Były kiraŭnik Google: Rasija zdahaniaje Ukrainu ŭ vajskovych technałohijach, a resursaŭ u jaje našmat bolš. Hałoŭnym vyklikam budzie «Rasśviet»

Šmit parazmaŭlaŭ u Kijevie z hałoŭnaj redaktarkaj The Economist Zani Mintan Biedas. Jon raskazaŭ pra technałahičnuju honku Rasii i Ukrainy, budučyniu vajny z vykarystańniem štučnaha intelektu, prablemy zachodnich armij i mahčymuju rolu ŭkrainskich technałohij u pieraŭzbrajeńni Jeŭropy.

Rasija ŭžo ŭdaskanalvaje zbroju z chutkaściu Ukrainy

Raniej, pavodle Šmita, ličyłasia, što Ukraina chutka stvaraje novyja rašeńni, a Rasija zastajecca vialikaj, ale marudnaj sistemaj. Ciapier situacyja źmianiłasia.

«Rasija ŭdaskanalvajecca prykładna z toj ža chutkaściu, što i Ukraina, ale ŭ jaje značna bolš resursaŭ», — zajaviŭ jon.

Šmit nazvaŭ adrazu niekalki pahroz, ź jakimi sutyknułasia Ukraina:

• balistyčnyja rakiety, suprać jakich nie chapaje rakiet dla sistem Patriot;
• reaktyŭnyja «Šachiedy», jakija lotajuć chutčej i vyšej za raniejšyja madeli;
• mahčymuju novuju mabilizacyju ŭ Rasii;
• rasijskuju spadarožnikavuju sistemu «Rasśviet», padobnuju da Starlink;
• udaskanalenyja płaniernyja avijabomby ź indyvidualnym naviadzieńniem.

Na dumku Šmita, z kožnaj z hetych pahrozaŭ paasobku Ukraina mahła b spravicca. Ale adnačasova supraćstajać usim im bieź istotnaj dapamohi Zachadu budzie amal niemahčyma.

Šmit miarkuje, što adnoj mužnaści i technałahičnaj vynachodlivaści Ukrainie niedastatkova. Hałoŭnaja prablema — niemahčymaść chutka naładzić masavuju vytvorčaść nieabchodnaj zbroi.

«Ukrainie patrebnyja hrošy. Litaralna hrošy. Pa-druhoje, joj patrebnaja dapamoha ŭ naroščvańni mahčymaściaŭ. Va ŭkraincaŭ jość mužnaść, kab pieramahčy abo praciahvać baraćbu, ale samastojna dasiahnuć nieabchodnych maštabaŭ jany nie mohuć», — skazaŭ jon.

Na dumku Šmita, Zachadu nie treba pasyłać va Ukrainu svaich vajskoŭcaŭ. Dastatkova dać joj finansavańnie, technałohii i mahčymaść pavialičyć vypusk uzbrajeńniaŭ.

Bolš za pałovu «Šachiedaŭ» užo mohuć być reaktyŭnymi

Šmit pryznaŭ, što nie čakaŭ nastolki chutkaha pierachodu Rasii da reaktyŭnych bieśpiłotnikaŭ. Spačatku mierkavałasia, što novyja ruchaviki atrymajuć kala 10% «Šachiedaŭ», adnak ciapier, pavodle jaho, imi abstalavana bolš za pałovu takich dronaŭ.

Da taho ž Rasija stvaryła z kitajskich kampanientaŭ ułasnuju sietku suviazi pamiž bieśpiłotnikami. Niekatoryja drony mohuć kružyć pamiž Biełaruśsiu i Kijevam, vykonvajučy rolu retranślataraŭ i pieradajučy rasijanam videa celi ŭ vysokaj jakaści.

«Jość paviedamleńni pra płany vykarystać da 80 000 takich reaktyŭnych «Šachiedaŭ» suprać Kijeva i inšych haradoŭ da kanca śniežnia. Heta surjoznaja prablema. Urad tut nadaje joj vielizarnuju ŭvahu. Ja viedaju pra niekalki raspracovak, jakija, imavierna, spracujuć», — kaža jon. 

Pavodle Šmita, nie mienš za piać ukrainskich kampanij užo raspracavali srodki supraćdziejańnia reaktyŭnym «Šachiedam», jakija ciapier vypraboŭvajucca. 

Rasijski anałah Starlink moža źjavicca praz hod

Šmit miarkuje, što dla zapusku paŭnavartasnaj rasijskaj spadarožnikavaj sistemy «Rasśviet» spatrebicca jašče kala hoda. Kali jana zapracuje, pieraškodzić jaje vykarystańniu budzie vielmi składana.

Takaja sietka dazvoliła b Rasii atrymlivać suviaź i navodzić zbroju praktyčna ŭ luboj častcy Ukrainy.

Adnačasova Ukraina nie moža karystacca Starlink dla naviadzieńnia zbroi pa celach na terytoryi Rasii. Pavodle Šmita, techničnaj pieraškody dla hetaha niama — havorka idzie pra palityku SpaceX i rašeńnie amierykanskich uładaŭ.

Sam Šmit vystupaje za toje, kab dać Ukrainie takuju mahčymaść.

