Čarhovaja sproba ŭładaŭ zamianić Tut.by? U Biełarusi źjaviŭsia novy infarmacyjny partał
Nazyvajecca novy partał Times.by, adkazvaje za jaho hałoŭnaja redaktarka BiełTA. Što viadoma pra sajt, piša BAŽ.
«Multymiedyjny internet-resurs, jaki piša pra samaje važnaje i cikavaje ŭ Biełarusi i śviecie», — tak pazicyjanuje siabie Times.by.
Čytaču prapanujuć rubryki «Palityka», «Ekanomika», «Technałohii», «Hramadstva», «Styl žyćcia» i «Śpiecprajekty». Što da palityki, to tut u asnoŭnym naviny z aficyjnaj dziaržaŭnaj chroniki.
Partał nie maje biełaruskaj viersii. Resurs nie vyhladaje ahresiŭna prapahandysckim, chacia prytrymlivajecca ahulnych naratyvaŭ dziaržaŭnych ŚMI. Vostrych sacyjalna-hramadskich siužetaŭ nie nazirajecca.
Kalektyŭ z šaści žurnalistaŭ piša pra nadvorje, zorak sportu i muzyki, DTZ, astraprahnozy, techniku, sposaby pravieści doŭhija śviaty i h. d.
Adna z žurnalistak — byłaja namieśnica redaktara «Minsk-Navin» Viktoryja Al Ali.
Samo vydańnie źjaviłasia ŭ vieraśni 2025 hoda. ZAT «Tajms Miedyja Hrup» — zasnavalnik partała — zarehistravany 8 lipienia 2025 hoda.
Hałoŭnaj redaktarkaj novaha resursu paznačana Alena Krutalevič. Jana ž źjaŭlajecca hałoŭnaj redaktarkaj dziaržaŭnaha infarmacyjnaha ahienctva BiełTA.
Dyrektar ZAT «Tajms Miedya Hrup» — Alaksandr Marcinkievič, były namieśnik dyrektara Parka vysokich technałohij. Kiraŭnictva PVT całkam źmianiłasia ŭ traŭni 2025 hoda.
«Chodzić infarmacyja, što BiełTA ŭdzielničaje ŭ realizacyi hetaha miedyjaprajekta», — raspaviała słužbie infarmacyi BAŽ asoba, znajomaja ź situacyjaj.
Pavodle źviestkak BAŽ, da novaha prajekta maje dačynieńnie i Tochka.by.
Tochka.by zarehistravany ŭ vieraśni 2022 hoda. Heta byŭ pieršy ad 2020‑ha aficyjna zarehistravany ŭ krainie infarmacyjny resurs.
Usie pravy na miedyja naležać ZAT «Kropka dydžytał hrup». Dyrektar — Ihar Ruban. Jon skončyŭ Minskaje vyšejšaje inžyniernaje zienitna-rakietnaje vučylišča SPA, u 2014 hodzie Akademiju kiravańnia. Pracavaŭ u BiełTA, byŭ pres-sakratarom u Biełaruskaj asacyjacyi mižnarodnych aŭtamabilnych pieravozčykaŭ, zajmaŭ pasadu namieśnika dyrektara pa kamiercyjnych pytańniach u praduktovaj IT-kampanii «Biełtransspadarožnik», redahavaŭ «Vieśnik Biełnaftachima».
Hałoŭnym redaktaram vydańnia staŭ były pres-sakratar ahienctva Sputnik Biełaruś Pavieł Tuchto. Raniej jon kiravaŭ pradstaŭnictvam nacyjanalnaj dziaržaŭnaj teleradyjokampanii Biełarusi ŭ Maskvie.
Kamientary