Kaja Kałas: Amierykanskija pieramoŭščyki ŭžo amal dva hady sprabujuć schilić Ukrainu da kapitulacyi

«Amierykanskija pieramoŭščyki ŭžo amal dva hady, bolš za hod, sprabujuć schilić Ukrainu da kapitulacyi», — skazała Kałas. Pavodle jaje słoŭ, Ukraina dahetul nie kapitulavała na ŭmovach Pucina tolki dziakujučy padtrymcy Jeŭropy.

Kałas taksama padkreśliła, što jeŭrapiejskija krainy pavinny ŭdzielničać u pieramovach, kab uraŭnavažvać pazicyju Biełaha doma, jakaja, na jaje dumku, usio bolš schilajecca da intaresaŭ Maskvy.

Adnosiny pamiž ZŠA i Jeŭropaj pahoršali paśla taho, jak prezident ZŠA Donald Tramp zaklučyŭ z Pucinym pahadnieńnie ab pastaŭkach dyzielnaha paliva i źmiakčyŭ sankcyi da krasavika 2027 hoda, nie atrymaŭšy ŭzamien nijakich sastupak ad Rasii.

Tramp taksama zaklikaŭ pravieści va Ukrainie novyja vybary, choć padčas vajny pravodzić ich zabaroniena, i paskardziŭsia, što z ukrainskim prezidentam Uładzimiram Zialenskim składaniej damaŭlacca, čym z Pucinym. Sam Zialenski zajaviŭ, što adčuvaje siabie zdradžanym Trampam. U niadaŭnim intervju Bloomberg jon taksama skazaŭ, što bačyć sproby schilić Ukrainu da kapitulacyi.

Vystupajučy ŭ Strasburhu, Kałas adkazała na krytyku niekatorych deputataŭ Jeŭraparłamienta, jakija śćviardžali, što Jeŭropa nie maje stratehii dasiahnieńnia miru. Jana zajaviła, što heta nie tak, i nahadała pra dakumient, jaki jana pieradała stalicam krain ES. U im pieraličanyja patrabavańni da Maskvy, vykanańnia jakich Jeŭropa budzie damahacca ŭ miežach budučaha ŭrehulavańnia.

Pavodle słoŭ Kałas, kali Rasija vystaŭlaje maksimalisckija patrabavańni, to Jeŭropa taksama pavinna vykłaści svaje ŭmovy, kab uraŭnavažyć pieramovy i dać Maskvie zrazumieć, što jeŭrapiejskija dziaržavy pavinny ŭdzielničać u pryniaćci rašeńniaŭ, u tym liku nakont mahčymaha źniaćcia sankcyj.

«My nie źbirajemsia addavać usio heta zadarma, bo havorka idzie nie prosta pra mir, a pra tryvały i spraviadlivy mir», — padkreśliła jana.

Kałas abvinavaciła Rasiju ŭ padryvie biaśpieki Čornaha mora praz uzbrojenuju błakadu, vykarystańni charčavańnia ŭ jakaści zbroi i sprobach spravakavać hłabalny hoład. U apošnija tydni Rumynija i Bałharyja paviedamlali pra ŭdary rasijskich bieśpiłotnikaŭ pablizu svaich terytaryjalnych vod.

Jana taksama raskrytykavała Maskvu za admovu ad enierhietyčnaha pieramirja i ŭzmacnieńnie bombavych udaraŭ pa Ukrainie napiaredadni zimy.

«Ukraina choča miru bolš za ŭsich, bo ŭžo čatyry hady žyvie pad bambardziroŭkami, i pačynajecca piaty hod», — zajaviła Kałas.

Jana dadała, što Jeŭropa taksama zacikaŭlenaja ŭ miry, a śćviardžeńni pra advarotnaje niasłušnyja. Pavodle jaje słoŭ, adziny bok, jaki nie choča miru, — heta Rasija.

Kałas zastajecca adnoj z najbolš rezkich jeŭrapiejskich krytykaŭ zbližeńnia Trampa z Maskvoj. Na minułym tydni ŭ intervju Euronews jana nazvała pahadnieńnie ab pastaŭkach dyzielnaha paliva padarunkam Pucinu.

U Brusieli padkreślivajuć, što, niahledziačy na rost roznahałośsiaŭ, supracoŭnictva sa Złučanymi Štatami pavinna praciahvacca, kab upłyvać na mirny praces i abaraniać intaresy Ukrainy.

U aŭtorak vysokapastaŭlenyja pradstaŭniki Jeŭrakamisii, NATA, Hiermanii, Francyi, Vialikabrytanii i Polščy vylecieli ŭ Osła dla ŭdziełu ŭ čarhovym raŭndzie pieramoŭ.

• 6
• 0
• 0
• 0
• 0
• 0
• 0
• 0