Mašynnaje zrokavaje naviadzieńnie — heta jašče nie štučny intelekt

Šmit źviarnuŭ uvahu, što technałohii, jakija ciapier časta nazyvajuć vajskovym štučnym intelektam, u bolšaści vypadkaŭ źjaŭlajucca sistemami mašynnaha zroku.

Jany dapamahajuć zbroi raspaznać cel i dakładna trapić u jaje na apošnim etapie palotu. Ale takaja sistema nie vučycca samastojna i tamu nie źjaŭlajecca paŭnavartasnym štučnym intelektam.

Sapraŭdny ŠI, pavodle Šmita, u budučyni zmoža analizavać adkrytyja, sakretnyja i raźviedvalnyja źviestki, prapanoŭvać hienierałam varyjanty raźmiaščeńnia sił, znachodzić pryčyny niaŭdač i pradkazvać prablemy.

Pakul takija technałohii tolki pačynajuć vykarystoŭvać na vajnie.

Šmit ličyć niebiaśpiečnaj poŭnuju pieradaču vajennych rašeńniaŭ štučnamu intelektu. Jon pryvioŭ prykład sistemy, jakoj dyktatar moh by prosta zahadać napaści na inšuju krainu i paviedamić jamu pra zakančeńnie vajny.

«Ujavicie, što ja zły dyktatar ź idealnaj sistemaj ŠI. Ja kažu: «Napadzi na hetuju krainu. Paviedami, kali skončyš». Heta ŭvieś moj zahad. Sistema mahła b rabić usio, što paličyła b darečnym. Jana mahła b u tym liku ździajśniać masavyja vajennyja złačynstvy. Jana mahła b źniščać mirnych žycharoŭ i infrastrukturu abo atakavać krainu, jakaja nie ŭdzielničaje ŭ kanflikcie, kab dapiačy pieršaj. Jana mahła b prydumać samyja roznyja niedarečnyja abhruntavańni», — kaža jon.

«Čałaviek pavinien udzielničać u pryniaćci kožnaha vajennaha rašeńnia», — padkreśliŭ Šmit.

Zachodnija vojski razumiejuć pieramieny, ale nie chočuć mianiacca

Šmit vosiem hadoŭ pracavaŭ daradcam amierykanskich uzbrojenych sił. Pavodle jaho, mnohija ŭ Pientahonie razumiejuć, jak źmianiłasia vajna, ale vajskovaja sistema nadzvyčaj pavolna prymaje novyja rašeńni.

Na jaje ŭpłyvajuć Kanhres, łabisty i pradpryjemstvy, jakija zaležać ad starych i darahich abaronnych prahram. Kamandziry taksama nie chočuć ryzykavać žyćciom vajskoŭcaŭ dziela jašče nie pravieranych technałohij.

Padobnaja prablema isnuje i ŭ Jeŭropie. Jeŭrapiejskija vojski praciahvajuć układvać hrošy ŭ tradycyjnyja sistemy, choć im niestaje rakiet-pierachopnikaŭ, a sučasnaja vajna patrabuje tańniejšych dronaŭ, aŭtamatyčnaha naviadzieńnia i novych srodkaŭ supraćpavietranaj abarony.

«U jeŭrapiejcaŭ, ź jakimi ja razmaŭlaju, taja ž prablema, što i ŭ amierykancaŭ. Jany vielmi razumnyja i ŭsio razumiejuć, ale sistema nie stvoranaja tak, kab mianiacca.

U bolšaści jeŭrapiejskich krain uzbrojenyja siły pracujuć jak prahramy zabieśpiačeńnia zaniataści. Hetyja pracoŭnyja miescy važnyja, ja nie admachvajusia ad ich. Ale vajskoŭcy stvarajuć nie toje, što patrebna.

Zachavajcie svoj biudžet abo navat pavialičcie jaho. Prosta stvarajcie bolš efiektyŭnyja sistemy, tamu što jany vam spatrebiacca. U Jeŭropy vielizarnaja prablema z supraćrakietnaj abaronaj. Pa roznych pryčynach rakiet Patriot, na jakija jana raźličvaje, niama ŭ dastatkovaj kolkaści. Kali pahladzieć na zachodnija zapasy rakiet, ich u nas niedastatkova», — kaža jon.

Vajna va Ukrainie daje Zachadu dośvied, jakoha niama ŭ Kitaja

Na dumku Šmita, Kitaj vałodaje vialikimi vytvorčymi mahčymaściami, ale nie ŭdzielničaŭ u bujnoj vajnie kala 50 hadoŭ. Tamu kitajskaje vojska moža nie mieć taktyčnaha dośviedu, jaki Ukraina atrymlivaje štodnia.

Jon miarkuje, što mahčymy kanflikt vakoł Tajvania ŭ značnaj stupieni staŭ by vajnoj dronaŭ i bieśpiłotnych karabloŭ, a nie tradycyjnych fłatoŭ ź vialikimi karablami i avijanoscami.

Pry hetym Šmit nie čakaje, što ZŠA abo Kitaj pahodziacca prypynić raźvićcio štučnaha intelektu. Takuju damoŭlenaść było b amal niemahčyma pravieryć.

• 1
• 0
• 0
• 0
• 1
• 1
• 0
• 0