Na praciahu dziesiacihodździaŭ ahienty kubinskaj raźviedki ličylisia «zorkami» Chałodnaj vajny: jany paśpiachova praduchilali zamachi na Fidela Kastra, vierbavali vysokapastaŭlenych amierykanskich čynoŭnikaŭ i achoŭvali kiraŭnikoŭ dziaržaŭ ad Anhoły da Panamy. Adnak zachop vieniesuelskaha dyktatara Nikałasa Madura — adnaho z samych kaštoŭnych klijentaŭ Havany — nanios surjozny ŭdar pa reputacyi hetych śpiecsłužbaŭ. Pra heta piša WSJ u svaim analityčnym materyjale.
Elitnyja padraździaleńni ZŠA pačali šturm rezidencyi Madura kala 2‑j hadziny nočy ŭ subotu, 3 studzienia, pa miascovym časie. Amierykanskija vajskoŭcy zachapili dyktatara razam z žonkaj jašče da taho, jak tyja paśpieli schavacca ŭ bunkiery.
Pa słovach staršyni Abjadnanaha kamiteta načalnikaŭ štaboŭ hienierała Dena Kiejna, apieracyja stała vynikam šmatmiesiačnaj pracy raźviedki ZŠA i ŭdziełu jak minimum adnaho infarmatara ŭnutry vieniesuelskaha ŭrada. Hety čałaviek dapamoh zrazumieć zvyčki Madura: što jon jeŭ, što nasiŭ, dzie spaŭ i jakija ŭ jaho byli chatnija žyvioły.
Maštabnyja straty Kuby
Jak piša WSJ, kubinski ŭrad paćvierdziŭ hibiel 32 aficeraŭ, jakija naležali da Revalucyjnych uzbrojenych sił i Ministerstva ŭnutranych spraŭ. Mienavita jany składali asnovu achovy Madura. Prezident Kuby Mihiel Dyjas-Kaniel abviaściŭ dvuchdzionnuju žałobu pa zahinułych, nazvaŭšy ich achviarami «terarystaŭ u impierskaj formie».
Adnak, pavodle acenak byłych ahientaŭ i dysidentaŭ, na jakich spasyłajecca vydańnie, realnaja kolkaść zadziejničanych sił była značna bolšaj. Miarkujecca, što asabistuju biaśpieku Madura zabiaśpiečvali kala 140 kubinskich aficeraŭ. Dziasiatki ź ich, jak paviedamlajecca, atrymali ranieńni abo ciažkija apioki padčas rakietnaha abstrełu i raźlotu askołkaŭ. Ministr abarony Vieniesueły Uładzimir Padryna Łopies taksama paćvierdziŭ, što ZŠA źniščyli značnuju častku słužby biaśpieki.
Što jašče horš dla reputacyi kubincaŭ, jak zaŭvažaje były ministr zamiežnych spraŭ Mieksiki Chorche Kastańjeda, jany nie zmahli nanieści amierykancam nijakaj škody: ZŠA nie stracili nivodnaha sałdata i nivodnaj adzinki techniki.
Kubinskaja sistema biaśpieki
Jak adznačaje WSJ, saviecki KDB doŭhi čas abapiraŭsia na šyrokija sietki kubinskich infarmataraŭ u Łacinskaj Amierycy i Afrycy, a dośvied kubincaŭ u abaronie sajuźnikaŭ, vyjaŭleńni chvalavańniaŭ i padaŭleńni inšadumstva staŭ prybytkovym pradmietam ekspartu. Paśla raspadu Savieckaha Sajuza mienavita bahataja naftaj Vieniesueła stała vyratavalnym kołam dla kubinskaj ekanomiki i śpiecsłužbaŭ.
Ciapier ža hety sajuz pad pahrozaj. Prezident ZŠA Donald Tramp zajaviŭ, što Kuba «hatovaja abrynucca», a dziaržsakratar Marka Rubia dadaŭ, što «hety biedny vostraŭ zachapiŭ Vieniesuełu», i ciapier dla jaho nadyšli ciažkija časy.
