Hienieralny sakratar NATA Stołtenberh zajaviŭ pra najbujniejšaje razhortvańnie vojskaŭ Rasii ŭ Biełarusi. Pavodle jaho źviestak, Maskva pierakinuła ŭ susiedniuju krainu sučasnaje ŭzbrajeńnie i kala 30 000 vajskoŭcaŭ.
Za apošnija dni Rasija pierakinuła ŭ Biełaruś bajavyja častki ŭ kolkaści kala 30 tysiač sałdat i sučasnaje ŭzbrajeńnie, zajaviŭ u čaćvier hienieralny sakratar NATA Jens Stołtenbierh. Pavodle jaho słoŭ, heta stała najbujniejšym vajennym razhortvańniem rasijskich vojskaŭ u Biełarusi z časoŭ zakančeńnia chałodnaj vajny, paviedamlaje Deutsche Welle.
Vystupajučy pierad žurnalistami ŭ Bruseli, Stołtenbierh udakładniŭ, što Maskva pierakinuła ŭ Biełaruś, u pryvatnaści, padraździaleńni śpiecnaza, a z techniki — źniščalniki Su-35, rakietnyja sistemy padvojnaha pryznačeńnia (pryznačanyja dla viadzieńnia jak zvyčajnaj, tak i jadziernaj vajny) «Iskander» i kompleksy SPA S-400.
«Usio heta adbyvajecca paralelna sa štohadovymi vučeńniami jadziernych sił RF», — dadaŭ kiraŭnik aljansu.
U toj ža čas u Kijevie chočuć vieryć, što paśla rasijska-biełaruskich vučeńniaŭ rasijskija vojski pakinuć Biełaruś.
«My spadziajomsia, što znachodžańnie rasijskich vojskaŭ budzie časovym, i pa zakančeńni vučeńniaŭ jany vyjduć z terytoryi Biełarusi, — zajaviŭ ministr abarony Ukrainy Alaksiej Reźnikaŭ. — Našy Uzbrojenyja siły, pamiežniki, Nachvardyja, palicyja, Słužba biaśpieki Ukrainy hatovyja. My nazirajem va ŭsich piaci abłaściach, jakija miažujuć ź siabroŭskaj nam Respublikaj Biełaruś. Adpaviedna, my adaptavanyja da źmieny situacyi».
Raniej u toj ža dzień Minabarony RF paviedamiła ab tym, što ŭ ramkach vučeńniaŭ u Biełaruś dastaŭlenaja sistema SPA dalokaha dziejańnia S-400 «Tryumf» i rychtujecca zastupić na bajavoje dziažurstva na palihonie pad Brestam.
Siońnia ŭ Minsk prybyŭ rasijski ministr abarony Siarhiej Šajhu, jaki sustreŭsia z Alaksandram Łukašenkam. Vučeńni zapłanavanyja na 10—20 lutaha.
Čytajcie taksama:
Łukašenka raskazaŭ pra asnoŭnuju metu biełaruska-rasijskich vučeńniaŭ
«Jana daŭnavata ŭ Biełarusi». Baćka Anžaliki Mielnikavaj pryznaŭsia, što jana žyvaja i zdarovaja90
Kamientary