Redki vypadak: pamiłavany biełaruski palitviazień pajšoŭ na vajnu suprać Ukrainy

Były palitviazień Alaksiej Koršun, jakoha ŭ 2022 hodzie Rasija vydała biełaruskim siłavikam, ciapier, miarkujučy pa dopisach jahonaj žonki ŭ sacsietkach, vajuje na baku Rasii suprać Ukrainy.

Vałhahradskaja manikiurščyca Anžeła Koršun vykłała jahonyja fotazdymki ŭ formie rasijskaha vojska z podpisam: «Šalona hanarusia svaim hierojem. Najlepšy mužčyna na śviecie, ja strašna ciabie kachaju i čakaju chutčej dadomu. Ja abiacaju, što budu ŭśmichacca i žyć paŭnavartasnym žyćciom. Čakać, vieryć i malicca! Ty maja samaja nadziejnaja apora, ty moj honar, ty moj hieroj».

Termin źniavoleńnia za kamientar pra karanavirus

Alaksieju Koršunu 30 hadoŭ. Pavodle infarmacyi pravaabaroncaŭ, mužčyna z Oršy, ale ŭ jaho samoha Ukantakcie rodnym horadam staić Połack.

Koršuna aryštavali ŭ sakaviku 2021 hoda za kamientar pra karanavirus, napisany padčas pieršaj chvali epidemii. U tekście havaryłasia, što ŭłady chłusiać u statystycy zachvorvańniaŭ. Zapis paličyli raspalvańniem varožaści.

Koršunu prysudzili 2,5 hoda kałonii, ale jamu pašancavała trapić pad pamiłavańnie ŭ vieraśni 2021 hoda. Mahčyma, uličyli, što jaho niaviesta tolki-tolki naradziła.

Ale pamiłavańni tady byli nie takija, jak ciapier. Koršuna nie zusim adpuścili dadomu, a tolki pieraviali na chimiju. Palitviazień pracavaŭ hruzčykam u miascovym sielpo.

Pa jaho słovach, namieśnik načalnika chimii pastaviŭ jamu ŭltymatum: albo pa-chutkamu atrymać parušeńni i viarnucca ŭ kałoniju, albo ŭciakać z krainy.

Vosieńniu 2021 hoda Koršun źbieh. Kab navieści milicyju na padmanny śled, jon svoj telefon padkinuŭ u aŭtobus, što išoŭ u inšy kaniec krainy, a sam pajechaŭ u Viciebsk. Nastupnaha dnia biez dakumientaŭ jon pierasiek rasijskuju miažu aŭtobusam.

Spačatku Koršun asieŭ u Smalensku, dzie raniej žyŭ z byłoj dziaŭčynaj-rasijankaj i dziciom. Potym pravaabaroncy z «Bajsoła» pieravieźli jaho ŭ Biełharad, adkul płanavali pierapravić va Ukrainu. Ale 24 lutaha 2022 hoda pačałasia vajna. Atrymać prytułak u Hruzii taksama nie ŭdałosia, i Koršun pierajechaŭ u Varoniež, dzie ŭładkavaŭsia ŭ aŭtaservis.

Pavialičyć

Departacyja

21 červienia 2022 hoda rasijskaja DAI spyniła taksi, u jakim jechaŭ Koršun. Dakumientaŭ u jaho nie było, a ŭ pastarunku vyśvietliłasia, što jon u vyšuku.

Biełarus sprabavaŭ atrymać prytułak, ale atrymaŭ admovu. U kastryčniku 2022 hoda Koršuna vysłali samalotam u Minsk.

U Biełarusi sud zamianiŭ jamu chimiju na kałoniju — ale, pavodle zakanadaŭstva, nieadbyty termin jamu skaracili ŭdvaja. Niezrazumieła, ci dadali jamu niejkaje pakarańnie za ŭcioki z chimii.

Koršun adbyvaŭ pakarańnie ŭ kałonii №17 u Škłovie. Pavodle «Viasny», 20 žniŭnia 2023 hoda jon vyjšaŭ na volu, całkam adbyŭšy termin.

Ciapier — u rasijskaj formie

Pavialičyć

Paśla vyzvaleńnia biełarus, miarkujučy pa sacsietkach, čarhovy raz pierabraŭsia ŭ Rasiju i adkryŭ aŭtaservis.

Adnak paźniej, pa słovach Koršuna, u jaho ŭźnikli prablemy ź lohkimi. Miedyki zabaranili jamu zajmacca aŭtamalarnymi pracami. Tady biełarus kupiŭ zakinuty ŭčastak i pačaŭ budavać dom. Adnačasova jon vioŭ dačny błoh.

Zrešty, impetu chapiła nienadoŭha. Skončyłasia ŭsio padpisańniem kantraktu z rasijskaj armijaj.

Pakul što jon žyvy.

• 4
• 4
• 5
• 65
• 1
• 2
• 32
• 0