Minskaje «Dynama» pieramahło «Słaviju», žodzinskaje «Tarpieda» sastupiła treci raz zapar. Vyniki matčaŭ suboty ŭ vyšejšaj lizie
Staličny hrand da 65-j chviliny sastupaŭ u Mazyry, adnak zdoleŭ aformić valavuju viktoryju i druhi raz zapar pieramoh u haściach. Tady jak žodzinskaje «Tarpieda», jakoje pierad startam siezona budavała čempijonskija płany, znoŭ paciarpieła parazu i apuściłasia na dno tablicy.
Napačatku pieršynstva mazyranam vypała zmahacca amal z usimi topami minułaha siezona. BATE jany ŭ debiutnym tury sastupili, a voś «Homiel» paśla pieramahli. Tamu sustreča z bronzavym pryzioram-2021 padnačalenych Michaiła Marcinoviča nie tak užo i pałochała.
Hoł Pataročy na 26-j chvilinie ŭvohule dazvoliŭ palešukam pavieryć u cud. Adnak paśla pierapynku kłas «Dynama» ŭsio ž adbiŭsia: Bakič, jaki vyjšaŭ na zamienu, i Bykaŭ zdabyli pieramohu dla minčukoŭ.
A voś «Enierhietyk» paśla dźviuch pieramoh zapar ź likam 3:1 niečakana spatyknuŭsia ŭ sustrečy sa «Słuckam». Paśla hoła ź pienalci, prapuščanaha ŭ siaredzinie pieršaha tajma, minčuki nijak nie mahli znajści šlachi da bramy supiernika. I tolki dziakujučy vysiłkam Paparyhi na 66-j chvilinie ŭratavali ničyju. Adznačym, što ŭpieršyniu ŭ čempijanacie nie adznačyŭsia jaho lepšy snajpier Abdzichalikaŭ.
Subotniuju prahramu tura zaviaršyła sustreča «Minska» dy «Tarpieda»-BiełAZa. Žodzincy pierad pačatkam siezona nazyvalisia adnymi ź jaho favarytaŭ. Adnak śledam za parazami ad «Enierhietyka» dy «Viciebska» zaznali niaŭdaču i ŭ zmahańni sa staličnymi junakami. Adziny hoł zabiŭ Jahor Bahamolski i staŭ aŭtaram 500-ha hoła minčukoŭ u elitnym dyvizijonie.
Hałoŭnamu trenieru «Tarpieda» Dźmitryju Mołašu, biezumoŭna, patrebien čas, kab pabudavać kamandu, jakuju jon tolki ŭzimku uznačaliŭ. Adnak ci chopić ciarpieńnia ŭ ambicyjnaha kiraŭnictva tryvać niaŭdačy — dy jašče takija kryŭdnyja?
Nahadajem, što tur praciahniecca ŭ niadzielu sustrečami «Nioman» — «Dynama» (Brest), «Dniapro» — BATE, «Isłač» — «Šachcior», a ŭ paniadziełak zhulajuć pary «Arsienał» — «Viciebsk» dy «Biełšyna» — «Homiel».
«Naša Niva» adnaŭlaje zbor danataŭ — padtrymać prosta
Bankructva kłubaŭ, ucioki hulcoŭ. Jak dehradavaŭ biełaruski futboł
Ciapier čytajuć
«U takuju ž haleču, dy jašče i chałodnuju, pakistancy nie pajeduć». Biełarus piać tydniaŭ pravioŭ u Pakistanie — voś što jaho ŭraziła27
Kamientary