasievič u zale zachodziŭsia ad śmiechu.
Na biełaruskim telekanale STB z maja 2026 hoda vychodzić novaja humarystyčnaja prahrama «DCH šou». Jaje stvaraje mahiloŭskaja kamanda KVZ «Doktar Chaus», jakaja była zasnavanaja ŭ 2008 hodzie, a ŭ 2022‑m stała čempijonam Vyšejšaj lihi KVZ u Rasii.
Z kastryčnika startavaŭ novy siezon. Stvaralniki pazicyjanujuć prajekt jak humar «pra biełarusaŭ, dla biełarusaŭ i ad biełarusaŭ». Heta šmatfarmatnaje šou sa scenkami, parodyjami, žartami na aktualnyja temy i zaprošanymi znakamitaściami. Stvaralniki abiacali, što siarod haściej buduć nie tolki artysty i papularnyja błohiery, ale i vysokapastaŭlenyja čynoŭniki.
U niadaŭnim vypusku prahramy, jaki vyjšaŭ 10 kastryčnika, źjaviŭsia adzin z samych adyjoznych biełaruskich prapahandystaŭ — Ryhor Azaronak.
Viadomy svaimi isteryčnymi manałohami ŭ abaronu Łukašenki, abrazami palityčnych apanientaŭ, antyzachodniaj rytorykaj i zachapleńniem Stalinym, na hety raz jon prymieryŭ na siabie niazvykła rolu prymirenca.
Azaronak staŭ udzielnikam humarystyčnaj scenki «Sumnieńni» — parodyi na hramadska-palityčnyja tok-šou, jakaja vychodzić na tym ža STB.
Temaj debataŭ było «pytańnie, jakoje padzialiła krainu na dva łahiery»: ci treba kožny raz kuplać novy pakiet u kramie abo lepš prychodzić sa svaim.
Dva ŭdzielniki dyskusii pryvodzili arhumienty:
— Pakiet treba kuplać. Pa-pieršaje, novaje zaŭsiody pryjemnaje, a pa-druhoje, heta razhaniaje ekanomiku, daje pracoŭnyja miescy. A ja, jak dyrektar palimiernaha zavoda, viedaju, pra što kažu.
— A ja, jak biudžetnik, śćviardžaju: pakiet treba nasić z saboj. Pa-pieršaje, nasić pakiet z saboj — heta mahčymaść vypić u lubym parku, a pa-druhoje, ty nikoli nie viedaješ, kali tabie pakiet z saboj prydasca.
— Pakiety treba zaŭsiody kuplać. Nie kuplajučy pakiet, vy zryvajecie pakazy mod u dziciačych łahierach. Padumajcie pra dziaciej. Bo pakiet-majka — heta jašče i spadnica. I kuplajučy pakiet, vy zaŭsiody robicie śmietnicu jarčejšaj.
Pastupova sprečka pierarasła va ŭzajemnyja abrazy. U peŭny momant apanienty sčapilisia i stali tuzać adzin adnaho.
I tut na scenie źjaviŭsia Azaronak, jaki łahodnym hołasam zaklikaŭ spynić svarku.
«Spyniciesia! Cicha! Cicha, spakojna. Bo luboje pytańnie možna vyrašyć absalutna pa-dobramu, błahasna i samaje-samaje hałoŭnaje — nijakich abrazaŭ. I zusim nie važna, jaki ŭ vas pakiet, dzie jaho ŭziali, kupili ŭ kramie ci zabrali z domu. Heta absalutna nie važna. Samaje hałoŭnaje, kab jon byŭ (pierašoŭ na hrozny ton) nie polski».
Paśla hetych słoŭ kamiera pieraklučyłasia na zału, kab pakazać reakcyju publiki. U kadr trapiŭ Raman Pratasievič, jaki śmiajaŭsia z žartu Azaronka.
Kamientary