Źjavilisia kadry z kamiery Andreja Zielcera, jakija nie publikavalisia raniej
Na BT pakazali kadry z kamiery Andreja Zielcera, jakija nie publikavali raniej. Na ich — toje, što adbyvałasia da prychodu siłavikoŭ i pierad samym pačatkam pierastrełki.
Na videa Zielcer pierahavarvajecca z žonkaj, jakaja zdymaje na telefon.
Videa vyšej zmanciravana ŭ adno ź niekalkich kadraŭ, što pakazali ŭ efiry dziaržTB
— Ja nie mahu ŭ vobłaka vykłaści, jano na telefonie zastaniecca, — kaža Maryja na tych kadrach.
— U telehram pasyłaj, — adkazvaje chłopiec.
I krychu paźniej nastupny dyjałoh.
— Vyšli toje, što ŭžo jość, — źviartajecca da žonki Andrej
— Tak, adsyłaju.
Hetaja razmova adbyłasia da ŭvarvańnia atrada ŭ kvateru. Kadraŭ z telefona žonki pry hetym nie pakazali.
U siužecie siłaviki śćviardžajuć, što Zielcer, pačuŭšy, što jany łomiacca ŭ dźviery, padyšoŭ da ŭvachodu i zamknuŭ dźviery jašče na adzin zamok.
Adzin z aficeraŭ hrupy «A» KDB kaža, što jany pabačyli paśla niekalki chvilin paśla strełu: «Na łožku ružžo, tam ža pačak na 25 patronaŭ da hetaha ružža, u kišeniach u hetaha mužčyny taksama byli patrony».
Nahadajem, što Andrej Zielcer — heta 31-hadovy prahramist EPAM, jaki adkryŭ ahoń u supracoŭnikaŭ KDB, što vybili dźviery jaho kvatery, kab pravieści pieratrus. Uzbrojeny palaŭničaj strelbaj, Zielcer zabiŭ aficera dziaržbiaśpieki, pierš čym jaho samoha zastrelili.
Udavu Zielcera Maryju Uśpienskuju aryštavali pa padazreńni ŭ pasobnictvie mužu, i dahetul trymajuć u turmie, pryčym jaje maci nie atrymała ad jaje nivodnaha piśma.
Za raźmiaščeńnie kamientaroŭ z asudžeńniem dziejańniaŭ kadebistaŭ i ŭchvaleńniem učynku Zielcera było aryštavana nie mienš za 136 čałaviek. Pieršy z aryštavanych užo atrymaŭ za svaje dziejańni dva hady kałonii.
Dziaržaŭnaja prapahanda taksama vykarystała trahiedyju dla nahniatańnia varožaści da palityčnych praciŭnikaŭ Alaksandra Łukašenki i apraŭdańnia masavych aryštaŭ.
Matyvy dziejańniaŭ Andreja Zielcera dahetul da kanca niajasnyja, jak i toje, dla čaho jon z žonkaj zapisvaŭ svaje dziejańni na videa. Niajasnaj zastajecca i pryčyna pieratrusu ŭ kvatery Zielcera. Vobšuki ŭ hramadzianskich aktyvistaŭ u 2021 hodzie adbyvalisia tysiačami, ale čamu pryjšli taksama da Zielcera, niezrazumieła. Ën nie byŭ palityčnym aktyvistam.
Śviatło mahła b pralić udava zahinułaha.
«Na 28 vieraśnia 2021 hoda była zapłanavanaja nie śpiecapieracyja, a adpracoŭka kankretnych adrasoŭ: pieratrusy, zatrymańni, — havorycca ŭ materyjałach dziaržaŭnych ŚMI. — Adrasoŭ, dzie mahli znachodzicca asoby, datyčnyja da terarystyčnaj dziejnaści».
Kamientary