Były aficer kubinskaj raźviedki Enrykie Harsija, jaki źbieh u ZŠA, tłumačyć łohiku kubinskaha režymu: ludzi mohuć haładać, ale represiŭny aparat pavinien mieć pryvilei. Kali ž režym stracić ekanamičnuju padtrymku z boku Vieniesueły, nijakaja sistema nie vytrymaje na fonie biesprecedentnaha ekanamičnaha kryzisu na samim vostravie.
Aŭtar artykuła źviartaje ŭvahu na ŭražalnyja maštaby kubinskaj mašyny biaśpieki. Dla biednaha vostrava z nasielnictvam kala 10 miljonaŭ čałaviek raźviedvalnaja struktura vyhladaje hihanckaj — jana naličvaje kala 100 tysiač supracoŭnikaŭ.
Ahienty jość litaralna ŭsiudy: na pracoŭnych miescach, u škołach i navat u kinateatrach, a sietka infarmataraŭ achoplivaje kožny haradski kvartał. Śpiecsłužby majuć srodki dla manitorynhu telefonnych i kibierkamunikacyj, a ich supracoŭniki słaviacca ŭmieńniem pravodzić tajnyja pieratrusy ŭ damach, nie pakidajučy śladoŭ.
Hety aparat dakazaŭ svaju efiektyŭnaść, zadušyŭšy pratesty na Kubie ŭ 2021 hodzie, a taksama adyhraŭ klučavuju rolu ŭ padaŭleńni apazicyi ŭ Vieniesuele.
Mienavita vysokapastaŭlenyja aficery kubinskaj vajskovaj raźviedki kuryrujuć vielizarny siłavy błok Vieniesueły — pieradusim tamu, što ŭ ich ułasnych šerahach redka zdarajucca vypadki ŭkaranieńnia čužych ahientaŭ abo deziercirstva.
Hrupu kubinskaj raźviedki i biaśpieki ŭ krainie ŭznačalvali vieterany słužby, u tym liku Asdrubal de ła Vieha. Hety aficer byŭ «cieniem» Madura i spaŭ u pakoi pobač sa zrynutym dyktataram. Pra los de ła Vieha na hety momant ničoha nieviadoma.
Fatalnaja pamyłka raźviedki
Jak adznačaje Siedryk Lejtan, były aficer vajskovaj raźviedki ZŠA, raźviedka maje absalutna krytyčnaje značeńnie dla achovy VIP-pierson, adnak pamyłkovyja dapuščeńni i ideałahičnaja zašoranaść mohuć pahoršyć zdolnaść prymać adekvatnyja rašeńni.
U jakaści prykładu pravilnych pavodzin ekśpiert pryvodzić prezidenta Rasii Uładzimira Pucina: jak były aficer KDB, toj prykładaje vielizarnyja namahańni, kab zachoŭvać poŭnuju sakretnaść nakont svaich pieramiaščeńniaŭ, detalaŭ pražyvańnia i pracoŭnych miescaŭ.
Na dumku Lejtana, ład žyćcia, štodzionnyja zvyčki i rucina, jakija mohuć zdavacca banalnymi, nasamreč stanoviacca krytyčna važnymi dla vykarystańnia ŭraźlivaściaŭ kiraŭnikoŭ dziaržaŭ. Mienavita heta i stała fatalnym dla Madura. Lejtan vykazvaje ździŭleńnie, čamu vieniesuelski lidar nie schavaŭsia ŭ jakoj-niebudź nieprykmietnaj kvatery pasiarod Karakasa abo ŭ sielskaj miascovaści.
«Kali vy sapraŭdy sprabujecie paźbiehnuć aryštu, vy idziacie ŭ miescy, pra jakija ludzi nie viedajuć», — cytuje słovy ekśpierta WSJ.
Kamientary