Byłoha biełaruskaha milicyjaniera złavili ŭ Bielhii pry sprobie rabavańnia kramy
Biełarusa zatrymali za «kradziež z užyvańniem hvałtu». Jon śćviardžaŭ, što jon ni pry čym: raniej słužyŭ u milicyi i nie maje sudzimaściaŭ. Ale hetyja arhumienty nie dapamahli jamu paźbiehnuć vysyłki i trochhadovaj zabarony na ŭjezd.
Incydent adbyŭsia 25 studzienia 2026 hoda ŭ bielhijskim horadzie Piurs-Sint-Amands. Pavodle palicyi, biełarusa złavili na miescy kradziažu z užyvańniem hvałtu, to-bok rabavańnia. Padrabiaznaści nie paviedamlajucca. Jaho imia i proźvišča ŭ apublikavanym sudovym rašeńni taksama schavanyja.
U sudzie mužčyna vykłaŭ inšuju viersiju padziej. Pavodle jaho, butelku ŭ kramie skraŭ kaleha. Sam biełarus nibyta pra heta nie viedaŭ i hvałtu nie ŭžyvaŭ. Jon nastojvaŭ, što jaho zatrymali vypadkova: byŭ pobač i razmaŭlaŭ na toj ža movie, što i znajomy.
U svaju abaronu mužčyna taksama spasyłaŭsia na minułuju słužbu ŭ biełaruskaj milicyi. Da skarhi jon prykłaŭ dakumienty, daviedku ab adsutnaści sudzimaściaŭ.
Adnak prablemy byłoha milicyjanta nie abmiežavalisia abvinavačańniem u kradziažy. U toj ža dzień mihracyjnyja ŭłady pastanavili vysłać jaho z krainy i zabaranić ujezd u Šenhienskuju zonu na try hady. Jany paličyli jaho pavodziny pahrozaj hramadskamu paradku. Taksama akazałasia, što na momant zatrymańnia jon nie mieŭ dziejnaj vizy ci dazvołu na pražyvańnie.
Biełarus pasprabavaŭ asprečyć hetyja rašeńni. Ale 15 lipienia sud adchiliŭ jaho arhumienty. Vysyłka i zabarona na ŭjezd zastalisia ŭ sile. Byłomu milicyjantu taksama daviadziecca apłacić 502 jeŭra sudovych vydatkaŭ.
Ciapier čytajuć
Jamu vybili čatyry zuby, a paśla vykinuli z krainy. Ciapier byłoha palitviaźnia aryštavali ŭ Łatvii z šaściu mihrantami ŭ mašynie14
Kamientary
- Da ładna, ja sam milicanier.
[Zredahavana]
[Zredahavana]