Kałony techniki ŭ Słucku i Kałodziščach: rychtujucca nastupać na Ukrainu? Analizujem fota i videa z vajskoŭcami
Biełaruski internet panikuje z nahody źjaŭleńnia fotazdymkaŭ z rehijonaŭ. «U Słucku vajskoŭcy pierasoŭvalisia pa centralnych vulicach horada. Taksama techniku bačyli ŭ Homieli, Navabielickim rajonie, kala vioski Ziabraŭka», — pišuć mnohija pabliki i telehram-kanały. Vajskovuju techniku taksama zaŭvažyli i pad Minskam. Što adbyvajecca?
Hetaja infarmacyja źjaŭlajecca na fonie papiaredžańniaŭ Zachadu ab mahčymym kanflikcie Rasii i Ukrainy, papiarednich zajavaŭ Łukašenki, što ŭ takim vypadku «Biełaruś u baku nie zastaniecca», a taksama anansavanych biełaruska-rasijskich vučeńniaŭ.
U kamientaryjach razvažajuć pra toje, ci nie pačała Rasija pierakidvać vojski i ŭ Biełaruś, ci nie pačali i my źbirać vojski la miažy z Ukrainaj.
«Naša Niva» pakazała fota, što napałochali karystalnikaŭ, vajennamu ekśpiertu. Voś što jon kaža.
«Na technicy čyrvona-zialonyja ściahi, što ŭkazvaje na prynaležnaść, — kaža ekśpiert. — Možna było b dapuścić, što dla rasijan nie ŭjaŭlaje prablemy pieramalavać simvoliku, ale rasijskija vajennyja takoj techniki ŭžo nie vykarystoŭvajuć, heta biełarusy.
Technika inžyniernaja, šmat ekskavataraŭ. Mahčyma, što buduć budavać niešta ŭ mirnych metach. Bo ŭ nas jość takaja praktyka: maŭlaŭ, sałdatam usio adno treba vučycca heta rabić, a kali ŭ niekim rajonie treba niešta pabudavać, vyryć — mety jak by supadajuć, voś i sumiaščajuć.
Inšaja prajekcyja: u nas na poŭdni krainy mała što abstalavana, z ulikam siońniašniaj zajavy pra vučeńni z ruskimi, jasny kirunak vučeńniaŭ. Imavierna, pačynajuć rychtavacca i abstaloŭvać.
Taksama dapuskaju, što hetaja technika dla taho, kab padrychtavać kamandny punkt Paŭdniovaha apieratyŭnaha kiravańnia, jakoje stvoranaje adnosna niadaŭna i tolki na papiery, u adroźnieńnie ad dvuch inšych. Adbyłosia heta paśla taho, jak Ukraina pierastała być adnaznačnym siabram. Na fonie situacyi ŭ rehijonie łunajuć dumki, kab raźmiaścić na poŭdni niešta realnaje».
Ale razam z hetym paviedamlajecca pra zusim inšyja vojski, jakija jeduć ešałonami z vahonami «RŽD» — rasijskaj čyhunki. Adzin z takich ešałonaŭ nibyta źniali ŭ Kałodziščach.
«Na hetym videa šmat KAMAZaŭ — a heta ŭžo asnoŭnaja kołavaja baza rasijskaha vojska. U KUNHach (kuzaŭ univiersalny narmalnaha habarytu) ža moža być što zaŭhodna — ad ramontnaj majsterni da vyviedvalnaj aparatury. I taksama zasmučaje vahon «RŽD», — kaža vajenny.
Zvyčajna, u zaležnaści ad radoŭ vojskaŭ, prybyćcio ruskich da vučeńniaŭ pačynałasia za dva tydni i ažno da aktyŭnaj fazy.
Tamu hetyja ešałony dziŭna hladziacca na fonie siońniašniaj zajavy Łukašenki, što vučeńni buduć u lutym biez kankretnaj daty.
«Dakładnuju datu vyznačajcie, paviedamlajcie, kab nas nie abvinavačvali, što my tut vojski ściahnuli», — skazaŭ jon. A kali ruskija ŭžo pajechali, značyć što vahony byli pahružany da taho, jak jon skazaŭ pra vučeńni, i data ŭžo vyznačanaja ŭ miežach pary tydniaŭ, — ličyć vajenny. — Tradycyjna ŭ nas vučeńni pravodziacca ŭ pieršaj pałovie lutaha, prosta ŭ hety raz budzie bolšy, čym zvyčajna, maštab.
Heta taki typavy płan padrychtoŭki ŭzbrojenych siłaŭ, jon nie mianiajecca ad hoda ŭ hod. U vieraśni taksama vučeńni. I ŭ zachodnikaŭ, u pryncypie, taksama — bolšaja dola vučeńniaŭ, jakimi tut sprabujuć pałochać narod, prachodziać štohod u adzin i toj ža čas, z padvodam vojskaŭ».
Kamientary