Ranicaj 24 sakavika pa darozie na pracu znoŭ zatrymali doktara Rusłana Badamšyna. Pa słovach jaho žonki Taćciany, napiaredadni da ich dadomu prychodziŭ učastkovy, vyklikaŭ «na razmovu» ŭ RUUS. Siońnia, kala 7.30, Rusłan vyjšaŭ z domu i praź niekalki chvilin pazvaniŭ u damafon, paviedamiŭ, što jaho zatrymali, piša Tut.by.
Sa žniŭnia 2020 hoda Rusłana Badamšyna zatrymlivali čatyry razy. Apošni — 14 studzienia, kali jon chvareŭ na COVID-19 i viartaŭsia z palikliniki. Tady sudździa Maksim Trusievič pryznačyŭ jamu 15 sutak aryštu, ale z adterminoŭkaj na miesiac. Dvoje sutak Rusłan pravioŭ u IČU. Kab adbyć pakinuty aryšt, jaho zabrali prosta na pracoŭnym miescy — heta adbyłosia 5 sakavika.
Pa słovach Taćciany, jon pavinien byŭ vyjści 18 sakavika, ale adpuścili muža tolki da viečara 19-ha.
— U studzieni, kali Rusłana zatrymali, da poŭnych dvuch sutak jon niedasiadzieŭ 30 chvilin. Ale jamu «zaličyli» tolki 20 hadzin i adpuścili na dzień paźniej.
Paśla taho jak Rusłan adbyŭ apošni administracyjny aryšt, kožny dzień da jaho dadomu prychodzili nieviadomyja ludzi, ale siamja nie adčyniała dźviery, bo nie viedała, chto heta byŭ, kaža žonka.
— Učora, kali ja adčyniła dźviery, mužčyna, jaki da nas pryjšoŭ, pradstaviŭsia ŭčastkovym i skazaŭ, što choča zaprasić Rusłana na hutarku i padpisać niejkuju papieru, što muž nie budzie ŭdzielničać u Dni Voli. Taksama napiaredadni viečaram da Rusłana prychodzili na pracu.
Siońnia, u rajonie 7 ranicy, kaža Taćciana, na telefon dziciaci patelefanavali ź nieviadomaha numara. Prykładna ŭ 7.30 Rusłan vyjšaŭ na pracu i jaho adrazu ž zatrymali.
— Jon patelefanavaŭ u damafon, skazaŭ: «Tania, mianie zabrali na leśvičnaj placoŭcy, viazuć u aporny punkt». Tudy pajechaŭ baćka Rusłana, u hety čas muža ŭžo sadžali ŭ mašynu. Pryvieźli na Uruckuju, 8 (pa hetym adrasie znachodzicca HAM Pieršamajskaha rajona Minska). Nibyta na hutarku. My telefanavali, pytalisia, kali skončycca hutarka. Nam kazali, što ŭsio moža zaciahnucca. Kali atrymałasia zajści ŭ budynak, dziažurny nam skazaŭ, što Rusłan zatrymany, u dačynieńni da jaho pačaty administracyjny praces, bo «vyjaviŭsia fakt chulihanstva». Ciapier Rusłana viazuć u Pieršamajski RUUS.
U pres-słužbie HUUS Minharvykankama paabiacali ŭdakładnić infarmacyju ab zatrymańni Rusłana Badamšyna i dać kamientar paźniej.
Rusłan Badamšyn — nieŭrołah, u RNPC nieŭrałohii i niejrachirurhii jon pracuje na pasadzie doktara funkcyjanalnaj dyjahnostyki, śpiecyjalizujecca na spadčynnych i nabytych niejramyšačnych zachvorvańniach, u tym liku pracuje z pacyjentami sa SMA. Sa žniŭnia 2020 hoda jon pravioŭ pad aryštam 48 dzion.
Ciapier čytajuć
U Ofisie Cichanoŭskaj pracuje vykładčyk z Danii. Jon raskazaŭ, čamu kinuŭ kamfortnaje žyćcio i zaniaŭsia biełaruskaj spravaj16
Kamientary