Pakul śviet zasiarodžany na inflacyi i vojnach, u Paŭdniovaj Karei novy vorah — vypadzieńnie vałasoŭ
U Paŭdniovaj Karei strata vałasoŭ stała pradmietam surjoznych palityčnych debataŭ. Čamu lidar krainy pryraŭnoŭvaje baraćbu z vypadzieńniem vałasoŭ da «pytańnia vyžyvańnia» i aktyŭna prasoŭvaje ideju dziaržaŭnaj padtrymki hramadzian, jakija sutyknulisia z hetaj prablemaj, tłumačyć The Wall Street Journal.
Padčas narady pa pytańniach dziaržaŭnaj palityki prezident Paŭdniovaj Karei Li Čže Mion, jaki sam vałodaje pyšnaj fryzuraj, spytaŭ u ministra achovy zdaroŭja krainy, ci možna ličyć vypadzieńnie vałasoŭ chvarobaj i ci moža dziaržaŭnaje miedycynskaje strachavańnie pakryvać lačeńnie hetaj prablemy.
Kali jamu adkazali, što abłysieńnie zvyčajna ličycca estetyčnaj prablemaj i apłačvajecca z ułasnaj kišeni, Li zaŭvažyŭ, što dla častki maładych ludziej vałasy, što radziejuć, — heta nie drobiaź, a «pytańnie vyžyvańnia».
Li Čže Mion źviartajecca da hetaj temy nie ŭpieršyniu. Jon užo abiacaŭ zrabić lačeńnie abłysieńnia dastupnym pa strachoŭcy padčas pieradvybarčaj kampanii 2022 hoda. Viarnuŭšysia da hetaj idei ciapier, kiraŭnik krainy imkniecca znajści vodhuk u maładych vybarščykaŭ, jakija ŭsio bolš vostra adčuvajuć sacyjalny i psichałahičny cisk.
Źniešnaść — forma sacyjalnaha kapitału
Jak adznačaje WSJ, takaja niezvyčajnaja dla suśvietnaj palityki ŭvaha da vałasoŭ abumoŭlena śpiecyfičnaj kulturaj Paŭdniovaj Karei, jakaja viadomaja jak adna z suśvietnych stalic industryi pryhažości: ad idałaŭ K-pop da šmatstupieńčatych sistem dohladu i raźvitaj śfiery płastyčnaj chirurhii.
Unutry krainy heta nie prosta vialiki rynak, a častka sacyjalnaha paradku, dzie źniešnaść časta razhladajecca jak forma sacyjalnaha kapitału.
U karejskim hramadstvie šyroka ŭžyvajecca paniaćcie «łukizm» — pieravaha, jakuju atrymlivajuć ludzi, što adpaviadajuć standartam pryvabnaści. U krainie raspaŭsiudžanym źjaŭlajecca vyraz «tvaja źniešnaść — heta taksama kvalifikacyja». Amal na ŭsie vakansii, navat na padpracoŭku barysta, da ankiety kandydata abaviazkova patrabujecca dadać fotazdymak.
Daśledčyki tłumačać: Paŭdniovaja Kareja — adna z najmienš etnična raznastajnych krain śvietu, tamu standarty pryhažości mohuć być bolš vuzkimi i žorstkimi, čym u šmatetničnych hramadstvach, a źniešnaść u vyniku časam pačynaje pracavać jak pakazčyk taho, da jakoha sacyjalna-ekanamičnaha kłasa naležyć čałaviek.
Arhumienty «za» i «suprać»
Jak adznačaje WSJ, inicyjatyva Li padzialiła krainu praktyčna napałam.
Arhumienty za dziaržaŭnaje finansavańnie hruntujucca na tym, što košt sučasnych preparataŭ i pracedur vielmi vysoki, i mnohija vymušanyja tracić vielizarnyja sumy biez harantyi vyniku. Ludzi, jakija sutyknulisia z hetaj prablemaj, adznačajuć, što pastajannaja tryvoha z-za straty vałasoŭ razburaje ich samaacenku i prymušaje adčuvać siabie nieabaronienymi ŭ kankurentnym hramadstvie.
Adnak prapanova prezidenta vyklikała i mocnuju chvalu krytyki. Jak adznačaje WSJ, apanienty inicyjatyvy, u tym liku pradstaŭniki miedycynskich arhanizacyj, ličać taki krok sumnieŭnym z punktu hledžańnia finansaŭ.
Asnoŭny arhumient suprać palahaje ŭ tym, što dziaržaŭnaja sistema achovy zdaroŭja i tak pierahružanaja, tamu resursy treba nakiroŭvać na lačeńnie krytyčnych zachvorvańniaŭ. Akramia taho, hučać mierkavańni, što heta moža być niespraviadliva ŭ adnosinach da žančyn, pakolki prablema abłysieńnia tradycyjna ličycca pieravažna mužčynskaj.
Tym nie mienš, pavodle apytańnia Embrain Trend Monitor, bolš za try čverci žycharoŭ krainy ličać, što prablema vypadzieńnia vałasoŭ chvaluje ŭsich. Prykładna pałova respandentaŭ, navat niahledziačy na adsutnaść simptomaŭ abłysieńnia, pryznajecca, što cikavicca srodkami suprać vypadzieńnia.
Prezident Paŭdniovaj Karei adznačaje, što ciapier ministerstva achovy zdaroŭja krainy vyvučaje metazhodnaść uklučeńnia lačeńnia abłysieńnia ŭ strachavy pakiet.
Kamientary
No pri čiom tut kvalifikacija - eto vopros mientalitieta.
Hłaza i zuby v prioritietie,čisto mojo mnienije. I koniečno žie zdorovoje pitanije i fizičieskaja aktivnosť.