Chłopca, jaki zastupiŭsia ŭ homielskim tralejbusie za 11‑hadovuju dziaŭčynku, znajšli, a jaje kryŭdziciela zatrymali
U kancy sakavika mama homielskaj školnicy raskazała ŭ Threads, što ŭ tralejbusie da jaje 11‑hadovaj dački čaplaŭsia nieznajomy mužčyna. U situacyju, ź jaje słoŭ, umiašaŭsia inšy pasažyr — małady chłopiec, jaki vyjšaŭ ź dziaŭčynkaj na jaje prypynku i adpudziŭ nieznajomca. Žančyna chacieła adšukać chłopca, kab adździačyć jamu. Praz peŭny čas stała viadoma: vyratavalnik znajšoŭsia, a mužčyna, jaki čaplaŭsia da dziaŭčynki, zatrymany, piša «Anłajnier».
Incydent adbyŭsia dniom 31 sakavika ŭ tralejbusie, jaki išoŭ pa maršrucie praz univiermah «Homiel» i stadyjon «Łakamatyŭ». Voś što raskazaŭ karespandentu «Biełaruś 4» chłopiec, jaki vyratavaŭ dziaŭčynku:
«Spačatku mnie padałosia, što heta zvyčajnaja razmova. Mužčyna pradstaŭlaŭsia znajomym baćkoŭ, kazaŭ, što dziaŭčynka jaho prosta zabyłasia. Ale ŭ vyniku ja ŭbačyŭ samu dziaŭčynku: jaje vočy, ruki, jakija treślisia, — i ŭžo było zrazumieła, što niešta nie tak. Ja ŭklučyŭsia ŭ hety kanflikt u momant pieradačy cukierki dziaŭčyncy, jakaja ŭžo całkam razhubiłasia i nie viedała, što joj rabić. Paśla hetaha byŭ užo nievialiki kanflikt z samim mužčynam: jon adharodžvaŭ mianie ad dziaŭčynki, kazaŭ joj zastavacca na miescy».
Vyratavalnikam akazaŭsia chłopiec pa imieni Ivan — student miascovaj VNU. Jon vyjšaŭ razam ź dziaŭčynkaj na jaje prypynku. Peŭny čas nieznajomiec praciahvaŭ iści za imi śledam, ale paśla taho, jak chłopiec vyrašyŭ padyści da jaho i spytać, u čym sprava, toj raźviarnuŭsia i pajšoŭ u advarotny bok.
Ivan pravioŭ školnicu da samaha doma, a taksama paśpieŭ źniać na mabilny telefon nadakučlivaha nieznajomca. Jaho ŭžo zatrymała milicyja.
«Hramadzianin ustanoŭleny, ź im viadziecca rabota ŭ adpaviednaści z zakanadaŭstvam», — raskazaŭ načalnik Savieckaha RAUS Homiela Uładzimir Saŭčanka.
Hetuju historyju burna abmiarkoŭvali ŭ sacsietkach. Karystalniki zhadvali padobnyja historyi sa svajho dziacinstva, ale ŭ asnoŭnym chvalili chłopca za jaho ŭčynak, źviartajučy ŭvahu na toje, što heta «viartaje vieru ŭ čałaviectva» i što «chłopiec — sapraŭdny mužčyna».
«Chočam prosta skazać dziakuj». U Homieli šukajuć chłopca z tralejbusa
Dziaŭčyncy ŭ 12 hadoŭ skazali, što jana nie rodnaja, i viarnuli ŭ prytułak. Jaje mama: «Ja nie spraviłasia»
Mańjaka z Koŭna hieraična zatrymali prostyja haradžanie
U Koŭnie šukajuć mańjaka, jaki zabiŭ dźviuch maładych dziaŭčat, a da kvatery treciaj nie dajšoŭ
«Jany kašmaryli ŭsich». Susiedzi pra siamju Lipskich, jakija «płanavali zabojstva bolš za 40 čałaviek»
Kamientary